စစ်ကောင်စီရဲ့ ရွေးကောက်ပွဲကျင်းပဖို့ သိပ်မလိုတဲ့ အချိန်မှာ ကြံ့ခိုင်ရေးပါတီရဲ့ ကိိုယ်စားလှယ်လောင်းတစ်ဦးက ရခိုင်အနုပညာရှင်တွေကို အသုံးပြုပြီး ငွေကြေးစိုက်ထုတ်ကာ ရုပ်ရှင်ဇာတ်လမ်းတစ်ပုဒ် ဖန်တီးရိုက်ကူးနေပါတယ်။

ထုတ်လုပ်သူ ဦးနေမင်းထွန်းဟာ ရခိုင်အမျိုးသားတစ်ဦးဖြစ်ပြီး ကြံ့ခိုင်ရေးပါတီရဲ့ ကိုယ်စားလှယ်လောင်းအဖြစ် လာမယ့်ရွေးကောက်ပွဲမှာ ရန်ကုန်တိုင်း ရခိုင်တိုင်းရင်းသားရေးရာဝန်ကြီးနေရာ ကို ဝင်ပြိုင်မယ့်သူဖြစ်ပါတယ်။

ဆောက်လုပ်ရေးလုပ်ငန်းရှင် ဖြစ်တဲ့ သူ့အနေနဲ့ ရုပ်ရှင်ဇာတ်လမ်း တစ်ပုဒ်အတွက် ပထမဆုံးအကြိမ် ငွေကြေးသုံးစွဲခြင်းဖြစ်တယ် လို့လည်း ဝန်ခံထားပါတယ်။

ဒီဇာတ်လမ်း ကို ပြီးခဲ့တဲ့လက မိတ်ဆက်ခဲ့ပြီး မိတ်ဆက်ပွဲမှာ ရခိုင်က လူသိများတဲ့ အနုပညာရှင်များ ၊ Food Vloger ၊ Tit Tok Cele တွေကို ဖိတ်ကြားပြီး ရခိုင်လူထုဆီ ပြန်လည်မျှဝေစေခဲ့ပါတယ်။

ရုပ်ရှင်ဇာတ်လမ်းရဲ့ နာမည်က “ရင်ခုန်သံအရင်းနှီးဆုံး” လို့ ပေးထားပြီး ဇာတ်လမ်းတစ်ပုဒ်လုံးမှာ ရခိုင်လူမျိုးအနုပညာရှင်တွေက ရခိုင်စကားနဲ့ ပြောဆို သရုပ်ဆောင်ကြမှာဖြစ်ပါတယ်။

“ဇာတ်လမ်း က ရခိုင်ဒေသိယ စကားအကုန်ပါတယ်၊ ရခိုင်ပြည်ပြင်ပရောက်နေတဲ့ လူငယ်တစ်ယောက်အကြောင်း ရိုက်ထားတာဖြစ်တယ် ။

အဓိက မက်ဆေ့ကတော့ လူငယ်တွေဟာ ကျိုးစားရင်ဘာမဆိုဖြစ်တယ် ဆိုတာ ပြောချင်တာဖြစ်ပါတယ် ” လို့ သတင်းမီဒီယာတွေကို ဖြေဆိုထားပါတယ်။

ဒီဇာတ်လမ်းကို ရခိုင်အနုပညာရှင်တွေဖြစ်တဲ့ ဒါရိုက်တာ ဘုန်းလျှံ၊ ထုတ်လုပ်မှုဒါရိုက်တာ ထက်ကြီးနဲ့ ဇာတ်လမ်း၊ ဇာတ်ညွှန်းကို ဖြိုးသဉ္စာကျော် တို့ က တာဝန်ယူထားပါတယ်။

မင်းသား ၊ မင်းသမီးတွေ အနေနဲ့ ထက်မြက်၊ စိုးဝင်းအောင်၊ မီကိုခန့်၊ ဂျူးထက်ထက်အောင်၊ သန္တာစိုး၊ ကံ့ကော်ပြည့်စုံတို့က သရုပ်ဆောင်ကြမှာဖြစ်ပါတယ်။

လေးဝတီ FM