စစ်ကော်မရှင်ဘက်က ဆက်တိုက်ပြုလုပ်လာတဲ့ လေကြောင်းတိုက်ခိုက်မှုတွေကြောင့် ရခိုင်ဒေသမှာ အမျိုးသမီးနဲ့ ကလေးငယ်များစွာအသက်ပေးနေရပါတယ်။
၂၀၂၅ စက်တင်ဘာကနေ ဒီဇင်ဘာလ အထိ လေးလတာအတွင်းမှာ ကျောက်တော်တစ်မြို့နယ်တည်းက ကလေးငယ်အယောက် ၅၀ ကျော် ထိခိုက်နစ်နာဆုံးရှုံးခဲ့ရပြီဖြစ်ပါတယ်။
ဒါဟာ ကလေးငယ်တွေ အတွက် လေကြောင်းလုံခြုံရေး အစီအမံတွေ အရေးပေါ်လိုအပ်လာပြီ ဆိုတဲ့ သတိပေးချက်လည်းဖြစ်ပါတယ်။
“တကယ် ကြဲတော့မယ်ဆိုရင် လေယာဉ် သံကနောက်မှ ကြားရတာ ပစ်တာကအရင် ၊ အသံကြားရင် ပစ်ပြီးသွားပြီ ရှောင်ဖို့မရဘူး ၊ဗုံးခိုကျင်းလဲမသွားနိုင်ဘူး ၊ မွေးထားတဲ့ကလေးကို ဘယ်လို အသက်ရှင်အောင်ထားရမယ် ဆိုတာ မတွေးတတ်တော့ဘူး “ လို့ ကျောက်တော်ဒေသခံ အမျိုးသမီးတစ်ဦးက ပြောပါတယ်။
အာရက္ခတပ်တော် ရဲ့ ဒီနေ့မနက်ပိုင်းထုတ်ပြန်ချက်မှာ ကျောက်တော်မြို့ “ကြောင်ဖိုရွာ” လေကြောင်းတိုက်ခိုက်မှုကြောင့် တိုက်ခိုက်ခံရမှုမှာ အရပ်သား (၇) ဦးသေဆုံးခဲ့ပြီး ၊ ၁၀ ဦး ဒဏ်ရာရရှိခဲ့တယ်လို့ ထုတ်ပြန်ထားပါတယ်။
ဒီအထဲမှာ ကလေးငယ် နှစ်ဦးသေဆုံးခဲ့သလို ၊ နောက်ထပ် ၁၂ နှစ်အောက်ကလေး (၆) ဦးဟာ ထိခိုက်ဒဏ်ရာ ရရှိခဲ့တယ်လို့ အတည်ပြုပါတယ်။
ပြီးခဲ့တဲ့ စက်တင်ဘာလထဲမှာလည်း ကျောက်တော်မြို့နယ် သရက်တပင်ကျေးရွာမှာရှိတဲ့ ကိုယ်ပိုင်အထက်တန်းကျောင်း ဗုံးကြဲခံရမှု မှာ အသက် ၁၈ နှစ်အောက်ကလေးငယ် ၂၂ ဦးသေဆုံးခဲ့ရသလို ၊နောက်ထပ် ၂၀ ဟာလည်း ထိခိုက်ဒဏ်ရာ ရရှိခဲ့ပါတယ်။
“ဒဏ်ရာရတဲ့ ကလေးတွေကို ဆေးကုပေးပေမယ့် တချို့က ခြေလက်အဂ်ါတွေ မသန်စွမ်းတဲ့အထိဖြစ်သွားပါတယ်၊ စိတ်ပိုင်းဆိုင်ရာတော့ မပြောနဲ့တော့ “ လို့ ဒေသတွင်းမှာ ကူညီကယ်ဆယ်ရေးတွေ လုပ်ကိုင်နေသူ တစ်ဦးက ပြောပါတယ်။
စစ်ပွဲအတွင်းအရပ်သားသေဆုံးထိခိုက်မှုနှုန်းထက် ၊ မြို့သိမ်းတိုက်ပွဲ အပြီးမှာ လေကြောင်းတိုက်ခိုက်မှုတွေကြောင့် အရပ်သားထိခိုက်မှုတွေ ပိုတိုးလာတာ ဖြစ်ပါတယ်။
စစ်ကော်မရှင်ရဲ့ လေကြောင်းတိုက်ခိုက်မှုကြောင့် အမျိုးသမီးတွေနဲ့ ကလေးတွေ မကြာခဏသေဆုံးနေကြပြီး ဒေသတွင်းမှာ နေထိုင်သူတွေရဲ့ စိတ်ပိုင်း နဲ့ ရုပ်ပိုင်းဆိုင်ရာ မလုံခြုံမှုတွေ ကို ကုစားဖို့ လိုအပ်လာပါတယ်။
လေးဝတီFM
