ရခိုင်ပြည် တောင်ကုတ်မြို့ နဲ့ ဉသျှစ်ပင် လမ်းပိုင်းပေါ်မှာရှိတဲ့ ပဲခူးရိုးမအဆင်းက ညောင်ခြေထောက်ကျေးရွာကို ဆယ်ရက်အတွင်းဖယ်ရှားပေးဖို့ ကပစ (၆) က တဆင့် အမိန့်ထုတ်ထားတယ်လို့ သတင်းရရှိပါတယ်။
အိမ်ခြေ ၄၅၀ ကျော်ရှိတဲ့ ညောင်ခြေထောက်ကျေးရွာ ဟာ ကပစ (၆) နဲ့ နှစ်မိုင်ကျော်မှာ ရှိပြီး စစ်ကောင်စီတပ်သားတွေ လက်ရှိစခန်းချထားတဲ့နေရာလည်းဖြစ်ပါတယ်။
“အခုက ကပစကလာပြောတယ် ၁၀ ရက်တွင်းပြောင်းရမယ်ဆိုပြီး လာပြောပါတယ်။ မပြောင်းရင် အသက်အာမခံချက်မရှိဘူးလို့ ဆိုပါတယ်” လို့ သတင်းရင်းမြစ်က ပြောပါတယ်။
စစ်ကောင်စီရဲ့ အမိန့်ထုတ်ပြန်ပြီးနောက်မှာ ညောင်ခြေထောက်ကျေးရွာမှာရှိတဲ့ ဒေသခံတွေဟာ စတင်ပြောင်းရွေ့နေကြပြီး ထောင်နဲ့ ချီပြီးနေရပ်စွန့်ခွာကြရတာ ဖြစ်ပါတယ်။
ဉသျှစ်ပင် ၊ ညောင်ခြေထောက် ၊ ညောင်ကျိုး၊ ချင်းကုန်းအမြောက်ကြီးစခန်းတို့ ဟာ စစ်ကြောင်း ဖြတ်သန်းရာ လမ်းပိုင်း ဖြစ်နေပြီး စစ်ကောင်စီတပ်တွေဟာ ညောင်ခြေထောက်ကျေးရွာမှာ အထိုင်ချလိုက်တာဖြစ်တယ်လို့ ဆိုပါတယ်။
“အခုက သူတို့စစ်ကြောင်းထွက်ရင် ညောင်ခြေထောက်ပတ်ဝန်းကျင် ကို စစ်ကြောင်းထိုးတယ်၊ ပြီးတော့ ညောင်ခြေထောက် နဲ့ မနီးမဝေးက ကပစ ကို ဝင်တိုက်ဖို့ အရမ်းစိတ်ပူနေကြတယ်” လို့ ဒေသတွင်း စစ်ရေး သတင်းရင်းမြစ်က ပြောပါတယ်။
မိုးထိတောင်တိုက်ပွဲမှအကျ အရှုံးများပြီးနောက် နောက်ဆုတ်လာတဲ့ စစ်ကောင်စီတပ်တွေဟာ ညောင်ခြေထောက်ကျေးရွာကို တော်လှန်ရေးအဖွဲ့တွေ ဝင်လာမှာကို စိုးရိမ်တဲ့အတွက် အခုလို ဝင်ရောက်နေရာယူထားတာဖြစ်တယ်လို့ ဒေသခံတွေက ဆိုပါတယ်။
မိုးထိတောင်ကို ပြန်လည်ထိုးစစ်ဆင်ဖို့ တက်သွားတဲ့ စစ်ကောင်စီ စစ်ကြောင်းတစ်ခုဟာလည်း လမ်းပိုင်းပေါ်မှာတော်လှန်ရေးအဖွဲ့တွေနဲ့ပြင်းပြင်းထန်ထန်တိုက်ပွဲဖြစ်နေတယ်လို့ သိရပါတယ်။
အဉ္စနလီညှင်း(Laywaddy FM )
