သံတွဲမြို့နယ်၊ ငပလီကမ်းခြေ နဲ့ မျက်နှာချင်းဆိုင်မှာ အထိုင်ချထားတဲ့ စစ်ကောင်စီ ရေတပ်သင်္ဘောတွေဟာ ကမ်းခြေကို ထိုးစစ်ဆင်တဲ့
အသွင်တိုက်ခိုက်လာတဲ့ အတွက် ကမ်းရိုးတန်းနေပြည်သူများ စစ်ရေးသတိရှိကြဖို့ အောက်တိုဘာ ၁၀ ရက်မှာ အာရက္ခတပ်တော်ဘက်က ထုတ်ပြန်လိုက်ပါတယ်။
စစ်ကောင်စီရေတပ် နဲ့ လေတပ်ဟာ စက်တင်ဘာလ နဲ့ အောက်တိုဘာလတွေ မှာ ရေကြောင်းနဲ့ လေကြောင်းကနေ
အခုလိုပြန်လည် တိုက်ခိုက်လာတာဖြစ်ပါတယ်။
“လေယာဉ်ကတော့ နေ့တိုင်းနီးပါးဝဲနေတယ်၊ ရေတပ်ကလည်း ပစ်တယ်။ မောင်ရွှေလေး နဲ့ မော်ရုံဘက်ကို လက်နက်ကြီးတွေကျတယ် ပင်လယ်ဘက်နဲ့ နီးတဲ့ တောင်တွေ ကိုလည်းကျတယ် ” လို့ သံတွဲဒေသခံ တစ်ဦးက ပြောပါတယ်။
အာရက္ခတပ်တော်ဘက်က ထုတ်ပြန်ထားချက်အရ သံတွဲမြို့နယ်နဲ့ ဂွမြို့နယ် အနီးက မီတာ ၁၀၀၀၀ အနီးဝန်းကျင်ကရေပြင်မှာ စစ်ကောင်စီ စစ်သင်္ဘောတွေကျောက်ချထားပြီး ဒေသတွင်းက ရေပြင်လုံခြုံရေးကို ခြိမ်းခြောက်နေတဲ့အခြေအနေ ဖြစ်နေပါတယ်။
“သံတွဲက ပြည်သူ့စစ်ခေါင်းဆောင်က သူ့လူတွေဆီက ရတဲ့ သံတွဲက ပစ်မှတ်နေရာတွေကို ရေတပ်ကို ပေးတယ် ” လို့ သံတွဲမြို့ က စစ်ဘေးရှောင်လာသူ တစ်ဦးက လေးဝတီ FM ကို ပြောပါတယ်။
ULA/AA ဘက်က ထုတ်ပြန်ချက်မှာ စစ်ကောင်စီနေဗီတွေဟာ “အာရက္ခတပ်တော် ထိန်းချုပ်ထားရာနေရာများထဲမှ အချို့သော နေရာများအား ထိုးစစ်ဆင်တိုက်ခိုက်မှုမျိုး ဆက်လက်ပြုလုပ်ရန် ပြင်ဆင်လျက်ရှိသည်” လို့ ထည့်သွင်းထုတ်ပြန်ထားပါတယ်။
ရခိုင်ပြည်ရဲ့ ပထဝီအနေအထား ဖွဲ့စည်းတည်ရှိပုံဟာ ကမ်းရိုးတန်းမြို့တွေ ဖြစ်နေပြီး ရေကြောင်းက နေ မြို့တိုင်းကို ချဉ်းကပ်နိုင်တဲ့ အခြေအနေ ဖြစ်ပါတယ်။
ရေတပ်သဘေ်ာတွေရဲ့ စစ်ရေးခြိမ်းခြောက်မှုတွေကြောင့် ဒေသခံ လူထုဟာ ပင်လယ်ပြင်အနီးက ကျေးရွာတွေမှာ နေထိုင်ဖို့ ခက်ခဲနေဆဲဖြစ်ပါတယ်။
ရေကြောင်း လေကြောင်းတိုက်ခိုက်မှုတွေဟာ လူနေထူထပ်တဲ့ အရပ်သားပြည်သူများနေထိုင်ရာနေရာများ၊ စာသင်ကျောင်းများ၊ ဆေးရုံ ဆေးခန်းတွေနဲ့ သာသနိက အဆောက်အအုံတွေကို ရည်ရွယ်ချက်ရှိရှိ ဦးတည်ပစ်မှတ်ထားတိုက်ခိုက်နေတယ်လို့လည်း ထုတ်ပြန်ချက်က ဆိုပါတယ်။
လေးဝတီ FM
