ကျောက်ဖြူမြို့နယ် စစ်မျက်နှာမှာ စစ်ကောင်စီဘက်က အင်အား ၁၀၀၀ ကျော်အသုံးပြုကာ စစ်မျက်နှာ သုံးခုဖွင့်ပြီး အာရက္ခတပ်တော် ထိမ်းချုပ်ထားတဲ့ စခန်းတွေကို ထိုးစစ်ဆင်နေတယ်လို့ ဒီကနေ့ သတင်းရရှိပါတယ်။

ကျောက်ဖြူမြို့နယ် ကပ်သပြေကျေးရွာ ၊ ပြိုင်းစေ့ကေ နဲ့ မလကျွန်းဘက်ကို စစ်ကောင်စီ ဘက်က စစ်ကြောင်းတစ်ခုမှာ အင်အား ၄၀၀ ကျော်အသုံးပြုပြီး တန်ပြန်ထိုးစစ်ဆင်လာ တယ် လို့ စစ်ရေးသတင်းရင်းမြစ်တွေကပြောပါတယ်။

“သူတို့ ဘက်က ကပ်သပြေ၊ မလကျွန်း ၊ ပြိုင်းစေ့ကေ ရွာတွေမှာ တပ်စွဲထားတုန်း ရှိပါတယ်၊ အင်အားက တစ်နေရာမှာ ၄၀၀ လောက် ရှိပါတယ် တိုက်ပွဲလည်းပြင်းနေတယ်” လို့ စစ်ရေးသတင်းရင်းမြစ်က ပြောပါတယ်။

စစ်ကောင်စီ ရဲ့ အဓိက ခံစစ်နေရာတွေ ဖြစ်တဲ့ ရဲတပ်ရင်း ၃၂ ၊ OGT တရုတ်စီးမံကိန်းနဲ့ သစ်ပုတ်တောင်ရေတပ် ဌာနချုပ်ကို ကာကွယ်ဖို့ ရှေးတန်းစစ်မျက်နှာတွေ ထပ်တိုးလိုက်တာလို့ ဆိုပါတယ်။

လေးဝတီ FM ရဲ့ စုံစမ်းသိရှိမှုအရ ဇွန် လ ၂၁ ရက်နေ့ မှာ ကျောက်ဖြူမြို့နယ်ထဲက နေရာသုံးခုမှာ စစ်ကောင်စီ စစ်ကြောင်းသုံးခုနဲ့ ဆက်လိုက်တိုက်ပွဲပြင်းထန်နေဆဲ ဖြစ်ပါတယ်။

“ရေလမ်းကြောင်းက ပွင့်နေတယ်။ သူတို့ အင်အားတွေ ကြိုက်သလောက်ပို့လို့ရနေတုန်းပဲ ၊ ဒါကြောင်း စစ်ကြောင်းတစ်ခုပြီး တစ်ခု ထိုးနေတာ ပြီးတော့ နေဗီ ဘက်က လက်နက်ကြီးကတော့ မိနစ်ပိုင်းပဲ ခြားပြီး တောက်ရှောက်ပစ်နေတယ်” လို့ ရှေ့တန်းစစ်ရေးသတင်းရင်းမြစ်က ပြောပါတယ်။

ရှေ့တန်းစစ်မျက်နှာမှာ ပြည်သူ့စစ်များအသုံးပြုထားပြီး စစ်ကောင်စီ ဟာ အသေခံ အင်အား ရာချီနဲ့ ဆက်လက် စစ်ကြောင်းထိုးနေတယ်လို့ ဆိုပါတယ်။ ကျောက်ဖြူ တိုက်ပွဲတွေဟာ ဇွန်လ အစပိုင်းကတည်းက အရှိန်အမြင့်ဆုံးကိုရောက်လာပြီး စစ်ကောင်စီ ရဲ့ ဗိုလ်မှူး ၊ ဒုဗိုလ်မှူး နဲ့ စစ်ကြောင်းမှုးတွေ သေဆုံး ၊ အလင်းဝင်မှုတွေလည်းရှိနေပါတယ်။

အဉ္စနလီညှင်း ၊ လေး၀တီFM