ရခိုင်ရိုးမ ကျောရိုးပေါ်မှာရှိတဲ့ နတ်ရေကန် အမည်ရှိ စစ်ကောင်စီရဲ့ ခံစစ်ဗျူဟာကြီးကို အာရက္ခတပ်တော်နဲ့ တော်လှန်ရေးအင်အားစုတွေက အောက်တိုဘာ ၁၄ ရက်မှာ အပြီးသတ်သိမ်းပိုက်လိုက်ပြီလို့ မြေပြင်စစ်ရေးသတင်းရင်းမြစ်က အတည်ပြုပါတယ်။

ဆယ်လနီးပါးထိုးစစ်ဆင်ခဲ့ရတဲ့ ဒီဗျူဟာကုန်းဟာ ရခိုင်ရိုးမရဲ့ အမြင့်ဆုံးနေရာမှာ ၊ စခန်းပေါင်း ၁၀ ခုနီးပါး နဲ့ ဗျူဟာ ကျကျ ခြံရံထားတာလည်းဖြစ်ပါတယ်။

ဒီဗျူဟာကုန်းကို အာရက္ခတပ်တော်ဘက်က ထိုးစစ်ဆင်ခဲ့ပြီး ရိုးမပေါ်မှာ တိုက်ပွဲဖြစ်နေတဲ့ ကာလတစ်လျှောက်လုံးမှာ ချင်းကာကွယ်ရေးတပ်နဲ့ အရှိုချင်းကာကွယ်ရေးတပ် ACDF ၊ မကွေးတိုင်း အခြေစိုက် PDF တပ်ရင်းတွေ၊ ၊ ကျောင်းသားလက်ရုံး တပ်တော် (SAF) ၊ ပြည်သူ့လွတ်လပ်ရေးတပ်တော် (PIA) ၊ လူထုတော်လှန်ရေး မဟာ မိတ်အင်အားစု PRA (မကွေး) တို့ က ဘက်ပေါင်းစုံက တက်လာတဲ့ စစ်ကောင်စီရဲ့ ခြေလျင်ထိုးစစ်တွေကို အကြိမ်ကြိမ်ဖြတ်တောက် တိုက်ခိုက်ခဲ့တာဖြစ်ပါတယ်။

“ရိုးမပေါ်မှာရှိတဲ့ ပင်မစခန်းကို သိမ်းလိုက်ပါပြီ ၊ စကစ ဘက်ကတော့ နောက်ထပ်အင်အားတွေနဲ့ ရိုးမခြေရင်းကို တက်လာပါတယ် ” လို့ မြေမြင်စစ်ရေးသတင်းရင်းမြစ် တစ်ဦးက ပြောပါတယ်။

တော်လှန်ရေးတပ်ဖွဲ့တွေနဲ့ အာရက္ခတပ်တော်ကြားမှာ ပူးပေါင်းဆောင်ရွက်မှုတွေ ရှိခဲ့ပေမယ့် ၊ ဒီဗျူဟာကုန်းကို သိမ်းပိုက်တဲ့ ထိုးစစ်မှာ ဆယ်လကျော်ကြာ ဟန်ချက်ညီညီကြိုးပမ်းခဲ့ကြတာဖြစ်ပါတယ်။

အာရက္ခတပ်တော်ဘက်က ရခိုင်ပြည်ထဲမှာ ရှိတဲ့ မြို့တွေကို ထိုးစစ်ဆင်သိမ်းပိုက်ခဲ့ပြီးဖြစ်သလို ၊ ရခိုင်ပြည်ကို တံတိုင်းလိုကာရံထားတဲ့ ရခိုင်ရိုးမပေါ်က စစ်ကောင်စီ ရဲ့ ဗျူဟာစခန်းတွေကိုလည်း သိမ်းပိုက်နေတာဖြစ်ပါတယ်။

နတ်ရေကန်ဗျူဟာ ကို တော်လှန်ရေးတပ်ဖွဲ့တွေ သိမ်းပိုက်နိုင်ရင် ရခိုင်ရိုးမတစ်ခုလုံးကိုလည်း ထိန်းချုပ်နိုင်တဲ့ အခြေအနေဖြစ်ပါတယ်။

ဒီစခန်းဟာ အမ်း-ပဒါန်းလမ်းပိုင်းပေါ်မှာရှိပြီး ရခိုင်ပြည်နယ် ၊ ပဲခူးတိုင်း နဲ့ မကွေးတိုင်း အတွက် အဓိက ကျတဲ့ စစ်ရေဗျူဟာလည်းဖြစ်ပါတယ်။

လေးဝတီFM