စစ်ကောင်စီ တပ်တွေရဲ့ အုပ်ချုပ်မှုအောက်မှာ လက်ရှိအချိန်ထိ ရှိနေသေးတဲ့ ရခိုင်ပြည်နယ် က
မြို့ အချို့မှာ သင်္ကြန်ပွဲ ကို ကျင်းပဖို့ စစ်ကောင်စီက ပြည်နယ်အဆင့်အစည်းအဝေးတွေလုပ်ပြီး
ပြင်ဆင်နေတယ်လို့ သတင်းရရှိပါတယ်။
ဒီသင်္ကြန်ပွဲကို စစ်ကောင်စီရဲ့ ရခိုင်ပြည်နယ် ဝန်ကြီးချုပ် ထိန်လင်းဆိုသူက ဦးဆောင်ပြီး ဒီကနေ့
မတ်လ ၂၇ ရက်နေ့မှာ သက်ဆိုင်ရာ ဌာန အလိုက်ညွန်ကြားချက်တွေ ပေးခဲ့တယ်လို့ ဆိုပါတယ်။
\”အဓိက ကတော့ လူထုကို ပျော်ပွဲ ရွှင်ပွဲနဲ့ မြူဆွယ်တဲ့သဘောပါပဲ ၊ အဓိက အားဖြင့်တော့
ရခိုင်ပြည်တောင်ပိုင်းက စစ်ပွဲမရှိသေးတဲ့ မြို့တွေကို ကျင်းပ နိုင်မယ်ထင်တယ်။ မျက်စိရှေ့မှာ
အိမ်တွေ မီးလောင် ၊ လူတွေ သေဆုံးထားရတဲ့ ကျွန်တော်တို့ ဘက်က လူတွေက တော့
စစ်ကောင်စီ ရဲ့ ဘယ်ပွဲကိုမှ ဝင်မဆင်နွဲ နိုင်ပါဘူး\”လို့ ရခိုင်ပြည်နယ် ရမ်းဗြဲ ဒေသ က
လူငယ်တစ်ဦးက ပြောပါတယ်။
မြို့အလိုက် မှာ မူလက ဦးဆောင်ခဲ့တဲ့ သူတွေက သင်္ကြန်ရိုးရာ ရေကစားခြင်းမှာ ပါဝင်တဲ့
နံ့သာသွေးပွဲ၊ ယိမ်းအကဖျော်ဖြေပွဲ တွေကို စီစဉ်ရမှာ ဖြစ်ပြီး ဒီလိုစီစဉ်ဖို့
စစ်ကောင်စီဝန်ကြီးချုပ်က ညွှန်ကြားထားတယ်လို့ ဆိုပါတယ်။
\”မြို့မှာ အဲ့ဒီလို အစိုးရကလုပ်ခိုင်းတဲ့ ပွဲတွေကို ဦးဆောင်နေတဲ့သူတွေရှိတယ် ၊ စစ်ကောင်စီ
လက်ပါးစေတွေ ပေါ့ဗျာ သူတို့က အဲ့ဒီလိုအခိုင်းခံနေရရင်ကို ပျော်နေတာ ၊ တောင်ပိုင်း
မြောက်ပိုင်းမခွဲပဲ ရခိုင်ဆိုတာ တစ်သွေးတည်းဆိုတာကို ပြဖို့ ကျွန်တော်တို့ လို စစ်ပွဲမဖြစ်တဲ့
မြို့တွေက အလိမ္မာရှိဖို့လိုတာပေါ့ \” လို့ သံတွဲ ဒေသ လူငယ်တစ်ဦးက ပြောပါတယ်။
လက်ရှိမှာ ရခိုင်ပြည်နယ် သံတွဲမြို့မှာ သင်္ကြန်ပွဲတော် အကြို အားကစားပွဲလို
ဘောလုံးပြိုင်ပွဲတွေကို ကျင်းပမှုတွေရှိနေပြီး ဒီအပေါ်မှာ ဒေသခံ အချင်းချင်း အမြင်မတူ
