အိမ်နီးချင်းနိုင်ငံတွေကို ရွှေ့ပြောင်းအလုပ်လုပ်ဖို့ သွားရတဲ့ ရွှေ့ပြောင်းအလုပ်သမားတွေဟာ ပွဲစားတွေကို ငွေပုံပေးပြီး သွားရသလိုမျိုး

အခုရခိုင်ကိုပြန်ချင်တဲ့ လူတွေဟာလည်း ပွဲစားတွေကို ငွေပုံပေးပြီး အိမ်ပြန်ဖို့ ကြိုးစားနေကြပါတယ်။

ထိုင်း ၊ မလေးရှား အပါအဝင် မြန်မာပြည်အနှံ့ဒေသအသီးသီးမှာ ရွှေ့ပြောင်းအလုပ်လုပ်ကိုင်သူတွေဟာ အိမ်ပြန်ဖို့ ဆန္ဒပြင်းပြလာကြပါတယ်။

စစ်ကော်မရှင်လက်အောက်ကနေ လွတ်လပ်နေတဲ့ ရခိုင်ပြည်ရဲ့မြေကိုနင်းဖို့ စစ်ကော်မရှင်နဲ့ ပတ်သက်တဲ့ လမ်းကြောင်းတွေကနေ ဝင်ရောက်လာကြရတာပါ။

မှတ်ပုံတင်အမှတ် ၁၁/ ကိုင်ဆောင်ထားသူတွေဟာ ကိုယ်တိုင် လေယာဉ်လက်မှတ်ဖြတ်ရင် လေဆိပ်မှာ စစ်ဆေးခံရတာတွေ ဖမ်းဆီးခံရတာတွေကြောင့် စစ်ကော်မရှင် အရာရှိတွေ ကို ပိုင်ပါတယ် ဆိုတဲ့ ပွဲစားတွေကို ဆက်သွယ်ကြရပါတယ်။

အခုဆိုရင် ရခိုင်ကိုပြန်ပို့မယ့် လူပွဲစားဈေးကွက်တစ်ခုဟာ ဒီနှစ် ဇူလိုင်လလောက်ကတည်းက Facebook နဲ့ Tit Tok စာမျက်နှာတွေပေါ်မှာ တွင်တွင်ကျယ်ကျယ်ဖြစ်လာတာကိုတွေ့ရပါတယ်။

“ကျွန်မတို့က တာဝန်ယူမှု ၊ တာဝန်ခံမှုရှိတယ်။ အပေါ်လမ်းကပို့တာ ” လို့ ရခိုင်သံ ဝဲဝဲ နဲ့ အမျိုးသမီးတစ်ဦးက သူ့ရဲ့ Tit Tok အကောင့်ကနေ လူခေါ်ကြေငြာတွေရိုက်တင်ထားပါတယ်။

လူပွဲစားအလုပ်ကိုလုပ်တဲ့ အကောင့်တွေကို လေ့လာကြည့်တဲ့အခါမှာ သူတို့ ဟာ ရန်ကုန် ၊ ထိုင်း ၊ မလေးရှားမှာ အခြေစိုက်တဲ့ ရခိုင်တွေဖြစ်နေတာကိုတွေ့ရပါတယ်။

Tit Tok ပေါ်မှာ လှုပ်ရှားနေတဲ့ ပွဲစားအကောင့် အရေအတွက်ဟာ ၁၅ ခုကနေ ၂၀ ခု အထိရှိပြီး အားလုံးဟာ ရခိုင်အမျိုးသား ၊ အမျိုးသမီးတွေဖြစ်ပါတယ်။

အင်တာနက်ကနေတဆင့် လူသစ်ခေါ်ပြီးတော့ ဆက်သွယ်လာသူတွေကို လမ်းကြောင်းစီစဉ်ပေးတဲ့ ပုံစံဖြစ်ပါတယ်။

