ကချင်ပြည်နယ်မှာ တပြိုင်နက် တည်း စစ်ကောင်စီ စခန်းတွေကို ထိုးစစ်ဆင် လိုက်တဲ့
စစ်ဆင်ရေး မှာ ကချင်လွတ်လပ်ရေး တပ်မတော် KIA နဲ့ အတူ ရခိုင့်တပ်တော် AA က
ပူးပေါင်းထိုးစစ်ဆင် နေတယ်လို့ မတ်လ ၇ ရက် ညပိုင်းက ထုတ်ပြန်ပါတယ်။
မတ်လ ၇ ရက်နေ့ နံနက် ၆ နာရီဝန်းကျင်မှာ စစ်ဆင်ရေး ကို စတင်ခဲ့ပြီး
ကချင်လွတ်လပ်ရေးတပ်မတော် (KIA) ရဲ့ ဌာနချုပ်ရှိရာ ကချင်ပြည်၊ လိုင်ဇာမြို့ဝန်းကျင်နဲ့
မြစ်ကြီးနား-ဗန်းမော်လမ်း ပိုင်း မှာရှိတဲ့ စစ်ကောင်စီတပ်စခန်းတွေကို KIA ၊ AA ၊ PDF
ပူးပေါင်းအင်အားတွနဲ့ ထိုးစစ်ဆင် တိုက်ခိုက်လာတာဖြစ်ပါတယ်။
ကချင်ထိုးစစ်တွေ အတွင်းမှာ ရက္ခိုင့်တပ်တော်အနေနဲ မဟာမိတ် (KIA) နှင့်
ပူးတွဲစစ်ရေးလှုပ်ရှားမှုတွေ အပြင် သီးသန့်တာဝန်ယူပြီး ထိုးစစ်တွေ ကို ဆင်နွှဲလျက် ရှိတယ်လို့
ဆိုပါတယ်။
မတ်လ ၇ ရက်က စတင်ခဲ့တဲ့ ကချင်ပြည်နယ် စစ်ဆင်ရေးမှာ ခါရာဘွမ်၊ အင်တပ်ဘွမ်၊ ဖုန်ပျံဘွမ်၊
ဘွမ်ရယ်ဘွမ်၊ ပွိင့် (၉၃၆) ကုန်း၊ ခမ်းကိုင်ဘွမ်၊ ပွိင့်(၂၅၉) လေယာဉ်ကွင်းစခန်းအပါအဝင်
အခြားသောစခန်းအချို့တို့ကိုလည်း တစ်ပြိုင်နက်တည်း တိုက်ခိုက်လျက်ရှိပါတယ်။
ကချင်ပြည်နယ်၊ ဗန်းမော်ခရိုင်၊ မိုးမောက်မြို့နယ်အနီးရှိ စစ်ကောင်စီရဲ့ တပ်မ (၈၈)
လက်အောက်ခံ ခလရ (၁၀၃) တပ်ရင်း၊ ပွိင့် (၂၅၉) လေယာဉ်ကွင်းစခန်းကုန်း နှင့်
ဒေါ့ဖုန်းယန်မြို့နယ်အနီးရှိ ပွိင့် (၆၁၁) (Ntap Bum) စခန်းကုန်းကို ရက္ခိုင့်တပ်တော်မှ
ဆက်လက်ထိုးစစ်ဆင်တိုက်ခိုက်ခဲ့တယ်လို့ ဆိုပါတယ်။
စစ်ကောင်စီတပ်ရင်းများမှ လက်နက်ကြီးများအပြင် လေကြောင်းမှပါ
တစ်ရက်လုံးပစ်ခတ်တိုက်ခိုက်မှုများပြုလုပ်ခဲ့တဲ့အတွက် KIO ဌာနချုပ်ရှိရာ လိုင်ဇာမြို့
ပြည်သူ့ဆေးရုံအနီးသို့ လက်နက်ကြီးထိမှန်ကျရောက်ခဲ့ပြီး လိုင်ဇာမြို့နှင့် ထိစပ်နေသည့် တရုတ်
နယ်စပ်မြို့ဘက်သို့လည်း လက်နက်ကြီးအချို့ ကျရောက်ပေါက်ကွဲခဲ့တယ်လို့လည်း
သိရပါတယ်။
ကချင်ပြည်နယ်အတွင်း ယမန်နေ့တိုက်ပွဲများတွင် စစ်ကောင်စီတပ်ရဲ့ စခန်း ၁၀ ခုကျော် ကို KIA
ဦးဆောင်ပါဝင်သော တော်လှန်ရေးတပ်များက သိမ်းပိုက်ရယူနိုင်ခဲ့တယ်လို့လည်း သိရပါတယ်။
ရခိုင့်တပ်တော် AA ညီနောင်မဟာမိတ် တွေဖြစ်တဲ့ TNLA ၊ MNDAA တို့နဲ့ အတူ ရှမ်းမြောက်
စစ်ဆင်ရေးတွေ မှာ ပူးပေါင်းပါဝင်ခဲ့ပြီး ရခိုင်ပြည်နယ် အတွင်းမှာ စစ်ကောင်စီ အမြစ်ဖြတ်ရေး
မြို့သိမ်းတိုက်ပွဲတွေ မှာ လည်း အောင်မြင်မှု ရနေတာ ဖြစ်ပါတယ်။
စစ်ကိုင်းတိုင်း နဲ့ မြန်မာပြည်အလယ်ပိုင်းက စစ်မျက်နှာတွေမှာ ပြည်သူ့ကာကွယ်ရေးတပ် PDF
အဖွဲ့တွေနဲ့လည်း စစ်ကောင်စီ တပ်တွေကို ပူးပေါင်းတိုက်ခိုက်နေပါတယ်။
ကချင်ပြည်နယ် က စစ်ဆင်ရေးဟာ မဟာမိတ် အဖွဲ့ဝင်များ နဲ့ ထပ်မံပူးပေါင်း တိုက်ခိုက်ရာမှာ
ရခိုင့်တပ်တော် AA ထပ်မံ ပါဝင်လာတဲ့ ကြီးမားတဲ့ စစ်ဆင်ရေး တစ်ခုဖြစ်ပါတယ်။
