ရခိုင်ပြည်၊ ကျောက်ဖြူမြို့နယ် ထဲ မှာရှိတဲ့ တရုတ် သဘာဝ ဓာတ်ငွေ့ သန့်စင် စက်ရုံ (OGT) ကို အကာအကွယ် ယူပြီး စစ်ကောင်စီဘက်က စစ်အင်အား ၄၀၀ ကျော် ထပ်မံဖြည့်တင်းလိုက်ပါတယ်။
OGT လို့ အတိုကောက်ခေါ်တဲ့ ရွှေသဘာဝဓာတ်ငွေ့ သန့်စင် သိုလှောင် ပို့ဆောင် စက်ရုံကို အကာအကွယ်ယူပြီး အဲ့ဒီအနီးမှာ ရေတပ်နဲ့ ကြည်းတပ် ၊ အင်အားပေါင်း ၄၀၀ ကျော် ကို မေလ ၂၂ ရက် နေ့ က ထပ်ဖြည့်လိုက်တယ်လို့ သိရပါတယ်။
” သူတို့နေရာယူထားတာက တရုတ်စက်ရုံနဲ့ဧရိယာတွေထဲမှာ ၊ အဲ့ဒီစက်ရုံတွေကို အကာအကွယ်ယူပြီး ကာကင်းတွေ ဆောက်နေတယ်။ အင်အားအသစ်တွေဖြည့်တယ်။ အင်အားကတော်တော်များတယ်။မနေ့က ညကဖြည့်တာ ” လို့ ကျောက်ဖြူ စစ်ရေးသတင်းရင်းမြစ်တစ်ဦး က ပြောပါတယ်။
ကျောက်ဖြူအခြေစိုက် ဓညဝတီ ရေတပ်စခန်းက ရေတပ်အင်အား ၁၀၀ ကျော် ၊ ခမရ(၅၄၂)၊ခမရ(၅၄၃)မှ ထုတ်နုတ်အင်အား (၃၀၀) ကို အင်အားထပ်ဖြည့်ပြီး ပတ်ဝန်းကျင်ကို ထပ်မံထိုးစစ်ဆင်နေတယ်လို့ ဆိုပါတယ်။
“ရေကြောင်းနဲ့ လေကြောင်းကို ကောင်းကောင်းသုံးလို့ရနေတဲ့ အတွက် သူတို့ အင်အားတွေကိုလိုသလောက်ဖြည့်လို့ ရနေတာပါ ၊ သူတို့က ကုန်တင် သဘေ်ာတွေကို အသုံးပြုပြီး စစ်သားတွေ ခဏခဏ ဝင်ပါတယ်။ “ လို့ ဒေသတွင်း သတင်းရင်းမြစ်တစ်ဦးက ပြောပါတယ်။
စစ်ကောင်စီဟာ လက်ရှိမှာ အာရက္ခတပ်တော်သိမ်းပိုက်ထိန်းချုပ်ထားတဲ့နေရာတွေကို နေဗီ၊ ဒရုန်း နဲ့ ဂျက်ဖိုက်တာတွေနဲ့ပါ ပစ်ကူနေတယ်လို့ သိရပါတယ်။ မေလ ၁၉ ရက် က ကျောက်ဖြူမြို့ မင်းတပ်တောင် နဲ့ စက်မှုလက်မှု သင်တန်းကျောင်းကို အာရက္ခတပ်တော်ဘက်က သိမ်းပိုက်ထားပါတယ်။
အဉ္စနလီညှင်း လေးဝတီFM