မှုတွေလည်းရှိနေပါတယ်။
\”ဒါမျိုး ပျော်ပွဲ ရွှင်ပွဲတွေ လုပ်ပြီး ဘောလုံးကန်ချင်တဲ့သူကိုဘောလုံးကန်ခိုင်းမယ် ၊
မယ်ပြိုင်ချင်တဲ့ သူကို မယ်ပြိုင်ခိုင်းမယ် ၊ ကချင်တဲ့သူကို စင်ပေါ်တင်ပေးမယ် ၊ ဒါတွေက
ငါတို့က အေးအေးဆေးဆေး ပဲ နေချင်တယ်
စစ်ပွဲအကြောင်းစိတ်မဝင်စားဘူးဆိုပြီးခေါင်းရှောင်တတ်လာအောင် သင်ပေးထားတာပေါ့ ၊

လူငယ်ဆိုတာ ပျော်ချင်တယ်၊ ပူးပေါင်းဆောင်ရွက်တဲ့ Activity တွေမှာပါဝင်ချင်တယ်၊ ဒါ
သဘာ၀ ပါပဲ ၊ ဒီလူငယ်တွေရဲ့ စိတ်ပိုင်းဆိုင်ရာတွေက နိုင်ငံရေး အရွေ့တစ်ခုမှာ ဘယ်လို ရှိရမလဲ
ဆိုတာကို တော့ ကိုယ့်မြို့ကိုယ့်ရွာမှာ ဦးဆောင်နေတဲ့ သူရဲ့ နိုင်ငံရေး
ခံယူချက်တွေနဲ့လည်းဆိုင်တယ်၊ သူတို့ကိုယ်က ငါတို့က နိုင်ငံရေးစိတ်မဝင်စားဘူး ဆိုပြီး
မျက်နှာပြောင်တိုက်နေရင်တော့ မြို့သိက္ခာ ကျတာပေါ့ဗျာ ၊ အချိန်တန်လို့ စစ်မှုထမ်းရမယ်
ဆိုတဲ့အခါ နိုင်ငံရေး ဘာမှ မသိပါဘူးဆိုတဲ့ သူတွေကိုပဲ ကောက်စားသွားမှာ \” လို့ သူက
ဆက်ပြောပါတယ်။
ရခိုင်ပြည်နယ် မှာ မြို့ ရမ်းဗြဲ၊ ရသေ့တောင်၊ ကျောက်တော် ၊ ပေါက်တော၊ မြောက်ဦး ၊ မြေပုံ ၊
ပုဏ္ဏားကျွန်း ၊ တွေကို ရခိုင့်တပ်တော် AA က သိမ်းပိုက်ထားပြီး ပြည်နယ် အနှံ့ စစ်ပွဲတွေ
ပြင်းပြင်းထန်ထန်ဖြစ်နေပါတယ်။
အဲ့ဒီလို သိမ်းပိုက်ထားတဲ့ မြို့ရွာတွေကိုလည်း စစ်ကောင်စီက နေ့စဉ်လေကြောင်းက
တိုက်ခိုက်နေပြီး အရပ်သားတွေ၊ ကလေးငယ်တွေ၊ ကိုယ်ဝန်ဆောင်မိခင်တွေ
သေဆုံးနေရတာဖြစ်ပါတယ်။
စစ်ပွဲ ဖြစ်ပွားတာမရှိတဲ့ မြို့တွေကိုလည်း ကုန်းလမ်းရေလမ်းပိတ်ဆို့ထားပြီး ၊
စစ်သားစုဆောင်းတာတွေ ၊ စစ်သင်တန်းပေးတာတွေ လုပ်ပြီရခိုင်လူငယ်တွေကို
စစ်ပွဲထဲခေါ်ဆောင်ကာ တောင်ပိုင်းမြို့တွေမှာ စစ်ပွဲဖြစ်လာရင် ရခိုင့်တပ်တော် နဲ့ ထိပ်တိုက်တွေ့ ဖို့
ပြင်ဆင်နေတာလည်းဖြစ်ပါတယ်။