ရခိုင်ရိုးမ ပေါ်က နတ်ရေကန်ဗျူဟာတိုက်ပွဲမှာ တစ်ခုတည်းသာကျန်တော့တဲ့ လေကြောင်းရန်ကာကွယ်ရေး စခန်းက စစ်ကောင်စီတပ်သားတွေ ကစဉ့်ကလျားထွက်ပြေးနေပြီး အဲ့ဒီအထဲက တချို့ကို -အရှို ချင်းကာကွယ်ရေးတပ်က ဖမ်းဆီးရမိခဲ့တယ် လို့ထုတ်ပြန်လာပါတယ်။

နတ်ရေကန်လေကြောင်းရန်ကာကွယ်ရေးတပ်စခန်း မီတာ ၁၅၀၀ အကွာမှာ အဲ့ဒီစခန်းက ထွက်လာပြေးလာတဲ့စစ်ကောင်စီ တပ်သား ၂၃ ဦးကို အရှို ချင်းကာကွယ်ရေးတပ် ဖွဲ့က ဖမ်းဆီးမိခဲ့တာဖြစ်ပါတယ်။

ဇွန်လ ၈ ရက်ကနေ ၁၂ ရက်အထိ ၅ ရက်အတွင်းမှာ နတ်ရေကန်လေကြောင်းရန်ကာကွယ်ရေးစခန်းကနေ ထွက်ပြေးလာသူ ၂၃ ဦးကို ဖမ်းဆီးမိခဲ့တာလို့ ထုတ်ပြန်ထားပါတယ်။

အခုဖမ်းဆီးရမိတဲ့ သူတွေဟာ စစ်မှုထမ်း ဉပဒေအရ အဓမ္မစစ်သားစုဆောင်းခံရသူတွေ ဖြစ်တယ်လို့ ထုတ်ပြန်ချက်က ဆိုပါတယ်။

စစ်ကောင်စီတပ်သားတွေဟာ နတ်ရေကန်တိုက်ပွဲကနေ အခုလို အသုတ်လိုက်ထွက်ပြေးနေကြပြီး ပဒါန်းဘက်ရောက်သွားတဲ့ စစ်ကောင်စီတပ်သားတွေကို တော့ စစ်ကောင်စီရဲ့ တပ်မ ၉၉ က လည်း ဖမ်းဆီးသတ်ဖြတ်ခဲ့တယ်လို့လေးဝတီ FM က သတင်းရရှိထားပါတယ်။

စစ်ကောင်စီရဲ့ အဓမ္မ စစ်သားစုဆောင်းခံရပြီး ၊ စစ်မြေပြင်ပို့ခံရတဲ့ တပ်သားတွေ အနေနဲ့ တော်လှန်ရေးအဖွဲ့တွေကို ဆက်သွယ်ပြီး အလင်းဝင်ဖို့လည်း အရှို ချင်းကာကွယ်ရေးတပ် ဖွဲ့က ထည့်သွင်းထုတ်ပြန်ထားပါတယ်။

လေးဝတီ FM