ရခိုင်ပြည်၊ မြေပုံမြို့နယ်၊ ကမ်းထောင်းကြီးမြို့ က စားဝတ်နေရေးအတွက် နယ်စပ်ဖြတ်ကျော် အလုပ်လုပ်ဖို့ ထွက်ခွာသွားတဲ့ အမျိုးသမီးလေးဉီးဟာ မူဆယ် ဂိတ်မှာ ဖမ်းဆီးခံရပြီး တစ်ဉီး သတ်ဖြတ်ခံရတယ်လို့ သတင်းရရှိပါတယ်။
မူဆယ်ဂိတ်မှာဖမ်းဆီးခံရတဲ့ အမျိုးသမီးလေးဉီး အနက် က အသက် ၂၆ နှစ်အရွယ် မနွယ်နွယ်မြင့် ဟာ ဒီဇင်ဘာ ၆ ရက် နေ့ က စစ်ကောင်စီ ရဲ့ သတ်ဖြတ်ခြင်းကိုခံခဲ့ရတယ်လို့ သိရပါတယ်။
“မနေ့ညက မနက်အစောပိုင်းမှာ ကားနဲ့ စစ်ကောင်စီ ဂိတ်ကိုဖြတ်လာတယ် ။ မူဆယ်မြို့အဝင် စစ်ကောင်စီဂိတ်မှာ ဖုန်းစစ်ဆေးတယ်။သူတို့ ၄ ဦးစလုံးကို ဖမ်းတယ်။ မနွယ်နွယ်မြင့်ကိုတော့ Facebook နဲ့ Telegran မှာ AA နဲ့ပတ်သတ်တဲ့ပုံတွေတွေ့လို့ ဆိုပြီး စစ်ကောင်စီ တပ်သားတွေက သတ်လိုက်တယ်” လို့ အဲ့ဒီအမှုကို မျက်မြင်ကြုံတွေ့ခဲ့ရတဲ့ အမျိုးသမီးက ပြောပါတယ်။
လေးဉီးအနက် က ကျန်တဲ့ အမျိုးသမီးတွေဟာလည်း မူဆယ်ရောက် ရခိုင်ဒေသခံတွေက စစ်ကောင်စီ ဂိတ်ကို သိန်းရာချီပေးပြီး ပြန်လည် ထုတ်ယူလာရတာဖြစ်ပါတယ်။
လွတ်မြောက်လာတဲ့ အမျိုးသမီးသုံးဦး ဟာ အသက် ၁၈ ကနေ ၂၀ ဝန်းကျင် အရွယ်အမျိုးသမီးတွေ ဖြစ်ပြီး အဲ့ဒီမိန်းကလေးတွေ အသက်ရှင်ခွင့်ရဖို့ ဒေသတွင်းက ရခိုင်လူမှုအဖွဲ့အစည်းတွေက ထုတ်ယူပေးခဲ့ရတာဖြစ်တယ်လို့ လေးဝတီ FM က စုံစမ်းသိရှိရပါတယ်။
“မသေခင်ဘာဖြစ် ခဲ့သေးလဲ ဆိုတာ သူပဲ သိမယ် “ လို့ သတင်းရင်းမြစ် က ပြောပါတယ်။
စစ်ကောင်စီဟာ မူဆယ်မြို့တွင် ညအချိန်မတော် အလုပ်က ပြန်လာတဲ့ လူငယ်အလုပ်သမားတွေကို ကင်းလှည့် နေတဲ့
တပ်ဖွဲ့ဝင်တွေက ဖမ်းစီးပြီးငွေတောင်းခံတာတွေရှိနေတယ်လို့ မူဆယ်ရောက် ဧရာဝတီတိုင်းက အမျိုးသမီးတစ်ဉီးက ပြောပါတယ်။
“ကျွန်မတော့ ညနေ ၉ နာရီ မှာအလုပ်ကအိမ်ပြန်လာတယ်။ တစ်ခါတော့ဖမ်းခံထိတယ်။ မှတ်ပုံတင်နဲ့ဖုန်းကိုစစ်ပြီး။ PDF နဲ့ဆက်စပ်မူမေးတယ်။ နောက်ပြီးအပြစ်မရှိအပြစ်ရှာပြီး Facebook မှာ တက်နေတဲ့ ဟာတွေကိုဆက်စပ်ပြောတယ်။ဖမ်းစီးမယ်စခန်းခေါ်ယူမယ်ပြောတယ်။မဟုတ်ရင်ငွေပေးရမယ်ဆိုလို့ ငွေ ၁၀၀၀၀၀( တစ်သိန်း) ပေးခဲ့ရတယ်။” လို့ ဧရာဝတီ တိုင်းက ရွေ့ပြောင်းအလုပ်လုပ်ကိုင်သူ အမျိုးသမီးတစ်ဉီးက ပြောပါတယ်။
စစ်ကောင်စီ တပ်ဖွဲ့ဝင်တွေဟာ ရခိုင်ပြည်နယ်မှာ စစ်ရေး အရ ရှုံးနိမ့်နေမှုကြောင့် ၁၁/ မှတ်ပုံတင်ကိုင်ဆောင်သူ မြန်မာပြည်အနှံ့က ရခိုင်တိုင်းရင်းသား အားလုံးကိုနည်းလမ်းအမျိုးမျိုးနဲ့ ချိန်းခြောက်အကြပ်ကိုင်နေတာ ဖြစ်ပါတယ်။
အမ်းချောင်းသူ(လေးဝတီ FM)ရေးသည်။
