ရခိုင်ပြည်၊ မြို့တော်စစ်တွေမြို့ပြင်နေရာ အချို့မှာ တိုက်ပွဲတွေဖြစ်လာတဲ့ အတွက် ဘေးလွတ်ရာတိမ်ရှောင်ဖို့ စီစဉ်လာကြတဲ့ဒေသခံ စစ်ရှောင်တွေကို လွတ်မြောက်နယ်မြေတွေ ဆီကို ပို့ဆောင်ပေးမယ်ဆိုပြီး ငွေကြေးလိမ်လည်မှုတွေရှိနေတယ်လို့ သိရပါတယ်။

စစ်တွေမြို့ထဲမှာ ပိတ်မိနေတဲ့သူတွေအထဲက စစ်ဘေးရှောင်လိုသူ ဒေသခံတချို့ကို ALP အဖွဲ့ဝင်တွေက လွတ်မြောက်နယ်မြေတွေဆီ
ပို့ပေးဖို့ လူတစ်ဦးကို ငွေကျပ် ၁၅သိန်းအထိတောင်းယူထားပေမယ့် လမ်းတစ်ဝက်မှာ စစ်ကောင်စီလက်ထဲကို ထည့်လိုက်တဲ့ ဖြစ်ရပ်တွေ ဖြစ်ပွားနေတယ် လို့ သတင်းရရှိပါတယ်။

” အဓိက ALPကလူတွေ လုပ်နေတာ ၊ သူတို့က ဘယ်လိုလုပ်ထားလဲဆိုတော့ စစ်သားတွေကို ငါတို့ဒီနေ့ ဘယ်နေရာကိုသွားဖို့ရှိတယ်။ ဒေသခံလူဘယ်လောက်ပါတယ်ဆိုပြီး စစ်ကောင်စီနဲ့အရင်တိုင်ပင်ထားတယ် ။ ပြီးမှ ဂွင်ဆင်ပြီး ဖမ်းတာ။ ဒီတော့ပိုက်ဆံကိုစစ်ကောင်စီကသိမ်းလိုက်တဲ့ပုံစံနဲ့လိမ်စားနေတာ ” လို့ အမည်မဖော်လိုတဲ့ သတင်းရင်းမြစ်က ပြောပါတယ်။

စစ်တွေ ဒေသခံ တွေကို ပေါက်တော၊ ပုဏ္ဏားကျွန်း၊ မြောက်ဦးဘက်ကို ရေလမ်းကြောင်းအတိုင်းစက်လှေ နဲ့ပို့ပေးမယ်ဆိုပြီး ALPနဲ့ပူးပေါင်းတဲ့သူတွေက အခုလို စည်းရုံးခေါ်ဆောင်တာဖြစ်တယ်လို့ ဒေသခံအမျိုးသားတစ်ယောက်က ပြောပါတယ်။

” ရေလမ်းကိုအဓိကထားပြီးပို့နေတာ။ စစ်ကောင်စီကိုကြောက်စရာမလိုဘူး။ ဘာမှမဖြစ်ဘူးဆိုပြီးစည်းရုံးပြီးပိုက် ဆံတောင်းပြီးရင် စစ်ကောင်စီကို လမ်းက စောင့်ပြီး ဖမ်းခိုင်းတယ် ။ပြီးရင်တစ်ယောက်တစ်ဝက်ဝေစားမျှစားနေတာ” လို့ ပြောပါတယ်။

ALP ပါတီက တပ်သားတွေဟာ ရခိုင်လူမျိုးတွေ ဖြစ်တဲ့ အတွက် ဒေသခံတွေကို စည်းရုံးရတာ လွယ်ကူနေတဲ့ အခြေအနေလည်းဖြစ်ပါတယ်။

စစ်တွေမြို့ မှာ စစ်ကောင်စီနဲ့ ပူးပေါင်း လှုပ်ရှားနေတဲ့ ALP ပါတီဟာ ဒေါ်စောမြရာဇာလင်း ဦးဆောင်တဲ့ အဖွဲ့ဖြစ်ပြီး လက်နက်၊ယူနီဖောင်း ၊ ရိက္ခာ ၊ လစာ တွေကို စစ်ကောင်စီဆီ က ရရှိထားတဲ့ လက်နက်ကိုင် အင်အားစုဖြစ်ပါတယ်။

စစ်တွေမှာ ALP အပါအဝင် စစ်သင်တန်းဆင်းမွတ်ဆလင်၊ စစ်သားနဲ့ရဲတွေဟာ မြို့တွင်းလုံခြုံရေး အဓိကတိုးမြှင့်ထားပြီး ဒေသခံတွေကို မြို့ပြင်ကိုသွားလာခွင့်ပိတ်ပင်ထားတာပါ။

စစ်တွေ‌မြို့တွင်းကဒေသ‌ခံတွေဟာ လည်း လက်နက်အပြန်အလှန်ပစ်ခတ်သံတွေကြောင့် စိုးရိမ်မှုမြင့်တက်ကာ အခက်ခဲရောက်နေကြရတယ်လို့ ဆိုပါတယ်။

အဉ္စနလီညှင်း ၊ လေးဝတီFM