အထူးသဖြင့် ရခိုင်ကမ်းရိုးတန်းနဲ့ ၊ ဧရာဝတီမြစ်ဝကျွန်းပေါ်ဒေသတွေမှာ လယ်ယာမြေတွေ ထဲကို ပင်လယ်ရေငံ တွေ ဝင်ရောက်တတ်ပါတယ်။

ပင်လယ်ရေဝင်ရောက်ပြီးတဲ့ အခါ မြေဆီလွှာပျက်စီး ကျန်ခဲ့တာမျိုးဖြစ်တတ်ပါတယ်။

အဲ့ဒီလို ပျက်စီးခဲ့သွားတဲ့မြေကို ဆားငန်မြေလို့ ခေါ်ကြပါစို့။ အဲ့ဒီမြေကို ကောင်းမွန်အောင် ထိန်းသိမ်းမယ့်နည်းလမ်းတွေကို ပြောပြပေးသွားပါမယ်။

ဆားငန်မြေကို ပြုပြင်သုံးစွဲရာတွင် အရေးပါဆုံးသည် မြေပြုပြင်ခြင်း ဖြစ်ပါတယ်။

မြေဆီလွှာ ကောင်းမွန်ဖို့ အတွက် သဘာဝ မြေဩဇာ နဲ့ သဘာဝ မြေဆွေးတွေကို အသုံးပြုခြင်းကလည်း အရေးပါပါ တယ်။ကောက်ရိုး၊ စပါးခွံ၊နွားချေး၊ သစ်ရွက်စိမ်း တွေဟာ သဘာဝမြေဆွေး ပြုလုပ်ဖို့ ရာအတွက် အကောင်းဆုံး မြေဩဇာ တွေ ဖြစ်ပါတယ်။

မြန်မာပြည်အ လယ်ပိုင်းမှာ အဖြစ်များတဲ့ ဆပ်ပြာပေါက် မြေ တွေ အတွက်ကတော့ ဂျစ်ပဆမ် ကျောက်မှုန့်၊ ကျောက်မှုန့် မြေဩဇာ၊ သွပ်ဓာတ်မြေဩဇာများ ထည့်သွင်းရန် အထူးလိုအပ်ပါသည်။

ဆပ်ပြာပေါက်မြေကို ပြုပြင်ရာတွင် အရေးကြီးအသုံးဝင်သည့် ဂျစ်ပဆမ် ကျောက်မှုန့်

ဂျစ်ပဆမ် ကျောက်မှုန့် (Gypsum) ကို အသုံးပြု၍ မြေမှုန်များတွင် တွယ်ကပ်နေသော ဆိုဒီယမ်အိုင်းယွန်းများကို ကယ်လ်စီယမ်ဖြင့် အစားထိုးခြင်းဖြင့် မြေသားဖွဲ့စည်းပုံကို ကောင်းမွန်စေရန် အရေးကြီးပါတယ်။

ဂျစ်ပဆမ် (Gypsum) ကို မြေပြင်ရာမှာ ဘယ်လောက်နှုန်းထား သုံးရမလဲ….?

ဂျစ်ပဆမ် (Gypsum) ကျောက်မှုန့်ကို ဆပ်ပြာပေါက်မြေ (Sodic Soil) ပြုပြင်ရာတွင် အသုံးပြုရာ၌ မြေဆီလွှာထဲရှိ ဖလှယ်ထုတ်နိုင်သော ဆိုဒီယမ်ပါဝင်မှု ပမာဏ၊ မြေအမျိုးအစားနှင့် မြေသားအစိုဓာတ်ပေါ် မူတည်ပြီး နှုန်းထား ကွာခြားနိုင်ပါတယ်။

မြေသား ၁၀၀ ဂရမ်တွင် ဆိုဒီယမ် ၁ Meq ပါဝင်တဲ့ မြေတစ်ဧကကို ခြောက်လက်မအနက် ပြုပြင်လိုပါက ဂျစ်ပဆမ်ကို တစ်တန်နှုန်း ဖြင့် ပြုပြင်ရန် လိုအပ်ပါတယ်။ မြေတစ်ဧကကို တစ်ပေအနက် အထိ ပြုပြင်လိုပါက ဂျစ်ပဆမ်ကို နှစ်တန်နှုန်း ထည့်ပေးရမှာ ဖြစ်ပါတယ်။

ဂျစ်ပဆမ်ကို အသုံးပြုရာတွင်-

1. ဂျစ်ပဆမ်ထည့်သွင်းပြီးနောက် ထယ်နှံ့စပ်စွာထိုး၍ ကန်သင်းပြည့်အောင် ရေသွင်းပေးရပါမယ်။

