လတ်တလော စစ်ရေးရှုပ်ထွေးနေတဲ့ အမ်းမြို့နယ်ဟာ ရွှေသဘာဝ ဓာတ်ငွေ့ ပိုက်လိုင်းဖြတ်သန်းရာ အဓိက ကျတဲ့နေရာ ဖြစ်ပြီး ကျောက်ဖြူ ကနေ အမ်း ၊ အမ်းကနေ မကွေး ပိုက်လိုင်းဖြတ်သန်း ရာ ရိုးမတော တလျှောက်မှာ စစ်ကောင်စီ ဂိတ်ပေါင်း ၂၀ ကျော် ကို အင်အားတိုးမြှင့် ချ ထားတယ် လို့ သတင်းရရှိပါတယ်။

ကျောက်ဖြူ ၊ အမ်း ၊ မကွေး ကို ဖြတ်သန်းထားတဲ့ တရုတ်ဂက်(စ်) ပိုင်းလိုင်းဖြတ်သန်းရာ ရိုးမတောလမ်းတစ်လျှောက် စစ်ကောင်စီ တွေ ဟာ တရုတ်လူမျိုး ပိုက်လိုင်းတာဝန်ရှိသူတွေ ကို

စောင့်ကြပ်ဖို့ နဲ့ ပိုက်လိုင်းကို အာရက္ခတပ်တော် ဘက်က အန္တာရယ်တစုံတရာ မပြုဖို့ အဓိက စောင့်ကြပ်တာဖြစ်ပါတယ်။

“တရုတ်ပိုက်လိုင်းက တရုတ်တွေကို လုံခြုံရေးပေးထားကြတယ်၊ အများစုက အရပ်ဝတ်တွေနဲ့ နေကြတာပါ” လို့ စစ်ရေးသတင်းရင်းမြစ်က လေးဝတီ FM ကို ပြောပါတယ်။

ဒါအပြင် တရုတ်နိုင်ငံကို ပို့လွှတ်တဲ့ဓာတ်အားလွှဲစက်ရုံတစ်ရုံဟာ အမ်းရိုးမ ထဲမှာ တည်ဆောက်ထားပြီး အဲ့ဒီ စက်ရုံထဲမှာလည်း ဓာတ်အားခွဲရုံက တရုတ်လူမျိုးတာဝန်ရှိသူတွေ ပိတ်မိနေတယ်လို့ ဆိုပါတယ်။

“သူတို့ က အမ်းရိုးမထဲမှာ အဲ့ဒီစက်ရုံဝန်းထဲမှာ နားနေဆောင်တွေ ၊ ဟိုတယ် လို ဂက်စ်ဟောက်လို ဆောက်ပြီး နေတာ၊ လမ်း တွေ သေချာဖောက်ပြီး မြို့သေးသေးလေးတစ်မြို့လို သေချာနေတာ၊ ရိုးမတောထဲမှာ နေရာအကျယ်ကြီးယူထားတာ ” လို့ ပြောပါတယ်။

ဓာတ်ငွေ့ပို့လွှတ်တဲ့ လုပ်ငန်းဟာ အခုလို စစ်ပွဲကာလအတွင်းမှာပင် နေ့စဉ် လည်ပတ်နေတာဖြစ်ပါတယ်။

အဲ့ဒီ ဓာတ်အားခွဲစက်ရုံတည်ရှိတဲ့နေရာ ကို တောင်စောက်ဂိတ်က နေ ဖြတ်သန်းသွားရပြီး တောင်စောက် ဂိတ်မှာတော့ စစ်ကောင်စီတပ်သား ၂၀၀ ကျော်ချထားတယ်လို့ သိရပါတယ်။

အမ်းမြို့နယ်မှာ ပြင်းပြင်းထန်ထန်စစ်ပွဲဖြစ်နေသလို ကျောက်ဖြူမြို့ဟာ အမ်းနဲ့ မြို့နယ်ချင်းဆက်နေတဲ့ အတွက် ကျောက်ဖြူ- အမ်း နဲ့ အမ်း-မကွေး မြို့နယ် တွေကြားက ပိုက်လိုင်းဖြတ်သန်းတဲ့ နေရာတွေမှာ စစ်ကောင်စီ ဂိတ်‌တွေ အထပ်ထပ်ချထားတယ်လို့ ဆိုပါတယ်။

