စစ်ခေါင်းဆောင်မင်းလှိုင် နဲ့ ဒုတိယစစ်ခေါင်းဆောင် ဗိုလ်ချုပ်မောင်အေး ရဲ့ မိသားစုတွေ ပိုင်ဆိုင်တဲ့ ငပလီက ဟိုတယ်တွေ နဲ့ မြန်မာအစိုးရ နဲ့ ခေတ်အဆက်ဆက် လက်ဝါးချင်းရိုက်ခဲ့တဲ့ ခရိုနီတွေ ပိုင်ဆိုင်တဲ့ ကြယ်ငါးပွင့်အဆင့် ဟိုတယ်တွေကို ULA က ချိိတ်ပိတ်သိမ်းဆည်းလိုက်ပြီဖြစ်တယ်လို့ သိရပါတယ်။
ငပလီကမ်းခြေ ဟိုတယ်ဇုံ ကို ၂၀၂၄ ဇူလိုင်လ ကတည်းက သိမ်းပိုက်ခဲ့ပြီး ရှစ်လတာ ကာလ လွန်မြောက်ပြီးနောက်မှာ တချို့ဟိုတယ် တွေကို
အာရက္ခပြည်သူ့ အစိုးရ ပိုင်အဖြစ် တရားဝင်သိမ်းပိုက်လိုက်ပြီဖြစ်ကြောင်း ULA နဲ့ နီးစပ်တဲ့ အသိုင်းအဝိုင်းက သိရပါတယ်။
“ငပလီမှာ ရှိတဲ့ စစ်အစိုးရပိုင် ဟိုတယ်တွေ၊ ခရိုနီတွေရဲ့ ဟိုတယ်တွေက တော့ အာရက္ခအစိုးရပိုင်အဖြစ် သိမ်းထားပြီးဖြစ်ပါတယ်၊ တချို့ကို တရားဝင်စာကပ်လိုက်တယ်၊ တချို့နိုင်ငံခြားသားပိုင်လုပ်ငန်းတွေက တော့ စကားပြောဖို့ စောင့်နေတယ် ” လို့ ULA နဲ့ နီးစပ်သူ တစ်ဦးက ပြောပါတယ်။
အာရက္ခပြည်သူ့ အစိုးရပိုင် အဆောက်အဦးတွေ အဖြစ် တရားဝင် စာကပ် ချိတ်ပိတ် လိုက်တဲ့ အထဲမှာ
(၁) စစ်ခေါင်းဆောင် ဗိုလ်မှူးချုပ်မင်းအောင်လှိုင် ရဲ့ သားဖြစ်သူ အောင်ပြည့်စုံပိုင်ဆိုင်တဲ့ Amata ဟိုတယ်၊
(၂) မင်းအောင်လှိုင်မိသားစုနဲ့ နီးစပ်တဲ့ ဦးအောင်မျိုးမင်းဒင်ပိုင်ဆိုင်တဲ့ Amazing (အမေးဇင်း) ဟိုတယ် ၊
(၃) ဒုတိယစစ်ခေါင်းဆောင် ဗိုလ်ချုပ်မောင်အေး၏ သမီး ဒေါ်န္ဒာအေးပိုင်ဆိုင်တဲ့ Pristine Mermaid Ngapali၊
(၄) ဗိုလ်မှူးချုပ်သန်းရွှေ ၏ သားဖြစ်သူ ထွန်းနိုင်ရွှေပိုင်တဲ့ Thande Hotel ဟိုတယ်၊
(၅) ဦးချစ်ခိုင် ဦးဆောင်တဲ့ ဧဒင်အုပ်စု က ဧဒင်ဟိုတယ်၊
(၆) ကမ္ဘောဇ အုပ်စုပိုင်ဆိုင်သည့် Jasmine ၊
(၇) ဦးတေဇ ၏ ထူး ကုပ္မဏီ အုပ်စုပိုင် Aureum Palace ဟိုတယ်၊
(၈) ပအိုဝ့် ပြည်သူ့စစ်ခေါင်းဆောင် ခရိုနီ ဦးနေဝင်းထွန်း ပိုင် ပတ္တမြားနဂါးကုမ္ပဏီ (Ruby Dragon) ပိုင်ဆိုင်တဲ့ Jade Marina Hotel တို့ ကို ULA က အစိုးရ ပိုင်အဖြစ် သိမ်းပိုက်လိုက်ခြင်းဖြစ်တယ်လို့ သိရပါတယ်။
“အရင်စစ်အစိုးရ ရဲ့ ရခိုင်ပြည်နယ် ဝန်ကြီးတွေ ရဲ့ မြို့ပေါ်မှာရှိတဲ့ ပိုင်ဆိုင်မှုတွေလည်း ချိတ်ပိတ်လိုက်ပါတယ် ၊ ချိတ်ပိတ်လိုက်တဲ့ အိမ်တွေမှာ စာကပ်ထားပါတယ်။” လို့ သံတွဲဒေသခံတစ်ဦးက ဆိုပါတယ်။
သံတွဲမြို့ က မြို့ခံ ခရိုနီတွေပိုင်ဆိုင်တဲ့ လုပ်ငန်းအသေးစားတွေကိုလည်း ULA က ချိတ်ပိတ်သိမ်းဆည်းခဲ့တယ်လို့ ဆိုပါတယ်။
လေးဝတီ FM ရဲ့ စုံစမ်းရရှိထားတဲ့ သတင်းအချက်အလက်ရ သံတွဲမြို့ပေါ်နဲ့ ငပလီကမ်းခြေ စုစုပေါင်း အဆောက်အအုံ ၁၀၀ ကျော် ချိတ်ပိတ်ခံရပြီး အများဆုံးထိမ်းသိမ်းခံရတဲ့ မြို့ လည်းဖြစ်ပါတယ်။
မောင်တော၊ အမ်း ၊ တောင်ကုတ် ၊ သံတွဲ မြို့တွေက စစ်အုပ်စုနဲ့ နီးစပ်သူများ ခရိုနီများ ရဲ့ နေအိမ် ပိုင်ဆိုင်မှုတွေကို အာရက္ခပြည်သူ့ အစိုးရ ULA ကချိတ်ပိတ်ခြင်းနဲ့ ပတ်သက်ပြီး တရားဝင် ထုတ်ပြန်ထားတာတော့ မရှိသေးပါ ဘူး ။
ငြိမ်းချမ်းစေ ၊ လေးဝတီ FM