2. သွင်းထားသည့် ရေကို (၇) ရက်မှ (၁၀) ရက်အထိ ပိတ်လှောင် ထားပြီးမှ စနစ်တကျ တူးဖော်ထားသည့် ရေထုတ်မြောင်းအတိုင်း ပြန်ထုတ်ပေးရပါမယ်။

3. ဂျစ်ပဆမ်ထည့်သွင်းပြီးနောက် ရေသွင်းခြင်းနှင့် ပြန်လည်ရေထုတ်ခြင်းကို အနည်းဆုံး နှစ်ကြိမ် လုပ်ဆောင်ပေးရပါမယ်။

4. မြေချဉ် နဲ့ ဆားပေါက်မြေများကို ပြုပြင်ရာမှာ ဓာတ်ပြုဖြစ်စဉ် မြန်ဆန်လာစေရန်၊ မြေဆီလွှာအတွင်း အစိုဓာတ် လုံလောက်မှုရှိစေရန်နှင့် ညီညာစွာ ပျံ့နှံ့စေရန်အတွက် သီးနှံမစိုက်မီ (၁) လမှ (၃) လ ကြိုတင် ထည့်သွင်းသုံးစွဲ ရပါမယ်။

ဂျစ်ပဆမ် ထည့်သွင်းခြင်းဟာ မြေသားဖွဲ့စည်းပုံ ကောင်းမွန်လာခြင်း၊ မြေစေးများတွင် မျက်နှာပြင်ကွဲအက်မှုကို နည်းပါးစေခြင်း၊ ကြပ်တည်းသောမြေများကို ဖွယ်လာစေခြင်းတို့ကြောင့် သီးနှံပင်၏ အမြစ်စီးဆင်းမှု၊ လေဝင်လေထွက်နှင့် ရေထိန်းစွမ်းအားတို့ကို ကောင်းမွန်လာစေပါတယ်။

သဘာဝမြေဆွေး က ဘာလို့ အရေးပါ…..?

မြေဆီလွှာ ကောင်းမွန်စေရန်နှင့် ဆားပေါက်မြေကို ပြုပြင်ရာမှာ အသုံးပြုနိုင်တဲ့ သဘာဝမြေဩဇာနှင့် မြေဆွေးတို့ကတော့ နွားချေး ၊ကောက်ရိုး၊စပါးခွံ ၊သစ်ရွက်စိမ်း၊ ပြောင်းရိုး၊လွှစာမှုန့် တို့ ပဲ ဖြစ်ပါတယ်။ ထိုပစ္စည်းများကိုတော့ ထယ်ရေးပြင်ချိန်တွင် ထည့်သွင်းအသုံးပြုရမှာ ဖြစ်ပါတယ်။

သဘာဝမြေဆွေး က မြေဆီလွှာရဲ့ ရုပ်ပိုင်းဆိုင်ရာ ဂုဏ်သတ္တိများကို မြှင့်တင်ပေးပါတယ်။ မြေသားတည် ဆောက်မှု၊ ရေစိမ့်ဝင်မှုနှင့် မြေဆီလွှာ ဖွဲ့စည်းပုံကို တိုးတက်ကောင်းမွန်လာစေပါတယ်။

အသုံးပြုသင့်တဲ့ ဒေသ တွေက မြန်မာနိုင်ငံအလယ်ပိုင်းမှာ ရှိတဲ့ ဆပ်ပြာပေါက်မြေ များတွင် လယ်မြေအငန်ဓာတ် လျော့ကျစေရန်အတွက် သဘာဝမြေဩဇာကို များများထည့်ပေးရန် လိုအပ်ပါတယ်။ဒါပေမယ့် အထူး သတိထားရမှာကတော့ ပင်လယ်ကမ်းရိုးတန်း ဒီရေလွှမ်းမြေများတွေမှာ သဘာဝမြေဩဇာကို လုံးဝမထည့်ရ ပါဘူး။

ပျိုးပင်ကာကွယ်ရေး သီးနှံပင်များ စိုက်ပျိုးပြီးစ အချိန်မှာ နွားချေးထည့်သွင်းပေးခြင်းဟာ မြေ၏ အငန်ဓာတ်ပေါက်မှုကို ယာယီလျော့နည်းစေပြီး ပျိုးပင်ငယ်များ အမြစ်ကောင်းစွာ ခြေကုပ်ယူရန် အချိန်ရ စေပါတယ်။

#မြေဆီလွှာ#စိုက်ပျိုးရေး#ဆားငန်မြေ#earth#soi#soil#environment

လေးဝတီ FM