ကျောက်ဖြူ ၊ အမ်း၊ မကွေး သုံးမြို့နယ် အတွင်းက ပိုက်လိုင်းတလျှောက် မှာ မင်းတပ်ကျွန်းတောင်ပေါ် ၊ မြောက်ကိုင်းရွာဂိတ်၊ အိုးပုံရွာဂိတ်၊ ပတ်ကွဲပိုက်လိုင်းဂိတ် ၊ ဆင်ကုန်ဒိုင် ပိုက်လိုင်းဂိတ် ၊ တောင်စောက် ပိုက်လိုင်းဂိတ် ၊ ကုလားနှစ်ကောင် ပိုက်လိုင်းဂိတ်၊ ကံမြင်းကန် ဂိတ်ပိုက်လိုင်း ဂိတ် ၊ ကံမြင်းကန်ဘုရားဂိတ်၊ တုံးကြီး အထက် ပိုက်လိုင်းဂိတ် ၊ တုံးကြီးအောက် ပိုက်လိုင်းဂိတ်၊ မထုံးပိုက်လိုင်းဂိတ်၊ တန်ခုံတိုင် ၊တာဝါတိုင် (တရုတ်တွေ အသုံးပြုရန် တည်ဆောက်ထားတဲ့ ) ဂိတ် ၊ ပတ်ကွဲပိုက်လိုင်းဂိတ် ၊ ကြက်ရေစမ်း ပိုက်လိုင်းဂိတ် စသဖြင့် ပိုက်လိုင်းစောင့်တဲ့ ဂိတ်အသီးသီးကိုလည်း အင်အားတိုးချ လိုက်တာ ဖြစ်တယ်လို့ ဆိုပါတယ်။

ဒီဂိတ်တွေဟာ ကားလမ်းပိုင်းပေါ်က ဂိတ်တွေမဟုတ်ဘဲ ရိုးမတောထဲ ကို ဖြတ်သန်းထားတဲ့ ဂက်(စ) ပိုက်လိုင်းဘေးက ဂိတ်တွေ ဖြစ်တယ်လို့လည်းသိရပါတယ်။

ကျောက်ဖြူက နေ စတင်ခဲ့တဲ့ ရွှေဂက်(စ)ပိုက်လိုင်းဟာ အမ်းမြို့နယ် ၊ အမ်းရိုးမ ကို ဖြတ်ပြီး မကွေးတိုင်း ၊ မန္တလေးတိုင်း ၊ ရှမ်းပြည် နယ် တို့ကို ဖြတ်ပြီး မှ

တရုတ်နိုင်င်ငံ ကူမင်းမြို့ကို ပို့လွှတ်နေတာဖြစ်ပါတယ်။

ရခိုင်ပြည်တွင်း တိုက်ပွဲတွေပြင်းပြင်းထန်ထန်ဖြစ်ပွားနေတဲ့ ပြီးခဲ့တဲ့ ဖေဖော်ဝါရီလမှာ ကျောက်ဖြူ အထူးစီးပွားရေးဇုံ အကောင်အထည်ဖော်ရေး အတွက် စာချုပ်အသစ် ကို တရုတ်အစိုးရ နဲ့ မြန်မာ အစိုးရကြားမှာ ထပ်မံချုပ်ဆိုခဲ့ပါတယ်။

ဒါအပြင် ရွှေသဘာဝဓာတ်ငွေ့စီမံကိန်းမှာ ဓာတ်ငွေ့ သိုက် တွင်း အသစ်တူးဖော်ထုတ်လုပ်ဖို့ တည်ဆောက်ရေးလုပ်ငန်းတွေကို တောင်ကိုးရီးယား POSCO နဲ့ တရုတ်ကုမ္ပဏီ COOEC တို့ ဟာ ဒီနှစ် ဇွန်လ အတွင်းမှာသဘောတူညီမှုရရှိခဲ့ပါသေးတယ်။ ဒီအချက်တွေကို ကြည့်ခြင်းအားဖြင့် ရခိုင်ပြည်တစ်ခုလုံး စစ်ပွဲဇုံထဲ ကျရောက်နေပြီး ပြည်သူ တွေ ပြေးလွှားနေရချိန်မှာ တရုတ်ရဲ့ အကျိုးစီးပွား က တော့ ဆက်လည် လည်ပတ်နေတာဖြစ်ပါတယ်။

ကျောက်ဖြူကနေ ဓာတ်ငွေ့နဲ့ ရေနံ ပို့လွှတ်ဖို့အတွက် ရွှေသဘာဝဓာတ်ငွေ့ ပိုက်လိုင်းနဲ့ ယှဉ်တွဲလျှက် ရေနံပိုက်လိုင်းကို ပါ ဖောက်လုပ်ထားတာဖြစ်ပါတယ်။

အဲ့ဒီပိုက်လိုင်းဟာ မြန်မာပြည် ကို ထက်ဝက်ပိုင်းချထားပြီး ပိုက်လိုင်းတလျှောက်က တောင်သူတွေ နဲ့ မြေယာပိုင်ရှင်တွေကိုလည်း လျော်ကြေး လောက်ငှစွာမပေးခဲ့သလို ၊ ပိုက်လိုင်းအာမခံချက်တွေ နိုင်ငံအနေ နဲ့ လည်း အာမခံချက်တစ်စုံတစ်ရာ မရရှိခဲ့ပါဘူး။