အမ်းမြို့ ကို ဉီးတည်ပြီး စစ်ကြောင်းထိုးလာတဲ့ စစ်ကောင်စီအဖွဲ့ဟာ အမ်း-ပဒါန်းလမ်းပိုင်း ရိုးမပေါ်က ချင်းတိုင်းရင်းသားကျေးရွာ သုံးရွာကို ရွာလုံးကျွတ်မီးရှို့ဖျက်ဆီးခဲ့တယ်လို့ သတင်းရရှိပါတယ်။
တပ်မ (၈၈) က တပ်သား၁၀၀ ဝန်းကျင်ပါတဲ့ စစ်ကြောင်းဟာ ဒီကနေ့မနက် အစောပိုင်းက အမ်း-ပဒါန်းလမ်းပိုင်းပေါ်က ဘုံးဘောကျေးရွာ၊ ဂုတ်ကြီးကျေးရွာ နဲ့ သဘောက်ကျေးရွာ တို့ကို ရွာလုံးကျွတ်မီးရှို့ဖျက်ဆီးခဲ့ တယ်လို့ သတင်းရင်းမြစ်က ပြောပါတယ်။
“ရွာတွေက လမ်းပန်းဆက်သွယ်ရေးခက်တဲ့ ရိုးမထဲက ရွာတွေ ပါ၊ အများအားဖြင့် တောင်ယာလုပ်တဲ့ ချင်းလူမျိုးတွေ နေကြပါတယ်၊ ဘုံးဘောရွာကိုဆို နှစ်ခါပြန်ရှို့ပါတယ်” လို့ လေးဝတီFM ကို ပြောပါတယ်။
မီးရှို့ဖျက်ဆီးခံရတဲ့ ကျေးရွာတွေဖြစ်တဲ့ ဘုံးဘောကျေးရွာ အိမ်ခြေ ၁၀၀ ၊ သဘောက်ကျေးရွာ အိမ်ခြေ ၂၀ နဲ့ ဂုတ်ကြီးကျေးရွာ အိမ်ခြေ ၈၀ ဝန်းကျင်ရှိပြီး အဲ့ဒီရွာက ရွာသူ ရွာသားတွေ ဟာ တောတောင်တွေထဲကို ထွက်ပြေးတိမ်းရှောင်နေရတယ်လို့ပြောပါတယ်။
“အခုအထိ အဲ့ဒီရွာတွေ အနီး အနားမှာ စခန်းချလို့ ရှိပါသေးတယ်။ လေယာဉ်လဲ ဂုတ်ကြီးရွာနား ကို တနေကုန်ဝဲပါတယ်” လို့ သတင်းရင်းမြစ်က ပြောပါတယ်။
အမ်း-ပဒါန်းလမ်းပိုင်းပေါ် ရိုးမတောထဲမှာ တောတွင်းတိုက်ပွဲ သုံးနေရာလောက် ဖြစ်နေတယ်လို့ စစ်ရေးသတင်းရင်းမြစ်က ပြောပါတယ်။
ငဖဲမြို့နယ်ဘက်အခြမ်းမှာ PRA(မကွေး) နဲ့ AA ပူးပေါင်းအဖွဲ့တို့နဲ့ စစ်ကောင်စီတို့ တိုက်ပွဲတွေဖြစ်နေပြီး ၊ အမ်းရိုးမ ပေါ်မှာတော့ AA နဲ့ စစ်ကောင်စီတို ထိတွေ့တိုက်ပွဲတွေ နှစ်နေရာလောက် ဖြစ်နေတယ်လို့ ဆိုပါတယ်။
စစ်ကောင်စီဘက်ဟာ ရခိုင်ပြည် အမ်းမြို့က (နပခ) မကျရေးအတွက် စစ်ကူစစ်ကြောင်းတွေကို ပို့လွှတ်နေပြီး အဲ့ဒီတပ်ဖွဲ့တွေဟာ လမ်းပိုင်းပေါ်မှာ အခုလို တိုက်ပွဲတွေ ဖြစ်နေကြတာဖြစ်ပါတယ်။
အမ်းချောင်းသူ (လေးဝတီ FM)ရေးသည်။
