အမ်းမြို့သိမ်းတိုက် ဟာ နိုဝင်ဘာ ၁၄ ရက် က စတင်လာခဲ့ပြီး နပခ နဲ့ အနီးဆုံးမှာရှိတဲ့ ရပ်ကွက်တွေ ထဲက စစ်ကောင်စီ တပ်စခန်းတွေ ကို AA က ပြင်းပြင်းထန်ထန် ထိုးစစ်ဆင်နေတယ် လို့သတင်းရရှိပါတယ်။
အမ်းမြို့ပေါ်ရပ်ကွက်ဖြစ်တဲ့ မြို့ဟောင်းရပ်ကွက်က တပ်ထိန်း (တပ်မတော် တပ်ထိန်း)ဂိတ်နဲ့ အောက်ရွာရပ်ကွက်ကို မနေ့ညက ထိုးစစ်ဆင်ခဲ့ပြီး အမ်းမြို့ပေါ်မှာ တစ်ညလုံး တိုက်ပွဲတွေ ပြင်းထန်နေခဲ့တာဖြစ်တယ်လို့ မြေပြင်သတင်းရင်းမြစ်က ပြောပါတယ်။
“အောက်ရွာက အိမ်တွေဆိုမီးပါလောင်တယ် ၊တံတားထိပ်ကအိမ်တွေဆို အိမ်တိုင်ပဲကျန်ခဲ့တယ်” လို့ အမ်းဒေသခံတစ်ဉီးက လေးဝတီ FM ကို ပြောပါတယ်။
တခြားသတင်းရင်းမြစ်တစ်ဉီးက ” တိုက်ပွဲကတအားပြင်းပါတယ်။ လေယာဉ်တွေကလည်းဝဲ ပြီးဗုံးလည်းချခဲ့တယ်။ မြို့ဟောင်းရပ်ကွက်ကလူတွေလည်း ညချင်းပြေးရတယ်”လို့ ပြောပါတယ်။
အမ်းမြို့ပေါ်မြို့ဟောင်းရပ်ကွက် (လေယဉ်ကွင်း)ရှိ စစ်ကောင်စီတပ်ထိန်းဂိတ်ကို အာရက္ခတပ်တော် AA ကထိုးစစ်ဆင်တိုက်ခိုက်နေပြီး စစ်ကောင်စီဘက်က လေကြောင်းက ပြန်လည်ခုခံခဲ့တယ်လို့ စစ်ရေးသတင်းရင်းမြစ်က လေးဝတီ FM ကို ပြောပါတယ်။
အမ်းမြို့နယ်ထဲမှာ တိုက်ပွဲတွေ ဖြစ်နေတာ သုံးလကျော်ကြာမြင့်ခဲ့ပြီး အခု နိုဝင်ဘာလ ပိုင်းထဲမှာတော့ အမ်းမြို့ပေါ်နဲ့ အနောက်ပိုင်းတိုင်းစစ်ဌာနချုပ် ဂိတ်တံခါးဝအထိ ရောက်ရှိလာပြီ ဖြစ်ပါတယ် ။
အမ်းမြို့နယ်ဟာ ရခိုင်ပြည်နယ် မှာ တပ်အင်အား အများဆုံး ချထားတဲ့ မြို့ နယ်တစ်ခုဖြစ်ပြီး အနောက်ပိုင်းတိုင်းစစ်ဌာနချုပ် လက်အောက်ခံတပ် ရင်း တပ်မ ၁၈ ခု နဲ့ နေရာယူဖြန့်ကျက်ထားတဲ့ မြို့လည်းဖြစ်ပါတယ်။
အမ်းချောင်းသူ ရေးသည်။
