မကွေးတိုင်း ငဖဲမြို့နယ်ထဲက စစ်ကောင်စီ ရဲ့ နတ်ရေကန်ဗျူဟာစခန်းနဲ့ မထုံးဂိတ်တို့ကို အာရက္ခတပ်တော် AA နဲ့ PRA(မကွေး ) တော်လှန်ရေး ပူးပေါင်းအဖွဲ့ တွေ တပြိုင်နက် ထိုးစစ်ဆင်နေတယ်လို့ သတင်းရရှိပါတယ်။
စစ်ကောင်စီရဲ့နယ်ခြား မှတ်တိုင်ဂိတ်ဖြစ်တဲ့ ကမြင်းကံဗျုဟာကို AA မှ သိမ်းပိုက်ပြီးနောက် မကွေးတိုင်း ငဖဲမြို့နယ်ထဲက နတ်ရေကန် ဗျူဟာ နဲ့ မထုံး ဂိတ်စခန်းတို့ကို တပြိုင်နက် ဆက်လက်ထိုးစစ်ဆင်နေတာဖြစ်ပါတယ်။
” နတ်ရေကန်ဂိတ်နဲ့ မထုံးဂိတ်ကို ဇန်နဝါရီ ၂၄ ရက် ညပိုင်းက စပြီး တိုးစစ်ဆင်နေတာဖြစ်ပါတယ်။ အဲ့ဒီစခန်းတွေ တိုက်ခံရတော့ ဒီဘက် ငဖဲမြို့ဘက်က စစ်ကူတွေ ထပ်ပို့နေတယ်၊ လေကြောင်းကလည်း ပစ်နေတယ်၊ ” လို့ စစ်ရေး သတင်းရင်းမြစ်က လေးဝတီ FM ကို ပြောပါတယ်။
လက်ရှိတိုက်ပွဲဖြစ်ပွားနေတဲ့ နတ်ရေကန် ဂိတ် နဲ့ မထုံးဂိတ်တွေဟာ မကွေးတိုင်းဘက်အခြမ်း က စစ်ဆေးရေးဂိတ်တွေ ဖြစ်ပါတယ်။
နတ်ရေကန် နဲ့ မထုံးဂိတ်တို့ မှာ တိုက်ပွဲပြင်းထန်နေတဲ့ အတွက် ငဖဲမြို့နယ် အထက်တုံးကြီးနဲ့ အောက်တုံးကြီးတို့မှာ ရှိတဲ့ ရွာသားတွေဟာလည်း စစ်ဘေးရှောင် ထွက်ခွာနေကြတယ် လို့ သတင်းရရှိပါတယ်။
“ကမြင်းကန် ဘုန်းကြီးကျောင်းနဲ့ စာသင်ကျောင်းတွေ ဗုံးကြဲလို့ ပျက်သွားတယ်၊ ရိုးထက်က ရွာတွေ အကုန်ထွက်ပြေးနေကြပြီ ပဒါန်းဘက်ကို စစ်ရှောင်ကြတများတယ်” လို့ သတင်းရင်းမြစ်က ပြောပါတယ်။
ငဖဲမြို့နယ် အတွင်းမှာ စစ်ကောင်စီရဲ့ ငဖဲမြို့နယ် အခြေစိုက် မစခ (၉၀၅) အမြှောက်တပ် နဲ့ ကာကွယ်ရေး ပစ္စည်း စက်ရုံ (ကပစ) ၁၄ တို့ ရှိတာဖြစ်ပါတယ်။
စစ်ကောင်စီဟာ ၄င်းတို့ တပ်တွေ နောက်ဆုတ်သွားတဲ့ စခန်းတွေ နဲ့ အဲ့ဒီအနီးဝန်းကျင်က ကျေးရွာတွေကို လေကြောင်းက တိုက်ခိုက်နေတာဖြစ်ပါတယ်။
စစ်ကောင်စီ ရဲ့ လေကြောင်းတိုက်ခိုက်မှုကြောင့် ကမြင်းကန်၊ အထက်တုံးကြီး ၊ အောက်တုံးကြီး ၊ မထုံး ၊ နတ်ရေစင် စတဲ့ ကျေးရွာတွေက ချင်းတိုင်းရင်းသားကျေးရွာတွေကို မီးလောင်ပျက်စီးလျှက်ရှိပါတယ်။
အဉ္စနလီညှင်း လေးဝတီ(FM)၊
