ရခိုင်ပြည် အမ်းမြို့မှာ အခြေစိုက်ထားတဲ့ အနောက်ပိုင်းတိုင်းစစ်ဌာနချုပ် ရဲ့ စစ်ကြောင်းထိုးလာတဲ့ တပ်သားတွေဟာ အမ်းမြို့နယ်ထဲက ကျေးရွာတွေကို အောက်တိုဘာ ၂၁ ရက် ဝင်ရောက်ပြီးမီးရှို့ဖျက်ဆီးခဲ့လို့ အမ်းမြို့နယ်က လုံးကျေးရွာဟာ ရွာလုံးကျွတ်နီးပါး မီးလောင်ပျက်စီးခဲ့တယ်လို့ သိရပါတယ်။
စစ်ကောင်စီဟာ ရခိုင်ပြည်နယ်ကို ဖုန်းနဲ့ ဆက်သွယ်ရေးတွေ ဖြတ်တောက်ပြီးနောက်ပိုင်းမှာ သူတို့ ထိမ်းချုပ်မှုအောက်မှာရှိနေတဲ့ မြို့နယ်တွေကိုအခုလို စစ်ကြောင်းထိုးတာ ၊ ရွာလုံးကျွတ်မီးရှို့ဖျက်ဆီးတွေ ၊ တွေ့ရာမြင်ရာ အရပ်သားတွေကို ပစ်ခတ်သတ်ဖြတ်တာတွေကို လုပ်နေတာ ဖြစ်ပါတယ်။
“ရွာထဲကို အင်အား ၁၀၀ လောက်စစ်ကြောင်းထိုးလာပြီး ဖောပစ်သွားတယ်၊ ရွာထဲမှာ ကျန်တဲ့ လူတွေလည်းထိတယ်၊ အရင်ကတည်းက ထွက်ပြေးနေတဲ့သူတွေ တော့ လွတ်သွားတယ် ၊ အိမ်တွေလည်းမီးတိုက်သွားတယ်၊ မီးဘယ်သူလဲ မသတ်ရဲ ထွက်ပြေးကြတော့ တစ်ရွာလုံး နီးပါးကုန်သွားတယ်” လို့ အမ်းဒေသခံတစ်ဦးက လေးဝတီ FM ကို ပြောပါတယ်။
အဲ့ဒီကျေးရွာဟာ အနောက်ပိုင်းတိုင်းစစ်ဌာနချုပ် နဲ့ အနီးဆုံးက ဒေသခံ ကျေးရွာဖြစ်ပြီး အိမ်ခြေ ၃၀၀ ကျော် ရှိတဲ့ ကျေးရွာတစ်ရွာဖြစ်တယ်လို့ သိရပါတယ်။
အမ်းမြို့ နဲ့ တပ်တောင်ကျေးရွာ ကို သွားတဲ့ ကားလမ်းပိုင်းပေါ်မှာ ရှိနေပြီး တိုက်ပွဲတွေကြောင့် ရွာသား အများစုက စစ်ရှောင်နေကြပြီလို့လည်း ဆိုပါတယ်။
“အဲ့ဒီရွာက အရင်တုန်းကလည်း တပ်က အဝင်အထွက်များတယ်၊ ဝါဒဖြန့်ဖို့လိုရင် တီဗီဆင်းဆင်းရိုက်တယ်” လို့ ဒေသ အကြောင်းကို နှံ့စပ်တဲ့ သတင်းရင်းမြစ်ကပြောပါတယ်။
အမ်းမြို့နယ် ထဲက အနောက်ပိုင်းတိုင်းစစ်ဌာန ချုပ်ဟာ အကြီးအကျယ်ထိုးစစ်ဆင််ခံနေရပြီး အဲ့ဒီ အနီးတဝိုက်က ကျေးရွာတွေက တော့ စစ်ပွဲထဲမှာ ပိတ်မိနေတာဖြစ်ပါတယ်။
ပြင်းထန်တဲ့ စစ်ပွဲတွေထဲမှာ ပြည်သူဘေးကင်လုံခြုံရေးမရှိတော့ဘဲ စစ်ကောင်စီ လက်အောက်မှာရှိနေတဲ့ ကျေးရွာတွေဟာ အခုလို အညှိုးတကြီး တိုက်ခိုက်ခံနေရတာဖြစ်ပါတယ်။
စစ်ကောင်စီရဲ့ အနောက်ပိုင်းတိုင်းစစ်ဌာနချုပ် (နပခ-အမ်း) မှာ ရှိတဲ့ တပ်မိသားစုတွေကို တော့ ရဟပ်ယာဉ်နဲ့ အရင်ရက်တွေကတည်း က ပြောင်းရွေ့ထားပြီလို့ သတင်းရရှိပါတယ်။
အနောက်ပိုင်းတိုင်းစစ်ဌာနချုပ်ကို သိမ်းပိုက်ရေးတိုက်ပွဲတွေမှာ ပြည်မက တော်လှန်ရေး ရဲဘော်တပ်ဖွဲ့တွေ ပါဝင်ခဲ့ပြီး ပြည်သူ့လွတ်လပ်ရေးတပ်တော်က ရဲဘော်တစ်ဉီး ၊ ကျောင်းသားလက်ရုံးတပ်တော် က ရဲဘော်တစ်ဦးတို့ ကျဆုံးခဲ့တယ်လို့ မိခင်တပ်ရင်းတွေက ထုတ်ပြန်ထားပါတယ်။
ဓာတ်ပုံ- ၂၀၁၉ ခုနှစ်က လုံးကျေးရွာက ရွာသားတွေ နဲ့ တွေ့ဆုံပွဲပြုလုပ်နေပုံ
Source-စစ်ကောင်စီ
