အကြမ်းဖက်စစ်ကောင်စီက ရခိုင်ပြည်နယ်တွင် လူမျိုးရေး ပဋိပက္ခ အရှိန်မြင့်တက်လာအောင်
ယုတ်မာကောက်ကျစ်သည့် အကြံဆိုးဖြင့် လုပ်ဆောင်နေကြောင်းကို
အမျိုးသားညီညွတ်ရေးအစိုးရ NUG က ယနေ့တွင် ထုတ်ပြန်ခဲ့ပါတယ်။
\”အကြမ်းဖက်စစ်အုပ်စုက လူမျိုးရေးပဋိပက္ခ ဖြစ်စေရန် ရည်ရွယ်ပြီး ရခိုင်ပြည်နယ်အတွင်း
နေထိုင်ကြသည့် ရိုဟင်ဂျာများအား (တရားမဝင်အဓမ္မ) စစ်သားအဖြစ် စုဆောင်းခဲ့ပြီး
စစ်သင်တန်းများ ပို့ချကာ လက်နက်များ တပ်ဆင်ပေးလျက်ရှိနေတယ်\” လို့ ဆိုပါတယ်။
အလားတူ အကြမ်းဖက်စစ်တပ်အား တော်လှန်တိုက်ပွဲဝင်နေတဲ့ အာရက္ခတပ်တော်အား
ရိုဟင်ဂျာများက ဆန့်ကျင်နေကြောင်း ထင်မှတ်မှားစေသည့် ဖိအားပေးစေခိုင်းမှုများနှင့်အတူ
အတုအယောင် ဆန္ဒပြပွဲများ ကျင်းပစေကာ လူမျိုးရေး ပဋိပက္ခ အရှိန်မြင့်တက်လာအောင်
အကြံဆိုးဖြင့် ဆောင်ရွက်မှုများ ပြုလုပ်ခဲ့သည်ကို တွေ့ရှိရပါတယ်လို့ ပါရှိပါတယ်။
ထို့အပြင် ဘူးသီးတောင်မြို့အတွင်း အကြမ်းဖက်စစ်တပ်က ဦးဆောင်ကာ
အရပ်သားပြည်သူများ၏ နေအိမ်အဆောက်အအုံများ နိုင်ငံတကာ
လူသားချင်းစာနာထောက်ထားမှု အကူအညီပေးရေး အဖွဲ့အစည်းများ၏
ရုံအဆောက်အအုံများကို မီးရှို့ခြင်း၊ ဖြိုချခြင်းနှင့် အကြမ်းဖက်မှုများကို ပေါ်ပေါ်ထင်ထင်
လုပ်ဆောင်နေတယ်လို့ ပါရှိပါတယ်။
ရခိုင်ပြည်နယ်အတွင်းမှ ပြည်သူများ၏ ငြိမ်းချမ်းစွာ အတူယှဉ်တွဲ နေထိုင်နေမှုကို
ဖျက်လိုဖျက်ဆီး ပြုလုပ်နေကြသည့် အဖျက်အမှောင့်လုပ်ရပ်များကို ပြင်းထန်စွာ ရှုတ်ချ
ကြောင်းနှင့် ရခိုင်ပြည်နယ် အတွင်းနေ ပြည်သူများအနေဖြင့် အကြမ်းဖက်စစ်တပ်၏ လူမျိုး ရေး၊
ဘာသာရေး ပဋိပက္ခဖြစ်စေရန် ပြုလုပ်နေသည့် နိုင်ငံရေးလှည့်ကွက်များအား လူမျိုးစု
အချင်းချင်းကြား ယုံကြည်မှု၊ အပြန်အလှန် လေးစားမှု၊ နားလည်သည်းခံမှုတို့ဖြင့် သတိထား
ကျော်ဖြတ်ကြရန် အမျိုးသားညီညွတ်ရေး အစိုးရအနေဖြင့် အထူးအလေးအနက်ထား
မေတ္တာရပ်ခံ ပန်ကြားလိုကြောင်း အမျိုးသားညီညွတ်ရေးအစိုးရမှ ထုတ်ပြန်ထားပါတယ်။
စစ်ကောင်စီက ရခိုင်တွင် လူမျိုးရေးပဋိပက္ခ ဖြစ်စေရန် လုပ်ဆောင်နေကြောင်း NUG ထုတ်ပြန်