တချို့ကတော့ သူတို့ကို လေဆိပ်မှာ အထုပ်ကိုယ်စီနဲ့ အိမ်ပြန်ဖို့ စောင့်နေတဲ့ ပုံတွေကိုလည်း နောက်ထပ် လူသစ်တွေ ယုံကြည်လာအောင်ရိုက်ကူးထားပါတယ်။

ဒါပေမယ့် သူတို့ ပို့တဲ့ ခရီးစဉ်လမ်းကြောင်းကို ဆက်ပြီး လေ့လာတဲ့ အခါမှာတော့

“ရခိုင်လူမျိုးပွဲစားတွေက စစ်ကောင်စီအရာရှိတွေနဲ့ ပေါင်းပြီး လုပ်နေကြတာပါ။ သူတို့က ကျောက်ဖြူအထိခေါ်တယ်၊ ကျောက်ဖြူက လူမနေတဲ့ အိမ်တွေမှာ ထားတယ်။ ကျောက်ဖြူအထိတော့ရောက်တယ်။ အဲ့ဒီကနေ ထွက်လို့မရဘဲ ကျောက်ဖြူမှာ အကုန်ပိတ်မိကုန်ကြတာ” လို့ ကျောက်ဖြူမြို့ခံတစ်ဦးက လေးဝတီ FM ကို ပြောပါတယ်။

လူပွဲစားတွေဟာ “အာမခံချက်ရှိတဲ့ လမ်းကသွားမယ်” “လုံခြုံမှုရှိတဲ့ အောက်လမ်း” အာမခံချက်ရှိတဲ့ အပေါ်လမ်း” “လမ်းလျှောက်စရာမလို ” စတဲ့ ကြော်ငြာဆန်ဆန် စာသားတွေနဲ့ အတူ ၊ ရခိုင်ပွဲစားတွေ ဟာ Tit Tok စာမျက်နှာတွေပေါ်မှာ ခြေရှုပ်နေပါတယ်။

“ရခိုင်ဆိုတော့ ကိုယ့်အချင်းချင်း မလိမ်ညာဘူးလို့ ထင်ပြီးသူတို့နဲ့ သွားကြတာ ၊ သူတို့က အသေချာကျွေးမွေးပြီး လေဆိပ်အထိတင်ပေးလိုက်တဲ့ ဗီဒီယိုတွေဘာတွေ Live လွှင့်ပြီး လူယုံအောင်လုပ်ကြတာ ၊ လေယာဉ်ပေါ်တင်ပေးပြီးရင် သူတို့ ဘာမှ တာဝန်မယူတော့ဘူး” လို့ ကျောက်ဖြူ နဲ့ ပို့မယ့် ပွဲစားတစ်ဦးနဲ့ ဆက်သွယ်ဖူးသူ က ပြောပါတယ်။

စစ်ကော်မရှင်ပိုင်တဲ့ မြန်မာ့လေကြောင်း ကနေတဆင့် ကျောက်ဖြူမြို့ကို ရောက်ရှိပြီး ကျောက်ဖြူမြို့ပေါ်မှာပိတ်မိနေတဲ့ ရခိုင်အရေအတွက်ဟာ ငါးရာကျော်ရှိနေတယ်လို့ ဒေသခံတွေက အတည်ပြုပါတယ်။

ကျောက်ဖြူမြို့ကို စစ်ကော်မရှင်က ထိန်းချုပ်ထားဆဲဖြစ်ပြီး မြို့တွင်း မြို့ပြင် အဝင်အထွက်စစ်ဆေးမှုတွေ ကိုလည်းတင်းတင်းကြပ်ကြပ်ပြုလုပ်ထားပါတယ်။

ကျောက်ဖြူမြို့နယ်ထဲမှာ အာရက္ခတပ်တော်AA နဲ့ စစ်ကော်မရှင်တို့ တိုက်ပွဲတွေဖြစ်ပွားနေပြီး အဲ့ဒီဒေသဟာ လက်ရှိမှာ စစ်ပွဲဇုံထဲရောက်ရှိနေပါ။

Laywaddy FM