ဆယ်စုနှစ်များစွာ မှာ ပထမ ဆုံးအကြိမ် ရခိုင်ပြည်တောင်ပိုင်းထိ စစ်မျက်နှာကျယ်ပြန့်လာခဲ့ ပြီး
စစ်ပွဲ ရဲ့ သက်ရောက်မှုတွေကိုလည်း ဒေသ ခံတွေ ခံစားနေရတာ ဖြစ်ပါတယ်။
သံတွဲ ရဲ့ လတ်တလော ဒေသတွင်း အခြေအနေ ကို လေးဝတီ FM ရဲ့ အယ်ဒီတာ
ကိုတေဇာအောင်က ဒေသခံ တွေ နဲ့ ဆက်သွယ်မေး မြန်းထားပါတယ်။
မေး – သံတွဲမှာပေါ့နော် လက်ရှိမှာ တိုက်ပွဲတွေက ပြင်းထန်လာတယ် ဆိုတော့ ဒေသခံတွေရဲ့
စိုးရိမ်မှုက ဘယ်လို ရှိနေလဲခင်ဗျ။
ဖြေ (အမျိုးသမီး ဒေသခံ)- တစ်ခါလည်း မဖြစ်ဖူးတော့ ကြောက်တာပေါ့။
ကြောက်တဲ့အခါကျတော့ သံတွဲမြို့ထဲကို ရောက်လာဖို့ စိုးရိမ်တယ်ပေါ့။ အခုက
ရွာအစွန်အဖျားတွေမှာ ဖြစ်နေတာဖြစ်တဲ့အတွက် လောလောဆယ် ကိုယ့်ဆီမှာ ဖြစ်လာရင်
လုံခြုံမယ့်နေရာတစ်ခုတော့ ကြည့်ထားတယ်ပေါ့။ လောလောဆယ် မြို့တွင်းထဲအထိတော့
ရောက်မလာသေးဘူး။ အနီးပတ်ဝန်းကျင်တွေမှာ ဖြစ်နေတယ်ပေါ့။
ဖြစ်လညတော့ ပိုပြီးတော့ စိုးရိမ်သောကက ရောက်တာပေါ့။ သူတို့က ဘယ်ကို ပစ်မှန်းမသိတော့၊
ကိုယ့်ဆီကို ရောက်လာဖို့လား။ တစ်ချို့ကျတော့လည်း အိမ်နဲ့ တအားနီးလာတဲ့အသံတွေ
ကြားလာရတယ်။
တစ်ချို့ဆို အိမ်တွေ တအားတုန်လာတဲ့အထိဆိုတော့ ကိုယ်တွေက
ဘာတွေဖြစ်လာကြလည်းဆိုတော့ ချက်စရာရှိတာ မြန်မြန်ဆန်ဆန်ချက် စားသောက်တယ်ပေါ့။
ကိုယ့်အိမ်မှာနေကြတယ်။ အသံတွေကို နားထောင်တယ်။ ပြင်ဆင်စရာရှိတာတွေကို
ပြင်ဆင်တယ်။ တကယ်လို့ ကိုယ့်ဆီကို ရောက်လာခဲ့သည်ရှိသော် လောလောဆယ်ကတော့
နားစွန့်နေတယ်ပေါ့။ အဲ အသံတွေကို ကိုယ့်ဆီဘယ်တော့ ရောက်လာမလဲ။ ရောက်တော့
ရောက်လာလိမ့်မယ်ပေါ့။
နီးတော့ နီးလာကြပြီပေါ့။ စိုးရိမ်စိတ်နဲ့ နေကြရတယ်ပေါ့။ ဘယ်လို စိုးရိမ်မှုတွေ ဖြစ်နေလဲဆိုတော့
ကျမတို့က လောလောဆယ်ကတော့ စိုးရိမ်မှုတွေက အများကြီးပဲ ပြောရဖို့ပေါ့။ ကိုယ်နဲ့
