ရခိုင်ပြည် ကျောက်ဖြူမြို့နယ် သစ်ပုတ်တောင် တိုက်နယ်ရှိ ကြတ္တိန် ကျေးရွာကို စစ်ကောင်စီ လေကြောင်းကနေ ထပ်မံ ဗုံးကြဲ နေတယ်လို့ သတင်းရရှိပါတယ်။
“ဒီနေ့ မနက်မှာ ဗုံး ၄ လုံးလာကြဲတယ်၊ အိမ် လည် ၄၅ လုံး ပျက်စီးသွားပြီ၊ စပါးရုံတွေကိုလည်း ကျတယ်” လို့ ရွာသားတစ်ဦးက ပြောပါတယ်။
“မနေ့က နေ့လည်ဖက် ကတည်းက ဒရုန်းနဲ့ချနေတာ ၊ ကျောင်းအ၀င်ဝ နဲ့ ဓမ္မာရုံကို ကျတယ် ၊ ပြိုသွားတယ်”လို့ လည်း ဆိုပါတယ်။
အဆိုပါ ဗုံးကြဲတိုက်ခိုက်မှုကြောင့် ကြတ္တိန်ကျေးရွာဘုန်းတော်ကြီးကျောင်း မုခ်၀ ၊ ဓမ္မာရုံ နဲ့ နေအိမ် အများ အပြား ပျက်စီးနေတာ ဖြစ်ပြီး လူအသေအပျောက် ရှိမရှိကိုတော့ ထပ်မံ စုံစမ်းနေဆဲ ဖြစ်ပါတယ်။
စစ်ကောင်စီဟာ သစ်ပုတ်တောင်တိုက်နယ် နဲ့ ဂုံးချွန်တိုက်နယ်ရှိ ကျေးရွာများကို လေကြောင်း အဓိကထား ဗုံးကြဲတိုက်ခိုက်နေတာ ဖြစ်ပြီး ယခုလအတွင်းကျေးရွာ ၄ ရွာ ထက်မနည်း ပျက်စီးဆုံးရှုံးသွားတယ်လို့ နောက်ထပ် ဒေသခံတစ်ဦးကပြောပါတယ်။
“အခုက ရှောက်ချောင်း၊ ကပ်သပြေ၊ ဦးးကင်း၊ ကြတ္တိန် ရွာတွေ ဖက်ကို အဓိကထားတိုက်ခိုက်နေတယ် ၊ ရွာလည်းမီးလောင် ပျက်စီးသွားပီ”လို့ဆိုပါတယ်။
စစ်ကောင်စီဟာ မြို့နဲ့ အနီးဆုံးဖြစ်တဲ့ ကြတ္တိန်ကျေးရွာကို တိုက်ပွဲတစ်စုံတစ်ရာမရှိဘဲ အခုလိုရည်ရွယ်ချက်ရှိရှိနဲ့ ဗုံးကြဲတိုက်ခိုက်နေတာကြောင့် မကြာခင်မှာ ကြတ္တိကျေးရွာနဲ့ နီးတဲ့ ငလပွေ မြို့ပေါ်ကိုလည်းတိုက်ခိုက်လာနိုင်တာကြောင့် မြို့ခံအများအပြားကြောက်လန့်နေကြတယ်လို့ သိရပါတယ်။
အမ်းချောင်းသူ
လေး၀တီFM
