ပဲခူးတိုင်း ပြည်မြို့ နဝဒေးတံတားပေါ်မှာ ဇန်နဝါရီ ၂၄ ရက်နေ့ နေ့လည်ပိုင်းက ကုန်ကား အစီးရေ ၂၀ ကျော် ပေါ်တာဆွဲခံရပြီး ရခိုင်ရိုးမကို ပို့ခံရတယ်လို့ သတင်းရရှိပါတယ်။
“နဝဒေးတံတားပေါ်ကို ခါလီဖြတ်လာတဲ့ ကုန်ကားတွေ အကုန်လုံးကို ဖမ်းပြီး ၊ တစ်စီးမှာ လူ ၄၀ နဲ့ လက်နက်တွေ တင်ခိုင်းတယ်၊ ပြီးတော့ ညတွင်းချင်းမှာ မိုးထိတောင် ဘက်ကို တက်သွားရတယ်” လို့ ကုန်ကားဆရာတစ်ဦးက လေးဝတီ FM ကို ပြောပါတယ်။
ရခိုင်ပြည် တောင်ကုတ်-ပြည်လမ်းပိုင်းပေါ်မှာရှိတဲ့ မိုးထိတောင်ဗျူဟာ မှာ တိုက်ပွဲပြင်းထန်နေပြီး အဲ့ဒီတိုက်ပွဲမှာ အင်အားဖြည့်ဖို့ အတွက် စစ်ကောင်စီဟာ အရပ်သားတွေ ရဲ့ ကုန်တင်ကားတွေကို အသုံးပြုနေတာဖြစ်ပါတယ်။
“နေ့လည် ၂ နာရီလောက်ကနေ ညနေတစ်ပိုင်းလုံး ဖြတ်တဲ့ ကားတွေ ဆွဲသွားတာ ၊ ကားနဲ့ ကားဆရာတွေကို တပ်ကိုအရင်ခေါ်သွားပါတယ်။ ” လို့ မျက်မြင် သတင်းရင်းမြစ် တစ်ဦးက ပြောပါတယ်။
တောင်ကုတ် တောင်ကြားလမ်းပေါ်က မိုးထိတောင်ဗျူဟာ တိုက်ပွဲမှာ စစ်ကောင်စီဘက်က အထိနာနေပြီး လေကြောင်းက အပြင်းအထန် ပစ်ကူပေးနေရတဲ့ အခြေအနေလည်းဖြစ်ပါတယ်။
ပြည်မြို့မှာ ပြီးခဲ့တဲ့ ဒီဇင်ဘာလ ကတည်း ပြည်မြို့အတွင်း က လူငယ်တွေကို စစ်ကောင်စီက ရာနဲ့ချီပြီး ပေါ်တာဆွဲတဲ့ သတင်းတွေ ထွက်လာခဲ့ပါသေးတယ်။
ပြည်မြို့နဝဒေးတံတား အနီးဝန်းကျင် ကို နိုဝင်ဘာလ အတွင်းမှာ ပုဒ်မ ၁၄၄ ထုတ်ထားပြီး ည ရှစ်နာရီ နောက်ပိုင်းမှာ ဖြတ်သန်းခွင့် ပိတ်ထားတာဖြစ်ပါတယ်။
ဓာတ်ပုံ- အင်တာနက်
အမ်းချောင်းသူ (လေးဝတီ FM)