တိုက်ရိုက်မတွေ့သေးတဲ့အခါကျတော့ တတ်နိုင်သလောက် ကိုယ်ရှောင်တယ်ပေါ့။ ရှောင်တယ်၊

တိမ်းတယ်၊ နေကြတယ်ပေါ့။ အဲလိုမျိုး ဖြစ်လာမယ် ဆိုရင်တော့လည်း
ဖြစ်လာတဲ့အပေါ်မူတည်ပြီးတော့ ကျမ‌တို့ စီစဥ်ရမှာပေါ့။
မေး – အခု သံတွဲရဲ့ လက်ရှိအခြေအနေက ဘယ်လိုမျိုး အနေအထား ဖြစ်နေလဲ။
ဖြေ (အမျိုးသား ဒေသခံ) – အခု သံတွဲရဲ့ လက်ရှိအနေအထားကတော့ အခုလောလောဆယ်
ကိုယ်နဲ့ဝေးနေတဲ့ နေရာမှာ ကျနေတယ်။ ကိုယ်ဆီ့ကို ဘယ်အချိန်ရောက်လာဖို့လဲ၊ အဲဒါကို
စောင့်နေကြတာပေါ့။ ဘယ်ချိန် ရောက်လာလိမ့်မလဲ။ ဒီဥစ္စာ ငါတို့နေတဲ့ နေရာကို
ဘယ်အချိန်ကျလာလိမ့်မလဲ၊ အဲလို စိုးရိမ်စိတ်နဲ့ နေနေကြတာပေါ့။ ‌အဲတော့ ဈေးမကြီး၊
အိမ်ဆိုင်တွေ လမ်းဘေးမှာ ဖွင့်တဲ့ဆိုင်တွေ ကအစ အရင်ကလိုမျိုး နေတဝင်
မနက်အစောကြီးကနေ မိုးချုပ်အထိ မရောင်းကျတော့ဘူး။ သတိ ဝီရိယနဲ့ ဖြစ်နေကြတယ်ပေါ့။
ကျနော်တို့ အနေအထားနဲ့ကျတော့ ဒီလိုမျိုးဖြစ်ရင် ဘယ်လိုမျိုး အနေအထားနဲ့ လုပ်ဖို့လဲ၊
ဘယ်မှာ ပုန်းဖို့လဲ၊ ဒီလိုမျိုးတွေ တွေးပြီးတော့ ရပ်ကွက်တွေဆိုတော့ ပိုဆိုးတာပေါ့။
မြို့ထဲတွေမှာကျတော့ သူ့အဌာနဲ့သူ အေးနေကြတယ်။ ရပ်ကွက်တွေမှာ ပိုဆိုးတာပေါ့။
အဲလိုမျိုး ဖြစ်လာကြရင် ဘယ်လိုလုပ်ကြဖို့လဲ၊ လက်နက်ကြီးသံ ကြားပြီဆိုရင် သားသမီးတွေ
စစ်တဲ့သူနဲ့၊ ဗြောင်းဆန်နေတာပေါ့။ အသံတွေက တဖြည်းဖြည်းနဲ့ ကိုယ့်နေရာနဲ့က ပိုပြီး
နီးလာတယ်။ ပိုပြီး စိုးရိမ်လာကြတာပေါ့။
မေး – အဲတော့ အခုဆိုရင်လေ လက်နက်ကြီးတွေက သံတွဲမြို့နားအထိ ရောက်လာပြီလေ။
အဲတော့ ကိုယ့်လုံခြုံ‌ရေးအတွက် ဘယ်လိုတွေ ပြင်ဆင်ထားပါလဲ။
ဖြေ – (အမျိုးသား )အခု လောလောဆယ်တော့ ဘယ်လိုမှ ပြင်ဆင်ထားတာ မရှိဘူး။
တွေးထားတာကတော့ လေယာဥ်လမ်းကြောင်းက ဘယ်ကနေ ဘယ်ကို ပစ်နေတာလဲ။ သူတို့
