ရခိုင်ပြည် ဂွမြို့ဒီကနေ့ ဒီဇင်ဘာ ၂၈ ရက် ညနေပိုင်းမှာ အာရက္ခတပ်တော်က အပြီးသတ်သိမ်းပိုက်လိုက်တယ်လို့ သတင်းရရှိပါတယ်။
ဂွမြို့ မှာ နောက်ဆုံးတပ်အနေနဲ့ ခုခံနေတဲ့ ခမရ ၅၆၂ က တပ်သား ၄၀ ကျော် ကိုဖမ်းဆီးခဲ့ပြီး၊ အပြီးသတ်သိမ်းပိုက် နိုင်ခြင်းဖြစ်တယ်လို့ သတင်းရင်းမြစ်က ပြောပါတယ်။
“မြို့ထဲမှာခုခံနေတဲ့ တပ်သား ၄၀ ကျော်ဖမ်းဆီးရမိတယ်။ ကျန်တဲ့သူတွေကတော့ ရိုးဘက်ကို ထွက်ပြေးသွားတယ်၊ သူတို့တပ်တွေအားလုံး ရှင်းပြီးပြီ “ လို့ စစ်ရေးသတင်းရင်းမြစ်က လေးဝတီ FM ကို ပြောပါတယ်။
စစ်ကောင်စီဟာ ဂွမြို့ကို သုံးရက်ဆက်တိုက်လေကြောင်းက မရပ်မနားခုခံခဲ့သလို ၊ ဒီကနေ့ ညပိုင်း သိမ်းပိုက်ခံရပြီးချိန်မှာလည်း လေကြောင်းက ဆက်လက်ပစ်ခတ်နေဆဲ ဖြစ်တယ်လို့ ဆိုပါတယ်။
“လေကြောင်းက တအားပစ်နေတယ်၊ ရပ်ကွက်အချို့တော့ မီးခိုးတအူအူ နဲ့ ထွက်နေတယ်” လို့ နောက်ထပ်သတင်းရင်းမြစ်တစ်ဉီးက ပြောပါတယ်။
လက်ရှိအချိန်မှာ ဂွမြို့ပေါ်မှာ စစ်ကောင်စီတပ်သားမရှိတော့ဘဲ အာရက္ခတပ်တော်က အပြီးသတ်
စိုးမိုးလိုက်ပြီးဖြစ်တယ်လို့ ဆိုပါတယ်။
ဂွမြို့ကို ဧရာဝတီ တိုင်းက တပ်ကူအင်အား အများအပြားပို့ခဲ့ပြီး AA က ကြားဖြတ်ချေမှုန်းတဲ့ တိုက်ပွဲတွေ ဂွတောင်ကြားလမ်းတစ်လျှောက် ဆက်တိုက်ဖြစ်ပွားခဲ့ပါတယ်။
စစ်ကောင်စီဟာ ဂွမြို့ကို စစ်ကားအစီးရေ ၄၀ နဲ့ စစ်အင်အား ၅၀၀ ကျော် အပြင် တင့်ကား ဆယ်စီးကျော်ကို စစ်ကူပို့ထားပြီး ခုခံခဲ့တာဖြစ်ပါတယ်။
အဉ္စနလီညှင်း(လေးဝတီ FM)
