အမ်း- ပဒါန်းလမ်းပေါ်မှာရှိတဲ့ နတ်ရေကန်ဗျူဟာကုန်းရဲ့ တောင်ခြေရင်းမှာ AAနှင့် စစ်ကောင်စီတို့ အပြန်အလှန်အနီးကပ်တိုက်ပွဲဖြစ်နေပြီး စစ်ကောင်စီတပ်သားတွေဟာ တိုက်ပွဲအတွင်းက ထွက်ပြေးနေကြတယ် လို့ သတင်းရရှိပါတယ်။

နတ်ရေကန်ဗျူဟာကုန်း ကို AA ဘက်က ဒီကနေ့ ဖေဖော်ဝါရီ ၁၈ရက် နေ့ မနက်ကနေ အနီးကပ်ထိုးစစ်ဆင်နေပြီး တိုက်ပွဲပြင်းထန်နေတဲ့ အတွက် စစ်ကောင်စီတပ်သားတွေဟာ ကစဉ့်ကလား ထွက်ပြေးနေကြတယ် လို့ စစ်ရေးသတင်းရင်းမြစ်က ပြောပါတယ်။

” နတ်ရေကန်မရောက်ခင်က မထုံကာကင်းစခန်းကို သိမ်းပြီး အခုနတ်ရေကန်ကို AA စလို့တိုက်ခိုက်နေတာ။ တောင်ခြေရင်းမှာလည်း တိုက်ပွဲပြင်းနေတယ်။ လေကြောင်းကနေလည်းဗုံးကြဲတိုက်ခိုက်နေတယ် ၊ စကစ တွေ ထွက်ပြေးနေကြတယ် “လို့ မြေပြင်စစ်ရေး သတင်းရင်းမြစ်က လေးဝတီ FM ကို ပြောပါတယ်။

အာရက္ခတပ်တော်ရဲ့ ထိုးစစ်ကို စစ်ကောင်စီဘက်က ငဖဲမြို့နယ်မှာရှိတဲ့ တပ်ရင်းတွေကနေ လက်နက်ကြီးပစ်နေပြီး ၊ AA ဘက်ကလည်း အလုံးအရင်းနဲ့ ထိုးစစ်ဆင်နေတယ်လို့ သိရပါတယ်။

” လက်နက်ကြီးကတော့ တဖက်နဲ့တဖက်ပစ်ခတ်နေတယ်။ အနီးအနား‌ တွေမှာ ထိခိုက်ပျက်စီးမှုတွေရှိနေတယ်၊ လေကြောင်းလာကြဲနေတဲ့ အချိန်မှာ သူတို့ ထွက်ပြေးကြတယ်” လို့ သတင်းရင်းမြစ်က ပြောပါတယ်။

အမ်း- ပဒါန်းလမ်းပေါ်က စစ်ကောင်စီရဲ့ မထုံးကာကင်း စခန်းကို အာရက္ခတပ်တော်(AA)မှ ဖေဖော်ဝါရီ ၁၆ရက်နေ့ကသိမ်းပိုက်နိုင်ခဲ့ပြီး လက်နက်ခဲယမ်းနဲ့ စစ်ကောင်စီတပ်ဖွဲ့ဝင်တချို့ကိုဖမ်းမိထားပါတယ်။

အဉ္စနလီညှင်း
လေး၀တီFM