ပစ်တဲ့ လမ်းကြောင်းအပေါ်မှာ မူတည်ပြီး ရွှေ့မယ့်နေရာကို အဲလိုပဲ စဥ်းစားထားတယ်။
ကိုယ့်ဆီကို ဘယ်ချိန်ရောက်လာမလဲဆိုတာကို ‌တွေးနေရတာပေါ့။ အခုက တအား
နီးလာတာကိုး။ နီးလာတယ်ဆိုတာ အခုဟာက ပစ်နေတဲ့နေရာမှန်သမျှက
ကိုယ့်အိမ်ခေါင်းမိုးပေါ်ကနေ သွားနေကြတာကိုး။ လေယာဥ်နဲ့ ကျဲတဲ့ အချိန်တုန်းကဆိုရင်လည်း
အိမ်ခေါင်မိုးက ပျံသွားကြပြီး ခဏနေ ကျဲတော့တာပဲ။ အသံတွေက တဖြည်းဖြည်းနဲ့ နီးလာတော့
နည်းနည်း စိုးရိမ်လာတာပေါ့။ ဒါမျိုးတွေ ရှိတာပေါ့။ သူတို့ ပစ်လမ်းကြောင်းနဲ့ အခုက နေဗီကနေ
ပစ်နေတာ။

ပင်လယ်ကနေ ရွှေလှေဘက်ကို ပစ်နေတာ။ သူတို့ ပစ်လမ်းကြောင်းနဲ့ တည့်တည့်ကျနေလား၊
တည့်တည့်ကျနေရင် ရှောင်ပြေးရမှာပေါ့။ အဲလိုမျိုးပဲ တွေးလို့ရတယ်။ ကျန်တဲ့အနေအထားက
သွားဖို့ လာဖို့ဟာနဲ့ တောဆိုလည်း တောမမည်တော့ ခက်ခဲနေတာပေါ့။
မေး – အမတို့မှာ အရွယ်မရောက်သေးတဲ့ ကလေးလည်းရှိတယ်ဆိုတော့ လုံခြုံရေးအတွက်
ဘယ်လိုမျိုး စဥ်စားထားပါသလဲ။
ဖြေ – (အမျိုးသမီး)ဘယ်လိုမျိုး စဥ်းစားထားတာရှိလဲဆိုတော့ အခုဖြစ်နေတဲ့
ပြဿနာတွေကကျတော့ လက်နက်ကြီးကျတာတွေဖြစ်တဲ့ အခါကျတော့ အစအနတွေ စင်တာတို့
အချို့က မမြင်ဖူးတဲ့အခါကျတော့ အပြင်ကို ထွက်ကြည့်တာတွေ ရှိတယ်။ အဲဒါကြောင်မလို့
အတတ်နိုင်ဆုံး အပြင်ကို ထွက်မကြည့်ဖို့ ပြောထားရတယ်။ တကယ်လို့ ဖြစ်လာခဲ့မယ်ဆိုလို့ရှိရင်
အိမ်က အုတ်အိမ်၊ အိမ်ကနှစ်ထပ်ဖြစ်တာမလို့ အောက်ထပ်က လုံခြုံတယ်ထင်ရတဲ့
နေရာလေးကိုတော့ ရွေးထားတယ်ပေါ့။
မေး – အခုဆိုရင် သံတွဲ နဲ့ ဂျိတ်တောကြားမှာ စစ်ဆေးရေးဂိတ်တွေ အများကြီးတိုးချထားတယ်။
အဲဒီအပေါ်မှာကော ဒေသခံတွေ ဘယ်လို အခက်အခဲတွေ ဖြစ်နေလဲ။
ဖြေ – (အမျိုးသား)ဒေသခံတွေ ဘယ်လိုဖြစ်လဲဆိုရင် သံတွဲ နဲ့ ဂျိတ်တောကြားမှာ လေယာဥ်နဲ့ ၃
