ရခိုင်ပြည်နယ် မြောက်ဦးမြို့ရှိ စစ်ကောင်စီမှ ဗုံးကျဲတိုက်ခိုက်မှုကြောင့်
မီးလောင်ပျက်စီးသွားသော နေအိမ်များ ပြန်လည်ပြင်ဆင် တည်ဆောက်ရန် ပြည်တွင်း ပြည်ပ
အလှူရှင်များကိုယ်စား ၂၄၁သိန်း ကျပ်ကို စာရေးဆရာ ကိုဝေဟင်အောင်က
လှူဒါန်းပေးခဲ့ကြောင်း သိရပါတယ်။
\”တစ်အိမ်ထောင်ကို တစ်သိန်းနှုန်းနဲ့ မီးလောင်သွားတဲ့ အိမ် ၂၄၁ လုံးကို ကနဦး
ကူညီပေးခဲ့တာပါ။ ဆက်ပြီးတော့ ပုဏ္ဏားကျွန်း နဲ့ စစ်တွေမြို့နယ်ထဲက မီးထဲပါသွားတဲ့ ရွာတွေကို
ဆက်လက်ကူညီမှာပါ\” လို့ အလှူရှင်များကိုယ်စား ကူညီပေးနေသူ စာရေးဆရာ ကိုဝေဟင်အောင်
က ဆိုပါတယ်။
ပြည်တွင်း ပြည်ပ အလှူရှင်များမှ လှူဒါန်းထားသည်မှာ သိန်း ၅၀၀ ခန့် ရရှိခဲ့ပြီး ကနဦးအနေဖြင့်
မြောက်ဦးမြို့ကို စတင်ကူညီပေးနေပြီး ဆက်လက်၍ အခြားမြို့နယ်များကိုလည်း
ကူညီပေးသွားမည်ဖြစ်ကြောင်း သိရပါတယ်။
\”အိမ်တစ်လုံးစာ ပြန်မရနိုင်ပေမယ့် အထောက်အကူတစ်ခု ဖြစ်စေတဲ့အတွက် အလှူရှင်တွေကို
ကျေးဇူးတင်ပါတယ်။ အမြန်ဆုံး ကိုယ့်အိမ်ကိုယ်ပြန်နေခွင့်ရပြီး အေးအေးချမ်းချမ်း
နေချင်နေပြီ\” လို့ မြောက်ဦး‌ဒေသခံတစ်ဦးက ဆိုပါတယ်။
ကနဦး လှူဒါန်းမှုကို မြောက်ဦးမြို့ တစ်မြို့နယ်လုံးကို ကိုယ်စားပြုဖွဲ့စည်းထားသော
စစ်ဘေးရှောင်ကော်မတီမှတဆင့် လွှဲအပ်လှူဒါန်းခဲ့ကြောင်း သိရပါတယ်။