နပခ ဌာနချုပ်ကို ဦးဆောင်နေတဲ့ ဒုတိုင်းမှူးသောင်းထွန်းနဲ့ တိုင်းဦးစီးချုပ် ဗိုလ်မှူးချုပ်ကျော်ကျော်သန်းတို့ ကို နပခ အဆုံးသတ် တိုက်ပွဲကနေ

ဖမ်းဆီးရရှိခဲ့တယ်လို့ ဒီဇင်ဘာ ၂၀ ရက် ရက်စွဲနဲ့ အာရက္ခတပ်တော် က ထုတ်ပြန်ခဲ့ပါတယ်။

ဖမ်းဆီးခံထားရတဲ့ အရာရှိတွေကတော့ ဒုတိုင်းမှူး ဗိုလ်မှူးချုပ်သောင်းထွန်း ၊ တိုင်းဦးစီးချုပ် ဗိုလ်မှူးချုပ်ကျော်ကျော်သန်း ၊ ဗိုလ်ကြီးအောင်စစ်နိုင် (ဆက်သွယ်ရေး အရာရှိ ၊ အရာခံဗိုလ်အေးသိမ်း )ရုံးအုပ်ချုပ်ရေး တို့ကို ဖမ်းမိခဲ့တယ်လို့ ထုတ်ပြန်ထားပါတယ်။

အနောက်ပိုင်းတိုင်းစစ်ဌာနချုပ်ကို သိမ်းပိုက်ပြီး အမ်းမြို့ တစ်ခုလုံးကို ထိမ်းချုပ်ပြီးချိန်မှာ ရခိုင်ပြည်က မြို့ ၁၄ မြို့ကိုလည်း အာရက္ခတပ်တော်က ထိမ်းချုပ်နိုင်ခဲ့ပြီဖြစ်ပါတယ်။

အနောက်ပိုင်းတိုင်းစစ်ဌာနချုပ် ကို ဦးစီးကွက်ကဲနေတဲ့ ဒုတိုင်းမှူးသောင်းထွန်းဟာ အောက်တိုဘာလကုန်ပိုင်း က ပဲခူးမြို့ကို ရဟပ်ယာဉ်နဲ့ ပါသွားပြီး တဲ့ သတင်းတွေထွက်ခဲ့ပါတယ်။

အလားတူပဲ တိုင်းစစ်ဦးစီးချုပ် ဗိုလ်မှူးချုပ်ကျော်ကျော်သန်း ဟာလည်း တိုက်ပွဲထဲက ထွက်ပြေးသွာသယောင် အသွင်ယူခဲ့ပြီးချေမှုန်းခံခဲ့ရတယ်လို့ လေးဝတီ fm သတင်းရေးသားခဲ့ပါတယ်။

“ဗိုလ်မှူးချုပ်ကျော်ကျော်သန်းရဲ့ ကိုယ်ပိုင်နံပတ်တွေ အချက်အလက်တွေကို ထွက်ပြေးတဲ့ လူနှစ်ဆယ်ကျော်ပါတဲ့ အုပ်စု နဲ့ အသွင်ယူပြီးထည့်ပေးလိုက်တယ်။ နောက်က လိုက်ပြီးချေမှုန်းတဲ့အခါ သူတို့ တစ်ဖွဲ့လုံး သေသွားတာကို အတည်ပြုနိုင်ခဲ့တယ် ၊ အဲ့ဒီမှာ ကျော်ကျော်သန်းရဲ့ ကိုယ်ပိုင်အမှတ်သက်သေအထောက်အထားတွေပါတယ်” လို့ စစ်ရေးသတင်းရင်းမြစ်က လေးဝတီ FM ကို ပြောပါတယ်။

နပခ ဌာနချုပ်အတွင်းက ထိပ်ပိုင်းအရာရှိတွေဟာ မိမိကိုယ်လွတ်ရုန်းဖို့ နည်းလမ်းမျိုးစုံ ကြိုးစားခဲ့ကြပေမယ့် နောက်ဆုံးမှာ အဖမ်းခံလိုက်ရတယ်လို့ စစ်ရေးသတင်းရင်းမြစ်က ပြောပါတယ်။

ဒါအပြင် အနောက်ပိုင်းတိုင်းစစ်ဌာနချုပ် အတွင်းပိုင်းကို လေကြောင်းကနေ စစ်ကောင်စီက ‌တစ်ခေါက်မှာ အင်အား ၁၅၀ စီနဲ့ ၃ ကြိမ်တိုင်တိုင် ‌ထောက်ပို့ စစ်ကူတွေ ပို့လွှတ်ခဲ့တယ်လို့ ထုတ်ပြန်ထားပါတယ်။

အာရက္ခတပ်တော်ဟာ အမ်းမြို့ ၊ ပလက်ဝမြို့၊ ပေါက်တောမြို့၊ မင်းပြားမြို့၊ မြောက်ဦးမြို့၊ ကျောက်တော်မြို့၊ မြေပုံမြို့၊ ပုဏ္ဏားကျွန်းမြို့၊ ရမ်းဗြဲမြို့၊ ရသေ့တောင်မြို့၊ ဘူးသီးတောင်မြို့၊ သံတွဲမြို့၊ တောင်ကုတ်မြို့ နှင့် မောင်တောမြို့တို့ ကို သိမ်းပိုက်ထားပါတယ်။

Lemon (လေးဝတီFM)ရေးသည်။