ဂွစစ်မျက်နှာပြင်မှာ AA ရင်ဆိုင်နေရတဲ့ အရာရှိ စစ်သည် တွေကို လက်နက်မချ ဖို့ မိသားစုတွေကို အကြပ် ကိုင်ထားတယ်လို့ စစ်တပ် အသိုင်းအဝိုင်း က သိရပါတယ်။
တိုက်ပွဲအပြင်းအထန် ဖြစ်ပွားနေတဲ့ ဂွမြို့ စစ်မျက်နှာပြင် ကို ပို့လွှတ်ခံရတဲ့ တပ်မမှူး၊ စစ်ကြောင်းမှူး ၊ ဗိုလ်ကြီး ၊ အရာခံ ဗိုလ်၊ တပ်ကြပ် နဲ့ အရာရှိ အသီးသီးရဲ့ မိသားစုတွေကို ဧရာဝတီတိုင်း အနောက်တောင်တိုင်းစစ်ဌာနချုပ် လက်အောက်မှာ ဖွင့်ထားတဲ့ စစ်သင်တန်းကျောင်းမှာ စုဝေးခေါ်ဆောင်ထားတယ်လို့သိရပါတယ်။
“အခုတပ်မိသားစုတွေ ကို သင်တန်းကျောင်းကို ခေါ်ထားတယ်။ ရှေ့တန်းရောက်နေတဲ့ တပ်ဖွဲ့ဝင် အရာရှိတွေကို အကြပ်ကိုင်ထားတယ်၊ သူတို့ မိန်းမတွေ ကလေးတွေက စစ်ကောင်စီလက်ထဲမှာလေ လက်နက်ချလို့မရဘူး ၊ ပြီးတော့ ရှေ့တန်းက လူတွေကို မူးယစ်ဆေးကျွေးပြီး တိုက်ခိုင်းတယ်၊ ဘာမှ တုံ့ပြန်လို့မရဘူး အသေခံနေရတယ်” လို့ တပ်မိသားစု အသိုင်းအဝိုင်း သတင်းရင်းမြစ်က ပြောပါတယ်။
ဂွမြို့ သိမ်းတိုက်ပွဲ မှာ AA ရဲ့ ထိုးစစ်ကို ရေကြောင်း၊ လေကြောင်းနဲ့ လက်နက်ကြီးအမြှောက်တပ်တို့က ခုခံနေပေမယ့် လက်နက်ငယ် တိုက်ပွဲ တွေ အတွင်း အစုလိုက် အလင်းဝင်လာကြတယ်လို့ သိရပါတယ်။
“သူတို့ က တော့ လုံခြုံရေးအတွက် တပ်က ခေါ်ထားတာဆိုပြီးပြောတယ်၊ အဲ့ဒီကျောင်းမှာရောက်နေတဲ့ လူတွေက စစ်သင်တန်းအတွက် လိုတာ အကုန်လုပ်ပေးရတယ်၊ ရှေ့တန်းက လူတွေ ထွက်ပြေးရင် မိန်းမတွေအသေပဲ လို့ ခြိမ်းခြောက်ထားတယ် ” လို့ သတင်းရင်းမြစ်က ပြောပါတယ်။
ဧရာဝတီတိုင်း မှာရှိတဲ့ အနောက်တောင်တိုင်းစစ်ဌာနချုပ် လက်အောက်မှာ စစ်မှုထမ်းသင်တန်း တွေကို အပတ်စဉ် အလိုက်ပို့ချလာတာ အခုဆိုရင် အမှတ်စဉ် ၈ အထိ ရောက်လာပြီဖြစ်ပါတယ်။
လက်ရှိ ဂွမြို့သိမ်းတိုက်ပွဲအခြေအနေ က တော့ ဆက်လက်ပြင်းထန်နေပြီး စစ်ကောင်စီရဲ့ စစ်ကူထပ်ပို့နေတဲ့ လမ်းကြောင်းတွေ ကို ဖြတ်တောက်ရေးအတွက် AA က ဂွ ရိုးလမ်းကို ထိမ်းချုပ်ဖို့ ကြိုးစားနေတယ်လို့ သိရပါတယ်။
ဂွမြို့သိမ်းတိုက်ပွဲဟာ ဒီဇင်ဘာလ အတွင်းမှာ ပြင်းထန်လာခဲ့ပြီး စစ်ကောင်စီဟာ အင်အားအမြောက်အများကို ပို့လွှတ်နေတာဖြစ်ပါတယ်။
အဉ္စနလီညှင်း (လေဝတီFM)ရေးသည်။