စီး လာချတယ်။ အခု ပစ်ခတ်တာတွေ မဖြစ်ခင်မှာပေါ့ ပုရစ်ရေကောက်မှာ AAနဲ့ စစ်ကောင်စီနဲ့
ပစ်ခတ်မှု ဖြစ်ပြီးမှ လေယာဥ် ၃ စီးနဲ့ လာနေရာျထားတယ်ပေါ့။ လေယာဥ်ကွင်းနား
မရောက်တရောက်အထိ စုစုပေါင်းပေါင်းဆိုလို့ရှိရင် ၈ခု ၉ခု ၁၀ခုလောက်တော့ ရှိမယ်။
ဇီးဖြူကုန်းဘက်နဲ့ ဂျိတ်တောတစ်ရောက်ဆိုလို့ရှိရင် သစ်၊ ဝါး၊ ဓနိ စတာတွေက အစ လုံးဝ
အဆင်မပြေပေါ့။
သစ်၊ ဝါး၊ မီးသွေးတွေကအစ သူတို့ကို ဖမ်းခွင့် အကုန်ပေးထားတယ်။ အိမ်အတွက်လို့
ပြောတာတောင်မှ လုံးဝ ကြည်ကြည်ဖြူဖြူ ပေးမသယ်ဘူး။ သူတို့ကို ပေးကမ်းပြီးမှ
သွားလို့ရတယ်။ သူတို့ကလည်း ဘယ်လိုစကားတွေ ပြောလည်းဆိုရင် အာလူး၊ ကြက်သွန်၊ သစ်၊
ဝါး၊ ဓနိက အစပေါ့ အာလူးဆိုရင်လည်း ၅၀သား ကျော်ရင် ငါတို့ကို ဖမ်းခိုင်းထားတယ်ဆိုပြီး
သူတို့ပါးစပ်က ထုတ်ပြောတာတွေရှိတယ်။ ဆိုတော့ ပြည်သူတွေ အနေနဲ့ အဲပြဿနာတွေ
ရင်ဆိုင်နေရတယ်။ ပင်လယ်ဘက်ပဲဆင်းဆင်း တောင်ကုတ်ဘက်အထွက် ဘားတောင်းတောင်
မရောက်ခင် ရောင်ခြည်ဦးလမ်းခွဲ အခု အိုးအိမ်နေရာနား အဲနေရာဆို အစစ်အဆေး
တအားကြမ်းတယ်။

ဆိုင်ကယ်စီးသွားတာကအစ ၃ယောက် စီးသွားလို့ရှိရင် ဆင်းပြီး တန့်လို့မရဘူး။ မရောက်ခင်ကပဲ
ဆင်းပြီး လမ်းလျောက်၊ ဆိုင်ကယ်တူးဘောက်ကို ဖွင့်ပြ၊ အထုတ်အပိုးပါလား
အထုတ်ကြီးကြီးလေးပါတာနဲ့ တအားကို စစ်တော့တာပဲ။ အဲလိုမျိုးတွေ ဖြစ်တဲ့အခါကျတော့
အဲဒီဘက်က ရောင်ခြည်ဦးဘက်က ဝင်သွားရတဲ့ ရွာတွေဆိုရင် ဒါဝတို့ရှိတယ်။ အဲဘက်က
ရွာသားတွေဆိုလို့ရှိရင် ဒီဘက်ကိုတော့ မလာကြတော့ဘူး။ အဲဒီတော့
ကိုယ့်ရွာထဲမှာပဲနေနေကြတာပေါ့။ တအား ကြပ်လာတာကိုး။
မေး – သံတွဲမြို့ပေါ်ကသူတွေ လေယာဥ်သံကြားတယ်၊ ပစ်ခတ်သံတွေ ကြားတယ်၊ အဲတော့
တစ်ရက်ကို လေယာဥ် ဘယ်နှစ်ကြိမ်လောက် ပြန်တာမျိုး၊ လက်နက်ပစ်သံမျိုး ဘယ်လိုမျိုး
