ရခိုင်ပြည် အမ်းမြို့ နပခ ဌာနချုပ်အနီးက ရပ်ကွက်သူရပ်ကွက်သား ၁၀၀ ကျော်ကို စစ်ကောင်စီတပ်သားတွေ က လူသားဒိုင်းအဖြစ်ခေါ်ဆောင်သွားပြီး နပခ ဌာချုပ်ထဲမှာ ဖမ်းဆီးထားတယ်လို့ မြေပြင်စစ်ရေးသတင်းရင်းမြစ် က ပေးပို့ပါတယ်။

အမ်းမြို့ တစ်ခုလုံးမှာ နေ့ရောညပါ တိုက်ပွဲဖြစ်ပွားနေတာ တစ်ပတ်လောက်ကြာမြင့်ပြီ ဖြစ်ပြီး ပြီးခဲ့တဲ့ နိုဝင်ဘာ ၁၇ ရက်မှာ တော့ စစ်ကောင်စီတပ်သားတွေက အောက်ရွာရပ်ကွက်ထဲကို ဝင်ရောက်လာပြီး စစ်ပွဲထဲမှာ ပိတ်မိနေတဲ့ အရပ်သား တွေ ကို နပခ တပ်ဝန်းထဲကို ခေါ်သွားတယ်လို့ မျက်မြင် သတင်းရင်းမြစ်က ပြောပါတယ်။

“အောက်ရွာစာသင်ကျောင်းမှာနေတဲ့ လူတွေကို ဖမ်းတယ် ။ အများစုက ရွာတွေဘက်က စစ်ရှောင်တက်လာတဲ့ လူတွေပါ ၊ နောက်ပြီး ဈေးတန်းဘုန်းကြီးကျောင်းပိုင်းကလည်းပါသွားတယ်” လို့ လေးဝတီ FM ကို ပြောပါတယ်။

အမ်းမြို့နယ် ထဲ က ကျေးရွာ အချို့ ကို စစ်ကောင်စီက ရွာလုံးကျွတ်မီးရှို့တာတွေ ၊ လက်နက်ကြီးနဲ့ ပစ်ခတ်တာတွေ ၊လေကြောင်းက ဗုံးကြဲတာတွေကို မြို့ပေါ်တိုက်ပွဲမဖြစ်ခင်ကတည်းက ပြုလုပ်နေတာဖြစ်ပါတယ်။ ဒါကြောင့် ကျေးရွာတွေမှာနေထိုင်တဲ့ဒေသခံတွေဟာ အမ်းမြို့ပေါ် မှာ တက်ပြီးစစ်ရှောင်နေကြတာလည်းဖြစ်ပါတယ်။

အမ်းမြို့ အနီးက ချင်းကုန်း ၊ ခရမ်းကျွမ်း နဲ့ ပြောင်းချောင်း ၊ ကြောင်ဖြူကွင်း စတဲ့ ကျေးရွာဒေသခံတွေဟာလည်း မြို့ပေါ်ကို အရေးပေါ်စစ်ရှောင်လာကြတာ ဖြစ်ပါတယ်။

“လွန်ခဲ့တဲ့ သုံးရက်က အောက်ရွာမှာလက်နက်ကြီးလာဆင်တယ်၊ အခု အဲ့လက်နက်ကြီးတွေပါ ဖြုတ်ပြီး ဌာနချုပ်ထဲ ပြန်ဆုတ်သွားတဲ့အချိန်မှာ လူသားဒိုင်းအဖြစ် ခေါ်သွားတာပါ “ လို့ ဒေသခံ သတင်းရင်းမြစ်က ပြောပါတယ်။

မြို့ပေါ်တိုက်ပွဲ(မြို့သိမ်းတိုက်ပွဲ)စတင်နေပြီဖြစ်တဲ့ နပခဌာနချုပ် အမ်းမြို့တွင်စစ်ကောင်စီ နှင့် အာရက္ခတပ်တော်တို့ ဟာ တစ်ရက်ထက်တစ်ရက် တိုက်ပွဲတွေ ပိုမိုပြင်းထန်လာပြီး စစ်ကောင်စီဟာ ခုခံစစ် တွေ ကို တဖြည်းဖြည်းနောက်ဆုတ်နေရတဲ့ အခြေအနေဖြစ်ပါတယ်။

ပြီးခဲ့တဲ့ ရက်လည်း နပခ ဌာနချုပ်လက်အောက်က ရိက္ခာတပ်ရင်းဖြစ်တဲ့ အမှတ် (၉၂၆ ) တပ် ကို AA က သိမ်းပိုက်ထားပြီး နပခရဲ့ တပ်ရင်း ၁၀ ခု လောက်ကို သိမ်းထားနိုင်ပြီဖြစ်ပါတယ်။

ကောင်စီသည် မြို့အနှံ့ ကို ဂျက်ဖိုက်တာ ၊ Y12 တို့ကိုအဓိက ထားအသုံးပြုတိုက် နေမှု ကြောင့် ဒီတစ်ပတ်ထဲမှာ မြို့ပေါ်နေအိမ်များ ၃၀ထက်မနည်းထိခိုက်ပျက်စီးမီးလောင်ခဲ့ရတယ်လို့ သိရပါတယ်။

အဉ္စနလီညှင်း(လေးဝတီ FM)ရေးသည်။