မြောက်ဦးမြို့ လေးမြို့မြစ်ဘေးက စိုက်ပျိုးရေးလုပ်ကိုင်တဲ့ ညောင်ပင်လှကျေးရွာကို ဖေဖော်ဝါရီ ၂၅ ရက်ညနေပိုင်းက စစ်ကောင်စီ လေကြောင်းက တိုက်ခိုက်ခဲ့ပါတယ်။
လေးမြို့မြစ်ဘေးမှာ စိုက်ပျိုးရေးလုပ်ငန်းကို တွင်တွင်ကျယ်ကျယ်စတင်လုပ်ကိုင်လာတဲ့ အဲ့ဒီကျေးရွာကို စစ်ကောင်စီ လေကြောင်းက တိုက်ခိုက်ခဲ့တာဖြစ်ပြီး စိုက်ပျိုးရေးလုပ်ကွက်နေရာကို ကျရောက်ပေါက်ကွဲခဲ့တယ်လို့ သတင်းရရှိပါတယ်။
“ပြန်လည်ထူထောင်ရေးအတွက် စီးပွားဖြစ်စိုက်ပျိုးရေးလုပ်တဲ့နေရာတွေ ၊ မွေးမြူရေးလုပ်တဲ့နေရာတွေကို တိုက်ခိုက်တာပါ၊ စစ်ရေး ပစ်မှတ်အတွက် တိုက်တာမဟုတ်ပါဘူး “ လို့ မြောက်ဦးဒေသခံတစ်ဦးက ပြောပါတယ်။
မြောက်ဦးမြို့နယ်ဟာ ရခိုင်ပြည်သိမ်းတိုက်ပွဲရဲ့ အစောပိုင်းကာလကတည်းက လွတ်မြောက်ခဲ့တဲ့ မြို့ဖြစ်ပြီး မြို့တွင်းမြို့ပြင် ပြန်လည်ထူထောင်ရေးကို စတင်နိုင်ဖို့ ကျိုးပမ်းနေတာဖြစ်ပါတယ်။
“အနှောက်အယှက်ပေးချင်လို့ တိုက်ခိုက်တာပါ ၊ စိုက်ခင်းထဲကို ကျပါတယ်၊ လူအသေအပျောက်တော့မရှိပါ” လို့ သတင်းရင်းမြစ်က ပြောပါတယ်။
အခု လေကြောင်းတိုက်ခိုက်ခံရတဲ့ ညောင်ပင်လှကျေးရွာဟာ မြောက်ဦးမြို့နဲ့ ငါးမိုင်ခန့်ဝေးပြီး ရွာသူ ရွာသားအများစုဟာ စိုက်ပျိုးရေးနဲ့ ပြန်လည်ထူထောင်ရေးကို စတင်နေတာဖြစ်ပါတယ်။
လေးမြို့မြစ်ကမ်းဘေးမှာ က စိုက်ပျိုးမြေတွေကို အမှီပြုပြီး ဒေသခံတွင်း အစားအသောက်နဲ့ ရိက္ခာဖူလုံရေးအတွက် စတင်ကြိုးပမ်းနေကြတာဖြစ်ပါတယ်။
အဉ္စနလီညှင်း
လေးဝတီ FM
