အသိမ်းခံလိုက်ရပြီး လူသူမရှိတော့တဲ့ နပခ အဆောက်အအုံတွေ နဲ့ အတူ အမ်းမြို့တခုလုံးကို စစ်ကောင်စီ လေကြောင်းနဲ့ လက်နက်ကြီးအထိုင်တပ်ကနေ နေ့ရောညပါ တိုက်ခိုက်လျှက်ရှိတယ်လို့ ဒီကနေ့ ဒီဇင်ဘာ ၂၁ ရက်မှာ မြေပြင်သတင်းရရှိပါတယ်။
ရခိုင်ပြည်မှာ စစ်ကောင်စီရဲ့ အကြီးဆုံးအရာရှိဖြစ်တဲ့ ဒုတိုင်းမှူး သောင်းထွန်း နဲ့ တိုင်းစစ်ဦးစီး ကျော်ကျော်သန်းတို့ကို ဖမ်းဆီးပြီးကြောင်း ထုတ်ပြန်ခဲ့ချိန်မှာ လေကြောင်းအင်အားနှစ်ဆ နဲ့ လူမရှိတော့ တဲ့ စစ်တိုင်းရုံးထဲကို အကြိမ်ကြိမ်လာရောက်ဗုံးကြဲနေတယ်လို့ စစ်ရေးသတင်းရင်းမြစ်က ပြောပါတယ်။
“ဖမ်းခံရတဲ့ သူ့လူတွေလည်း သေချင်သေပစေ ဆိုပြီးကြဲနေတာ ၊ တိုင်းစစ်ရုံးရဲ့ အဆောက်အအုံကြီးကြီးမှန်သမျှ အကုန်ဗုံးကြဲတယ်။ ဟိုဘက်တောင်စောက်ဂိတ်ကလည်း အမြှောက်နဲ့ လှမ်းပစ်နေတယ်။အမ်းကတော့ တစ်မြို့လုံးနီးပါး ပျက်သွားပြီ” လို့ စစ်ရေးသတင်းရင်းမြစ်က ပြောပါတယ်။
လက်နက်ချ အလင်းဝင်လာတဲ့ စစ်ကောင်စီတပ်သားတွေတောင် လေကြောင်းရန်ကြောင့် စောစောအလင်းဝင်လာတာဖြစ်တယ်လို့ စစ်ရေးသတင်းရင်းမြစ်က မှတ်ချက်ပြုပါတယ်။
တစ်ဖက်မှာလည်း AA ဘက်က” ယနေ့အောင်မြင်မှုများမှာ ရက္ခိုင်ပြည်သူတစ်ရပ်လုံး၏ အောင်မြင်မှုသာမဟုတ်ဘဲ စစ်ကောင်စီအား တော်လှန်နေကြသော တော်လှန်ရေးအဖွဲ့အစည်းများ တော်လှန်သော ပြည်သူတစ်ရပ်လုံး၏ အောင်မြင်မှုအဖြစ် မျှဝေဂုဏ်ပြုအပ်ပါသည်။” ဆိုပြီး မြန်မာတစ်ပြည်လုံးမှာ ရှိတဲ့ တော်လှန်ပြည်သူတွေကို မျှဝေ ဂုဏ်ပြုထားပါတယ်။
စစ်ကောင်စီရဲ့ လော်ဘီစာမျက်နှာတစ်ခုမှာတော့ “အမ်း အခြေစိုက်အနောက်ပိုင်းတိုင်းစစ် ဌာနချုပ် ကျသွားပါပြီ ၊ ရခိုင်မှာ စစ်တပ်က စစ်ရှုံးသွားပါပြီ” လို့ ပူဆွေးဝမ်းနည်းနေကြတာကိုတွေ့ရ ပါတယ်။
အနောက်ပိုင်းတိုင်း စစ်ဌာနချုပ် ကို ထိမ်းချုပ်လိုက်ပြီးနောက်မှာ ရခိုင်ပြည် မှာ စစ်အုပ်ချုပ်ရေးရဲ့ အကြီးဆုံး အစိတ်အပိုင်းမရှိတော့တဲ့အခြေအနေလည်းဖြစ်ပါတယ်။
အဉ္စနလီညှင်း (လေဝတီFM)ရေးသည်။
