ရခိုင်ပြည် အမ်းမြို့နယ်နဲ့ တောင်ကုတ်မြို့နယ် တို့ က ပြင်းထန်တဲ့ တိုက်ပွဲတွေကြောင့် ဒေသခံတွေဟာ အမ်းရိုးမ ကို ခြေလျှင်ကျော်ဖြတ်ပြီး စစ်ရှောင်နေကြရတယ် လို့ သတင်းရရှိပါတယ်။
ရခိုင်ရိုးမတောကို ဖြတ်သန်းဖောက်လုပ်ထားတဲ့ အမ်းတောင်ကြားလမ်း ရဲ့ ခြေလျှင်လမ်းပိုင်းတွေက ဖြတ်သန်းထွက်ခွာကြရပြီး ၆ ရက် ၇ ရက်အထိ ခြေလျှင် လျှောက်ပြီး စစ်ရှောင်ကြရတာ ဖြစ်တယ်လို့ ဆိုပါတယ်။
“ခရီးက ခြောက်ရက်လောက်ကြာဖို့ ၊ တောထဲမှာ အဆင်ပြေတာစားသောက်ကြရမှာပေါ့ ။ကိုယ့်နီးစပ်ရာ လူတွေ စုပြီး ထွက်ကြရတယ်” လို့ ဒေသအခြေအနေ ကို သိရှိသူက ပြောပါတယ်။
အမ်းရိုးမဟာ ရှည်လျားမတ်စောက်တဲ့ ရိုးမတောကြီးဖြစ်ပြီး ရခိုင်ပြည်နယ်နဲ့ပဲခူးတိုင်းကို ကာရံထားတဲ့ တောင်စွယ်တွေကို တစ်ထပ်ပြီး တစ်ထပ် ကျော်ဖြတ်ရမှာလည်းဖြစ်ပါတယ်။
အမ်းမြို့နယ်နဲ့ တောင်ကုတ်မြို့နယ်တို့ဟာ မြို့နယ်ချင်းထိစပ်နေပြီး တိုက်ပွဲဧရိယာ နှစ်ခုလုံးဟာ နေရာမလပ် တိုက်ပွဲဧရိယာထဲ ကျရောက်နေတာဖြစ်ပါတယ်။
အမ်းမြို့နယ်မှာ အနောက်ပိုင်းတိုင်းစစ်ဌာနချုပ် အတွင်းပိုင်းထိ တိုက်ပွဲပြင်းထန်နေသလို ၊ တောင်ကုတ်မြို့တွင်း အထိ မြို့သိမ်းတိုက်ပွဲတွေ ပြင်းထန်နေတာဖြစ်ပါတယ်။
Lemon ရေးသည်။
