ရခိုင်ပြည်၊တောင်ကုတ်မြို့နယ်၊ သင်္ချီကိုင်း ကျေးရွာ ကို နိုဝင်ဘာ ၁၉ ရက် နံနက်မှာ စစ်ကောင်စီ လေကြောင်းဗုံးကြဲ ခဲ့လို့ အသက်မပြည့်သေးတဲ့ မိန်းကလေး နှစ်ဉီးအပါအဝင် အရပ်သားလေးဉီး သေဆုံးခဲ့တယ်လို့ သတင်းရရှိပါတယ်။
အဲ့ဒီနေ့မနက်ပိုင်းမှာ စစ်ကောင်စီလေကြောင်း ကနေ ဂျက်ဖိုက်တာနဲ့ ကြဲချခဲ့တာဖြစ်ပြီး သင်္ချီကိုင်း ကျေးရွာထဲမှာ ကျရောက်ပေါက်ကွဲခဲ့တာဖြစ်ပါတယ်။
“အိမ်တွေလည်းပြိုတယ် လူတွေလည်းသေတယ်၊ ရွာထဲ ကို တည့်တည့်ကျတာ “ လို့ ဒေသခံ သတင်းရင်းမြစ်က ပြောပါတယ်။
အဲ့ဒီလေကြောင်း လက်နက်ကြီး ထိမှန်ပေါက်ကွဲမှုကြောင့် ရွာသားလေးဉီးသေဆုံးပြီး ၊ ၅ ဉီးဒဏ်ရာ ရသွားတယ်လို့ သိရပါတယ်။ ဒါအပြင် ကျေးရွာအတွင်းက နေအိမ် နှစ်လုံးလည်း ထိမှန် ပျက်စီးခဲ့ပါတယ်။
သေဆုံးခဲ့ရသူတွေကတော့ မဒေဝီမြင့် (၁၃ )နှစ် ၊ မသန်းသန်းအေး (၁၃) နှစ် ၊ ကိုရင်ဂို(၂၈ )နှစ် ၊ မရွှေရည်ဝင်းဝါ (၂၅) နှစ်တို့ ဖြစ်ကြတယ်လို့ လေးဝတီ FM က စုံစမ်းသိရှိရ ပါတယ်။
တောင်ကုတ်မြို့နယ်ထဲမှာ တိုက်ပွဲတွေ ဖြစ်ပွားနေပြီး အာရက္ခတပ်တော် AA ကို ပြန်လည် ထိုးစစ်ဆင်နိုင်ခြင်းမရှိတော့တဲ့ စစ်ကောင်စီဟာ လေကြောင်းကနေ အရပ်သားကျေးရွာတွေကို ဗုံးကြဲဖျက်ဆီးနေတာ ဖြစ်ပါတယ်။
အဲ့ဒီလိုလေကြောင်းတိုက်ခိုက်မှုတွေ ကြောင့် ၂၀၂၃ နိုဝင်ဘာကနေ ၂၀၂၄ အောက်တိုဘာ လ အထိ အတစ်နှစ်အတွင်းမှာ အရပ်သား ၇၀၀ ကျော် သေဆုံးခဲ့တယ်လို့ AA က ထုတ်ပြန်ထားပါတယ်။
အမ်းချောင်းသူ(လေးဝတီ FM)ရေးသည်။
