ရခိုင်ပြည် ၊ စစ်တွေမြို့ ဒကစ တပ်နယ် ထဲက ကျားမသောက် စစ်ဆေးရေး ဂိတ်ကို ဒီဇင်ဘာ ၂၇ ရက်မနက် ပိုင်းက
အာရက္ခတပ်တော်က လက်နက်ကြီးနဲ့ စတင်ပစ်ခတ်ခဲ့ပြီး အဲ့ဒီအနီးဝန်းကျင်မှာ တိုက်ပွဲတွေ ဖြစ်ပွားနေတယ်လို့ သတင်းရရှိပါတယ်။
စစ်တွေ ဒေသစစ်ဆင်ရေး ကွက်ကဲမှုဌာနချုပ် (ဒကစ) လက်အောက်မှာရှိတဲ့ တပ်နယ် ကျေးရွာတွေဖြစ်တဲ့ ကျောက်တန်းကြီး၊ ကျားမသောက် ၊ ကျောက်တန်းချေ ကျေးရွာတွေမှာ နှစ်ဖက်တိုက်ပွဲတွေ စတင်တိုက်ပွဲဖြစ်ပွားနေတာဖြစ်ပါတယ်။
“ရန်ကုန်-စစ်တွေ ကားလမ်းပေါ် က ကျားမသောက် စစ်ဆေးရေးဂိတ်ကိုမနေ့က လက်နက်ကြီး နဲ့ ပစ်တယ် ၊ ဒီနေ့တော့ လက်နက်ငယ်နဲ့ အပြန်အလှန်တိုက်ပွဲဖြစ်ကြလို့ ရွာသားတွေ ထွက်ပြေးသွားကြပါတယ်” လို့ သတင်းရင်းမြစ်က လေးဝတီ FM ကို ပြောပါတယ်။
နှစ်ဖက် လက်နက်ကြီးလက်နက်ငယ် ပစ်ခတ်မှုတွေကြောင့် ကျောက်တန်းကြီး ၊ ကျောက်တန်းငယ်ကျေး ၊ ကျားမသောက်ကျေးရွာ တွေမှာ နေအိမ်တချို့ ထိခိုက်ပျက်စီးခဲ့တယ်လို့ သတင်းရရှိပါတယ်။
အဲ့ဒီစစ်ဆေးရေး ဂိတ်မှာ စစ်ကောင်စီ၊ ရဲ ၊ လဝက စတဲ့ အဖွဲ့ပေါင်းစုံတို့ နေရာယူထားပြီး လက်နက်ကြီး အထိုင်လည်းချထားတယ်လို့ ဆိုပါတယ်။
“အဲ့ဒီဂိတ်တွေမှာ ပြီးခဲ့တဲ့ လကတည်းက ရန်ကုန်က သဘေ်ာနဲ့ ပို့ထားတဲ့ တပ်သားတွေလည်း နေရာယူထားတယ်” လို့ ဒေသခံ သတင်းရင်းမြစ်က ပြောပါတယ်။
ဒီဇင်ဘာ ၂၀ ရက်ရက်နောက်ပိုင်းက စတင်ပြီး စစ်တွေမြို့မှာ နှစ်ဖက် စစ်ရေးတင်းမာမှုတွေ စတင်လာတာဖြစ်ပြီး ရေတပ် လက်နက်ကြီးတွေနဲ့ နေ့စဉ် ပစ်ခတ်နေတယ်လို့ ဆိုပါတယ်။
အာရက္ခတပ်တော် ပုဏ္ဏားကျွန်း၊ ပေါက်တော ၊ ရသေ့တောင် မြို့တို့ကို သိမ်းပိုက်ပြီးနောက်မှာ စစ်တွေမြို့ကို ကုန်းတွင်း ဘက်က ဝန်းရံပိတ်ဆို့ ထားပြီးဖြစ်ပါတယ်။
အဉ္စနလီညှင်း( လေးဝတီFM )ရေးသည်။
