ဧရာဝတီတိုင်း ရွှေသောင်ယံကမ်းခြေအနီးက ဘောမိရွာအထက်ပိုင်း(ချောင်းဖျား) ကို အာရက္ခတပ်တော်က သိမ်းပိုက်ထားပြီး အကျအဆုံးတွေနဲ့ စစ်ကောင်စီ စစ်ကြောင်း နောက်ဆုတ်သွားတယ်လို့ သတင်းရရှိပါတယ်။
ရွှေသောင်ယံကမ်းခြေ ဘောမိအထက်ချောင်းဖျားဘက်ကနေ တိုက်ပွဲစတင်ခဲ့ပြီး စစ်ကောင်စီလေကြောင်းတိုက်ခိုက်မှုကြားမှာ မြေပြင်တပ်စခန်းတွေကို ဇန်နဝါရီ ၁၆ ရက်က ထိမ်းချုပ်လိုက်တယ် လို့ဆိုပါတယ်။
“ဘောမိအထက်ပိုင်းကို AA ဘက်က ထိန်းလိုက်တဲ့အချိန်မှာ မကျည်းဇင်နဲ့ ဂွဘက်ကမ်းခြေတစ်လျှောက်ကို လေကြောင်းလာကြဲတာ မွမွကြေအောင်ကြဲသွားတာ ၊ မီးတွေလောင်နေပါတယ်” လို့ ရွှေသောင်ယံ စစ်ရှောင် တစ်ဦးက ပြောပါတယ်။
တိုက်ပွဲတွေကြောင့်လို့ ဘောမိ အထက်ပိုင်းဒေသခံတွေဟာ သပေါ့ကန်၊ သဲကုန်း၊ အုန်းချောင်းနဲ့ ရွှေသောင်ယံရပ်ကွက်တွေမှာ စစ်ဘေးရှောင်နေကြတယ်လို့ ဆိုပါတယ်။
ဘောမိကျေးရွာအုပ်စု ဟာ အထက်ချောင်းဖျားပိုင်းနဲ့ ဘောမိအောက်ပိုင်းဆိုပြီး ရွာတန်းရှည်များ ရှိနေတာဖြစ်ပါတယ်။
အဲ့ဒီဘောမိအောက်ဘက်အခြမ်းမှာ သဲကျင်း၊ ပိုးလောင်း ၊ကျွန်းချောင်း၊ ဝက်သေ ၊သပေါ့ကန်၊ သဲကုန်း ၊အုန်းချောင်း စသဖြင့် ရွာချင်းဆက် ကျေးရွာတွေ ရှိနေတာပါ။
ရွှေသောင်ယံကမ်းခြေဟာ မြို့နယ်ခွဲတစ်ခုစာကျယ်ပျံ့တဲ့ ကမ်းရိုးတန်းပင်လယ်ကွေ့တစ်ခုလည်းဖြစ်ပါတယ်။
အာရက္ခတပ်တော်ဟာ ရွှေသောင်ယံကမ်းခြေတစ်လျှောက်မှာ ရှိတဲ့ ကျေးရွာတွေကို ထိုးစစ်ဆင်နေပြီး ၊ ဂွနဲ့ ကမ်းခြေချင်းစပ်နေတဲ့ မကျည်းဇင် က နေ စတင်ထိုးစစ်ဆင်လာခဲ့တာဖြစ်ပါတယ်။
ဓာတ်ပုံ- ဇန်နဝါရီ ၁၇ ရက်မှာ မကျည်းဇင် နဲ့ ဂွကမ်းခြေကို လေကြောင်းတိုက်ခိုက်ခဲ့တဲ့ မြင်ကွင်း
အမ်းချောင်းသူ (လေးဝတီ FM)
