ကျောက်ဖြူ က AA ထိန်းချုပ်လိုက်တဲ့ စခန်းတွေကို စစ်ကောင်စီဘက်က စက်လေထီး Paramotor အသုံးပြုပြီး အသေခံ ဗုံးကြဲတိုက်ခိုက် ဖို့ စေခိုင်းနေတယ်လို့ သတင်းရရှိပါတယ်။

‌မြေပြင်စစ်ကြောင်း က နေ ခြေလျင်အင်အား ရာနဲ့ ချီပြီးကျောက်ဖြူက AA ထိန်းချုပ်လိုက်တဲ့ စခန်းတွေကို စစ်ကြောင်းထိုးလာသလို ၊ စက်လေထီးနဲ့ အသေခံ ဗုံးကြဲမှုတွေလည်း ဆက်တိုက်ရှိလာတယ်လို့ စစ်ရေးသတင်းရင်းမြစ်ကလေးဝတီ FM ကို ပြောပါတယ်။

“မိုးမရွာရင် စက်တပ်လေထီးနဲ့ ဗုံးကြဲတယ် ။ လက်နက်ကြီးပစ်တယ်၊ ဒရုန်းနဲ့ဗုံးကြဲတယ် “ လို့ စစ်ရေးသတင်းရင်းမြစ်က ပြောပါတယ်။

အာရက္ခတပ်တော်ထိန်းချုပ်ထားတဲ့ မင်းတပ်တောင် ၊လိပ်ခမော်နဲ့ အနီးအနားပတ်၀န်းကျင်ကို နေ့စဉ် အသေခံဒရုန်း ၊ စက်တပ်လေထီး တွေ ကို အသုံးပြုပြီး ဗုံးကြဲနေတယ်လို့ ဆိုပါတယ်။

ကျောက်ဖြူ ဓညဝတီ ရေတပ်ဌာနချုပ် ၊ OGT စက်ရုံဝန်းမှာအခြေစိုက်ထားတဲ့ ဒရုန်းနဲ့ အမြှောက်တပ် ၊ ၃၂ ရဲတပ်ရင်း တို့ကနေ အဲ့ဒီ စက်လေထီး ၊ အသေခံဒရုန်း တွေကို အဆက်မပြတ် ပစ်ခတ်နေတာဖြစ်တယ်လို့ ဆိုပါတယ်။ ဒါအပြင် ခြေလျှင်စစ်ကြောင်းတွေကိုလည်း အင်အားဖြည့်ထားပြီး မြေပြင်တန်ပြန်စစ်ကြောင်းထိုးမှုတွေကိုလည်း ပြန်လည်ပြုလုပ်တာတယ်လို့ ဆိုပါတယ်။

” ခြေလျင်စစ်ကြောင်းတွေက နေ့တိုင်း ခမရ ၅၄၃ ဘက်က နေလာတယ်၊ ပြိုင်းစေ့ကေ၊ မလကျွန်း ၊နမ်းဖဲတောင်ဖက်တွေ ကို စစ်ကြောင်းထိုးနေတယ် “ လို့ စစ်ရေးသတင်းရင်းမြစ်က ပြောပါတယ်။

စစ်ကောင်စီဟာ ပတ်လည်ဝန်းရံခံထားရတဲ့ စီမံကိန်း ဧရိယာ တွေ ၊ တပ်ဧရိယာတွေက နေ ထိုးစစ်ဆင်နေပေမယ့် ကျောက်ဖြူမှာ ရှိတဲ့ နယ်မြေ အများစုကို အာရက္ခတပ်တော်က သိမ်းပိုက်ထားပြီးဖြစ်ပါတယ်။

အဉ္စနလီညှင်း လေး၀တီFM