တိုက်ပွဲအရိပ်အယောင်တွေ ဖြစ်ပေါ်စပြုလာတဲ့ စစ်တွေမြို့ မှာ အာရက္ခတပ်တော် AA ရဲ့ ထိုးစစ်ကို ခုခံဖို့ စစ်ကောင်စီဘက်က ရေတပ်ကို အဓိက အားထားပြင်ဆင်ထားတယ်လို့ စစ်ရေးသတင်းရင်းမြစ်တွေ ဆီက သတင်းရရှိပါတယ်။
စစ်ကောင်စီရေတပ်ဟာ ရွှေမင်းဂံ ၊ဆတ်ရိုးကျ ၊ မင်းဂံ၀၊ စစ်တွေပွိုင့် ၊ ပေါက်တောမြစ်ဝ ၊ ဉီးရဇ်တောင်မြစ်ဝ၊ ရေချမ်းပြင် စတဲ့နေရာတွေမှာ နေဗီ သဘေ်ာတွေ ၁၀ စီးထက်မနည်းအထိုင်ချ ပြီးမြို့ကို ဝန်းရံထားတာဖြစ်ပါတယ်။
“စစ်တွေမြို့ရေတပ်ကတော့ ပုဏ္ဏားကျွန်းနဲ့ ပေါက်တောဘက်တွေကို ၊ အဓိကလှုပ်ရှားပါတယ်။ မကြာခဏ အဲ့ဘက်ကို ရေတပ်လက်နက်ကြီးနဲ့ ပစ်တယ်။ ရေတပ်က နေ့ရောညပါ စစ်ရေးလှုပ်ရှားနေတယ်” လို့ နောက်ထပ်သတင်းရင်းမြစ် တစ်ဦးက ပြောပါတယ်။
ဒေသစစ်ဆင်ရေး ကွက်ကဲမှုဌာနချုပ်(ဒကစ) နဲ့ အတူ အနောက်ပိုင်းတိုင်း စစ်ဌာနချုပ် (နပခ) ရဲ့ လုပ်ငန်းစဉ် တစ်ချို့ကို စစ်တွေမှာ ပြောင်းရွှေ့လည်ပတ်နေပြီး စစ်ဆင်ရေးကွက်ကဲမှုတွေကို စစ်တွေ က နေတိုက်ရိုက်ကွက်ကဲနေတာလည်း ဖြစ်ပါတယ်။
ကြည်းတပ်၊ ရေတပ် ၊ အမြှောက်တပ်နဲ့ ခြေလျှင်တပ်တွေ အပြင် ၊ မွတ်ဆလင်စစ်သင်တန်းဆင်း ထောင်ချီကိုလည်း အင်အားဖြည့်ထားတယ်လို့ မြို့ခံ သတင်းရင်းမြစ်က ဆိုပါတယ်။
“စစ်ကောင်စီ ဒကစ ကနေပြီး နယ်ဖက်တွေကို အင်အားတွေ တိုးဖြည့်နေတယ်၊ သင်တန်းဆင်းမူဆလင်တွေများတယ်။ ရေတပ်က ထပ်ပို့ထားတဲ့ တပ်တွေလည်း များတယ်။ မနေ့ကတော့ ရေချမ်းပြင်ဘက်ကို ကား တွေ နဲ့ ထွက်သွားကြတယ်” လို့ သတင်းရင်းမြစ် တစ်ဉီးကပြောပါတယ်။
စစ်တွေ ဒကစ ဌာနချုပ်ဟာ ရန်ကုန် -စစ်တွေကားလမ်းမကြီးပေါ်မှာရှိပြီး ၊ ဒကစ အဝင် ကျားမသောက်စစ်ဆေးဂိတ်၊ စစ်တွေမြို့အဝင် တပ်ထိန်းဂိတ်၊ ရေချမ်းပြင်စစ်ဆေးရေးဂိတ် ၊ ပါဒလိတ် စစ်ဆေးရေးဂိတ်၊ ဆပ်ရိုးကျ တံတား တို့မှာ လက်နက်ကြီး အမြှောက်တပ်နဲ့ အတူ ကြည်းတပ်တွေ စုစည်းထားပါတယ်။
စစ်တွေနဲ့ တစ်ဖက်ကမ်းမှာ ရှိတဲ့ ကျေးရွာတွေ ကို လေကြောင်း နဲ့ ရေတပ်က တိုက်ခိုက်နေသလို မြို့ထဲကိုလည်း တင့်ကားတွေနဲ့ လှည့်လည် အင်အားပြတာတွေ မကြာခဏ ပြုလုပ်နေတယ်လို့ ဆိုပါတယ်။
စစ်တွေမြို့ ဒကစ တပ်နယ် အတွင်းက ကျားမသောက်စစ်ဆေးရေးဂိတ် အနီးမှာ အာရက္ခတပ်တော်နဲ့ စစ်ကောင်စီတို့ တိုက်ပွဲဖြစ်ပွားခဲ့ပါသေးတယ်။
ဒါအပြင် ပုဏ္ဏားကျွန်းမြို့နယ် စပါးထား၊ အောင်ဇေယျ၊ ကန်ချောင်းနှင့် ကျွဲထိုးကျေးရွာကို စစ်ကောင်စီလက်နက်ကြီးများ ကျရောက်ခဲ့ပြီး စပါးထားကျေးရွာက နေအိမ် ၉ ဆောင်ပျက်စီးခဲ့ပါတယ်။
စစ်တွေမြို့ ဒကစ လက်အောက်မှာ ခမရ (၂၀) ၊ အမှတ် (၂၀) ခြေလျင်တပ်ရင်း၊ ခမရ (၂၃၂) ၊အမှတ်(၂၃၂) ခြေလျင်တပ်ရင်း (စစ်တွေ)
ခမရ (၂၇၀) အမှတ်(၂၇၀)၊ ခြေလျင်တပ်ရင်း (စစ်တွေ) ၊ ခမရ (၃၄၄) အမှတ်(၃၄၄) ခြေမြန်တပ်ရင်း (စစ်တွေ) ၊ ခမရ (၃၅၄) တို့ က စစ်မှုထမ်း မွတ်ဆလင်တွေကို ကြီးကြပ်ပြီးနေရာယူထားပါတယ်။
ဒါအပြင် ရဲတပ်ရင်း ၈ ခုနဲ့ စစ်ကောင်စီ မဟာမိတ် ALP တပ်တို့က မြို့ရွာ ရပ်ကွက်အတွင်း ကင်းလှည့်ခြင်းနဲ့ အရပ်သားတွေ ဖမ်းဆီးခြင်းတို့ကို ပြုလုပ်လျှက်ရှိပါတယ်။
အဉ္စလီညှင်း (လေး၀တီ(FM)
