ရခိုင်ပြည် သံတွဲမြို့နယ် ဂျိတ္တော ငါးဖမ်းဇုံ က ကျော့ပိုက်လှေထွက် သူတွေဟာ ULA/AA ရဲ့ မြို့နယ်တာဝန်ခံ နဲ့ နယ်မြေမှူးတို့ ကို ဝေစုပေးပြီး ဖမ်းဆီးနေရတယ်လို့ သတင်းရရှိပါတယ်။
သံတွဲမြို့သိမ်းတိုက်ပွဲ နဲ့ ငပလီ ကမ်းခြေ သိမ်းတိုက်ပွဲ တွေ ပြီးဆုံးပြီး နောက်ပိုင်းမှာ ဂျိတ္တောဒေသခံတွေ ဟာ ရွာလုံးကျွတ်ထွက်ပြေးတိမ်းရှောင် ခဲ့ရတာဖြစ်ပါတယ်။
အခုအချိန်အထိ ကမ်းခြေ ငါးဖမ်းဇုံထဲကို ပြန်လည်ဝင်ရောက်နိုင်ခြင်းမရှိသေးပေမယ့် ဒေသဆိုင်ရာ တာဝန်ခံတွေ ၊ နယ်မြေမှူးတွေ နဲ့ ပတ်သက်သူတချို့က ကျော့ပိုက်လုပ်ငန်းကို ဝေစုခွဲပြီး လုပ်ကိုင်နေကြတယ်လို့ ဆိုပါတယ်။
“တခြားရွာခံတွေက ကမ်းခြေကို ဝင်လို့မရသေးဘူး ၊ တစ်ဖောင် နှစ်ဖောင်လောက်တော့ AA နဲ့ ပေါင်းပြီး ပင်လယ်ထွက်နေတာ ရှိတယ်။ သူတို့ နဲ့ ခွဲယူရတယ်၊ ဒါတောင်လုပ်ချင်သူတိုင်း လုပ်လို့မရ သူတို့ အထဲက လူကို နဲ့ အဆင်ပြေမှ ရတယ်” လို့ ဂျိတ္တော ဒေသခံတစ်ဦးက လေးဝတီ FM ကို ပြောပါတယ်။
ဂျိတ္တောငါးဖမ်းဇုံ ကျော့ပိုက်(ကျားဖောင်) လုပ်ငန်းက နေ ဒေသတွင်း ငါး ၊ ပုဇွန် ဖူလုံမှု နဲ့ အလုပ်အကိုင်အခွင့်အလမ်းတွေကိုလည်း နှစ်ပေါင်းများစွာ ရရှိခဲ့တာဖြစ်ပါတယ်။
သံတွဲမြို့သိမ်းတိုက်ပွဲ ၊ ငပလီ ကမ်းခြေသိမ်းတိုက်ပွဲ အတွင်းက ရွာလုံးကျွတ်ထွက်ပြေးတိမ်းရှောင်ရသူတွေဟာ ငါးဖမ်းရာသီ နှစ်ခု ကို အလုပ်လက်မဲ့ ဖြတ်သန်းနေရတာဖြစ်ပါတယ်။
တိုက်ပွဲရဲ့ သက်ရောက်မှုအဖြစ် ဂျိတ္တော ငါးဖမ်းဇုံကို မှီတည်နေတဲ့ လူဦီးရေ ငါးသောင်းကျော်ဟာ စားဝတ်နေရေး နဲ့ ဘဝ နေထိုင်မှုတွေကို ရိုက်ခတ်ခဲ့တာဖြစ်ပါတယ်။
“သိမ်းပြီးတာ ကြာပြီဆိုပေမယ့် ကမ်းခြေက လုံးဝ ဝင်လို့မရဘူး ၊ ရေလုပ်ငန်း ပဲ လုပ်ကိုင်တတ်တဲ့ လူတွေက တခြားမှာ ရှာဖွေစားဖို့လည်း အဆင်မပြေဘူး ကိုယ့်အိုး ကိုယ့်အိမ်မှာ ဘယ်ခါ ပြန်နေရဖို့မှန်းလည်းမသိ ၊ ကောင်းစိတ်ဓာတ်ကျတယ် ၊ ဟိုးအဝေးကြီး ရန်ကုန် ၊မန္တလေးဆိုရင်လည်း တမျိုး ၊ ကခုက ဒီဂျိတ္တော သံတွဲ တဝိုက်မှာ ရှောင်နေတဲ့ လူတွေ လည်း ပြန်ဝင်လို့မရ ၊ ရောက်တဲ့နေရာမှာ တန့် (ရပ်) နေရတယ်။ “ လို့ ငပလီ ကမ်းခြေဇုံ အတွင်း က ထွက်ခွာခဲ့ရ သူ ကပြောပါတယ်။
ငပလီ ကမ်းခြေနဲ့ ကမ်းခြေချင်းဆက်နေတဲ့ တံငါရွာကြီးဖြစ်တဲ့ ဂျိတ္တောရွာဟာ ပြည်တွင်း ပြည်ပ ခရီးသွားများ ၊ ဒေသတွင်း ရေလုပ်ငန်းလုပ်ကိုင်သူများ ၊ ပင်လယ်စာ လက်လီ လက်ကား ကုန်သည်များ ၊ အအေးခန်း ၊ ရေခဲစက်များ နဲ့ ကျယ်ပြန့်စွာ လည်ပတ်ခဲ့တဲ့ လုပ်ငန်းခွင်နေရာဖြစ်ပါတယ်။
စစ်ရှောင်များ ပြန်စိစစ်ပြီး ပြန်လည်နေရာချထားရေးကို လုပ်ဆောင်နေပေမယ့် ၊ ငပလီ ကမ်းခြေ က ဒေသခံတွေ ၊ ဂျိတ္တောငါးဖမ်းဇုံက ဒေသခံ တွေဟာ အိမ်ပြန်နိုင်ဖို့ ခက်ခဲနေကြဆဲဖြစ်ပါတယ်။
ငပလီကမ်းခြေနဲ့ သံတွဲမြို့ကို ဇူလိုင်လ အတွင်း ကသိမ်းပိုက်ခဲ့တာဖြစ်ပြီး အခုဆိုရင် ၁၀ လ ခန့်ကြာမြင့်ခဲ့ပြီဖြစ်ပါတယ်။
လေးဝတီ FM
