အနောက်ပိုင်းတိုင်းစစ်ဌာနချုပ် အမ်း (နပခ)ထဲက စစ်သည်အင်အား ၃၆၀ ကျော်ဟာ အခုဒီဇင်ဘာ လ အတွင်းမှာ အလံဖြူထောင်ခဲ့တယ်လို့ သတင်းရရှိပါတယ်။
အာရက္ခတပ်တော် AA က ဒီဇင်ဘာ ၁၇ ရက် မှာ အမ်း (နပခ) ဌာနချုပ် ရဲ့ မြေပြင်အခြေအနေ ကို သိစေဖို့ ဗီဒီယိုဖိုင်တစ်ခုထုတ်ပြန်ခဲ့ပြီးနောက်၊ လေးဝတီ FM က အနေနဲ့ အင်အားစုစုပေါင်းကို ထပ်မံ စုံစမ်းထားခြင်းဖြစ်ပါတယ်။
“ဒီဇင်ဘာ ထဲမှာ ၃၀ တစ်ခါ ၊ ၅၀ တစ်ခါ ၊၈၀ တစ်ခါ ၊ အခု ထပ်ပြီး ၂၀၀ ထပ် ဝင်လာတယ် နောက်ပြီးငါးယောက်တစ်ဖွဲ့ ဆယ်ယောက်တစ်ဖွဲ့ ဝင်လာတာတွေလည်းရှိတယ်” လို့ စစ်ရေးသတင်းရင်းမြစ်က ပြောပါတယ်။
နပခ ဌာနချုပ်အတွင်းက အသုတ်လိုက်ခွဲပြီးအလင်းဝင်နေခဲ့တာဟာ နိုဝင်ဘာ လအတွင်းမှာပဲ တပ်သား တစ်ထောင်ကျော်ပြီးဖြစ်တယ်လို့ သိရပါတယ်။
အဲ့ဒီအလင်းဝင်းလာသူတွေထဲမှာ ဒုဗိုလ်မှူးကြီးအဆင့် တစ်ယောက်ပါဝင်တယ်လို့လည်း စစ်ရေးသတင်းရင်းမြစ်က ပြောပါတယ်။
” မြေခေါင်း (မြေအောက်ခန်း) ထဲမှာ တပ်မမှူး ၊ ခရိုင်မှူး တွေနဲ့ သူတို့ရဲ့ ကိုယ်ရန်တော် တပ်ဖွဲ့တွေပဲ ကျန်တော့တယ် တခြားခံတိုက်နေတဲ့ တပ် မရှိတော့ဘူး ၊ သူတို့က သူတို့ကို လာကယ် ထုတ်မယ့်အဖွဲ့ ကို စောင့်နေပုံရတယ်။ “ လို့ စစ်ရေးသတင်းရင်းမြစ်က လေးဝတီ FM ကို ပြောပါတယ်။
အနောက်ပိုင်းတိုင်းစစ်ဌာနချုပ် အတွင်းထဲမှာ တိုက်ပွဲကို ကွက်ကဲနေသူ နဲ့ ကိုယ်ရံတော် အဖွဲ့တွေသာ ကျန်ရှိတော့ပြီးပြင်ပ နဲ့ အဆက်အသွယ် ပြတ်တောက်နေပြီ လို့ ဆိုပါတယ်။
နပခ ဌာနချုပ်ထဲ မှာ ပိတ်မိနေတဲ့ တပ်သားတွေကို ကယ်ထုတ်ဖို့ စစ်ကောင်စီဟာ တောင်စောက် ယာယီဗျူဟာ ကနေ စစ်ကားအစီးနှစ်ဆယ်နဲ့ ဆင်းချလာပေမယ့် လမ်းတစ်ဝက်မှာ ထိခိုက်ကျဆုံးမှုတွေနဲ့ နောက်ဆုတ်ခဲ့ရတာဖြစ်ပါတယ်။
လတ်တလောမှာ အမ်းမြို့ ပတ်ဝန်းကျင်နဲ့ နပခ ဌာနချုပ်ကို စစ်ကောင်စီဘက်က ဒရုန်းနဲ့ လေကြောင်းကို အသုံးပြုပြီးတိုက်ခိုက်နေတယ်လို့ ဆိုပါတယ်။
ရခိုင်ပြည်နယ် အနောက်ဘက်အခြမ်းက မောင်တောနခခ တိုက်ပွဲအတွင်းမှာလည်း စစ်ကောင်စီတပ်သားတွေဟာ လာကယ်မယ့်သူမရှိဘဲ ၊ အခန်းတစ်ခုတည်းမှာ ပိတ်ပြီး လနဲ့ချီ နေထိုင်ခဲ့ရတဲ့ ဗီဒီယိုတွေလည်း ပြန့်နှံ့ ခဲ့ပါသေးတယ်။
အဉ္စနလီညှင်း (လေးဝတီFM)ရေးသည်။
