အမ်းနပခဌာနချုပ် ထဲ မှာ ပိတ်မိနေတဲ့ စစ်ကောင်စီတပ်သားတွေ အတွက် စစ်ကူနဲ့ ရိက္ခာတွေကို လေကြောင်းက နေ့ရောညပါ ပို့ဆောင်နေ ပြီး အဲ့ဒီ ရိက္ခာတွေ တွေကို AA က ထပ်မံသိမ်းဆည်း ရရှိတယ်လို့ သိရပါတယ်။
အမ်းနပခဌာနချုပ်ထဲမှာ စစ်ကောင်စီ ပူးပေါင်းတပ်တွေ ဟာ စုပေါင်း ခံစစ်ပြင် ထားပြီး အင်အား
ရာနဲ့ချီပြီး ရှိသေးတဲ့ အတွက် အဲ့ဒီတပ်ဖွဲ့တွေ အတွက် ရိက္ခာတွေကို လေကြောင်းကနေ နေ့စဉ်ပို့ဆောင်နေတာဖြစ်တယ်လို့ စစ်ရေးသတင်းရင်းမြစ်က ပြောပါတယ်။
“နိုဝင်ဘာ ၂၇၊၂၈ ရက်နေ့က ညနေ က စပြီး ညဉ့်၁၁ နာရီထိလာချပေးတယ်။ ရိက္ခာထုပ်တွေမှာမီးသီးတွေတပ်ထားတယ်။နပခဌာနချုပ်ကွင်းထဲလည်းကျတယ် ၊ အပြင်လည်းကျတယ်။ အပြင်က အထုတ်တွေတော့ သူတို့ မကောက်ရဲဘူး။ ထွက်ကောက်တဲ့ လူကို စနိုက်ဘာနဲ့ ပစ်တာ လေးယောက်ထိထားတယ်၊ ဒီဘက်က အထုတ်တွေ ကို တော့ အကုန် AA က သိမ်းတယ် သူတို့ ဌာနချုပ်ထဲက တစ်လှမ်းမှ အပြင်ထွက်လို့မရဘူး အဲ့ အထဲမှာ ပဲ စုနေကြတယ် ” လို့ စစ်ရေးသတင်းရင်းမြစ်က ပြောပါတယ်။
အဲ့ဒီရိက္ခာထုတ်တွေဟာ အမျိုးအစားလိုက် အစားအသောက်များ ၊ အရက်ပျံ ၊ ဆေးဝါး နဲ့ ကျည်ဆံတွေ ပါဝင်တယ်လို့ ဆိုပါတယ်။
ပြီးခဲ့တဲ့ ရက်ပိုင်းကလည်း နပခ ထဲကို လာပို့တဲ့ ရိက္ခာတွေကို အခုလိုမျိုး သိမ်းဆည်းရရှိခဲ့ပါသေးတယ်။ နိုဝင်ဘာ ၂၇ ၊ ၂၈ ရက်တွေမှာ လည်း စစ်ကောင်စီရဲ့ ရိက္ခာ နဲ့ လက်နက်တွေကို အာရက္ခတပ်တော်က ထပ်မံသိမ်းယူခဲ့တာဖြစ်ပါတယ်။
နပခ ဌာနချုပ်ရဲ့ ရိက္ခာနဲ့ ထောက်ပို့ စခန်း ၊အမှတ် (၉၂၆) ထောက်ပံ့နှင့်ပို့ဆောင်ရေးတပ် ကို အာရက္ခတပ်တော်က နိုဝင်ဘာ ၁၅ ရက်ကတည်းက ပဲ အပြီးသတ်သိမ်းပိုက်ထားတယ်လို့ လေးဝတီ fm က သတင်းရရှိထားပါတယ်။
ဒါအပြင် အဲ့ဒီ ထောက်ပို့ တပ်ကို သိမ်းပိုက်တဲ့ အချိန်မှာ ရှော့တိုက်ဒုန်းနဲ့ ပစ်ခတ်ခံရပြီး ရိက္ခာ ဂိုဒေါင်လည်း မီးလောင်ပေါက်ကွဲခဲ့ ပါတယ်။
လတ်တလောမှာ နပခ ဌာနချုပ်ထဲက လက်ကျန်ခုခံနေတဲ့ အဖွဲ့တွေဟာ စားနပ်ရိက္ခာပြတ်လတ်လာတဲ့ အခြေအနေကိုလည်းကြုံနေရတဲ့ အခြေအနေမျိုးရှိတယ်လို့ စစ်ရေးသတင်းရင်းမြစ်က ပြောပါတယ်။
” စစ်ကူတွေကိုလည်း ဌာနချုပ်ထဲဲကို ပို့တယ်၊ စနိုက်ဘာ သမားတွေ လို့ သိရတယ်” လို့ စစ်ရေးသတင်းရင်းမြစ်က ပြောပါတယ်။
လတ်တလောမှာ စစ်ကောင်စီရဲ့ အနောက်ပိုင်းတိုင်းစစ်ဌာနချုပ်ဟာ မောင်တောမှာရှိတဲ့ စကခ (၅) လို ပတ်လည်ကနေ ပိတ်ဆို့ တိုက်ခိုက်တာကိုခံနေရတာဖြစ်ပါတယ်။
နပခ ဌာနချုပ်ထဲမှာ အမည်စာရင်းအားဖြင့် အမှတ် (၉၄၆) ဆောက်လုပ်ရေးအင်ဂျင်နီယာတပ်ခွဲ ၊ အမှတ် (၇၅၇/၂) လျှပ်စစ်အလုပ်ရုံတပ်ခွဲ ၊အမှတ် (၉) ဆက်သွယ်ရေးလုံခြုံမှုတပ်ရင်း ၊ အမှတ် (၈) အဆင့်မြင့်ဆက်သွယ်ရေးတပ်ရင်း ၊ အမှတ် (၁၀) တပ်ထိန်းတပ်ခွဲ တို့ ကျန်ရှိနေသေးတာ ဖြစ်ပါတယ်။
ဒါအပြင် စစ်ကောင်စီရဲ့ စစ်ကူ စစ်ကြောင်းတွေကို ပို့လွှတ်ထားပြီီးအဲ့ဒီ စစ်ကြောင်းတွေဟာ အမ်း ရိုးမ ထဲမှာ ကြားဖြတ်တိုက်ခိုက်ခံနေရ တာဖြစ်ပါတယ်။
အမ်းချောင်းသူ (လေးဝတီ FM)ရေးသည်။