ကြားရပါလဲ။
ဖြေ – (အမျိုးသား)လေယာဥ်ပျံသွားတာကတော့ ၂၂ရက်နေ့က ပျံတယ်။ ပြီးရင် ၁၇၊ ၁၈
လောက်က ပျံတယ်။ ၂၂ရက်နေ့ ပျံတာကတော့ ကျနော်တို့အိမ်ခေါင်မိုးပေါ်က ပျံသွားတာ၊
အဲလိုပျံတယ်၊ ပျံပြီးလို့ရှိရင် ပစ်တယ်။ ၂ကြိမ်၊ ၃ကြိမ်လောက် ပျံပြီး ပျောက်သွားတာနဲ့
ပစ်တယ်။ အဲလိုမျိုးပေါ့။ အဲအစောပိုင်းကတော့ ဆင်ခေါင်း၊ ခမောင်းတုန်း၊ ကျောက်ဖြူမော်တို့
အဲဘက်ကနေ ဝိုက်ပြီးတော့ ပျံတယ်။ ပျံပြီးလို့ရှိရင် ရှင်စောပြင်ဘက်ကို ပစ်တယ်ပေါ့။
လက်နက်ကြီးကတော့ နေ့တိုင်းပစ်တယ်။ ဒီနေ့တောင် ၁၀ချက်လောက် ပစ်တယ်။
ပင်လယ်ထဲကနေ ပုရစ်ရေကောက်ဘက်ကို ၁၀ချက်လောက် ပစ်တယ်။
မေး – ပြီးခဲ့တဲ့ရက်က ကားဒရိုင်ဘာ သေနတ်မှန်ပြီး သေတယ်။ အဲဒီဖြစ်စဥ်ကို ဘယ်လို
သိထားပါသလဲ။
ဖြေ – (အမျိုးသား)ဘယ်လိုဖြစ်တာလဲဆိုတော့ ကားက တောင်ကုတ်ကနေ
၄စီးတက်လာတယ်ပေါ့။ ၄စီးတက်လာတာမှာ ၂ဏီးကတော့ ရှေ့ဆုံးက ရောက်သွားတယ်ပေါ့။
ကျန် ၂စီးကကျတော့ တိုက်ပြွဲဖစ်နေတဲ့အချိန်မှာ သူတို့က ကားကို တန့်ခိုင်းတယ်။
တန့်ခိုင်းတဲ့အချိန်မှာ ကားသမားက သူ့အလှည့်ကျမှ တန့်ခိုင်းတယ်။ သွားရင်ကောင်းမလား
မသွားရင်ကောင်းမလား ဆိုပြီး ဇဝေဇဝါဖြစ်နေတယ်။ အဲအချိန်မှာ သူတို့က
သူတို့စကားနားမထောင်ဆိုပြီးတော့ ပစ်တာ။ အဲလိုပစ်တဲ့အချိန်မှာ သေတာ။
အဲလိုပစ်တဲ့အချိန်မှာ ဒရိုင်ဘာကို ထိတယ်။ ကားပေါ်မှာပါလာတဲ့ အမျိုးသမီးတစ်ယောက်
လက်မောင်းကို ထိတယ်။

မေး – (အမျိုးသား)ဒီရက်ပိုင်းထဲမှာပေါ့ ငပလီမှာ စာကပ်တယ်။ AA က သံတွဲကို
သိမ်းတော့မယ်ဆိုပြီးပေါ့။ အဲဒါကိုကော ဘယ်လိုမျိုး သိထားတာရှိလဲ။
ဖြေ – အဓိကတော့ စာကပ်တယ်ပေါ့။ စာကပ်တာတွေကတော့ မြို့ထဲတွေမှာတော့ စာမကပ်ဘူး။
အဓိကကပ်သွားတာက မြို့ပြင်ပေါ့၊ နန်းချောင်းလို နေရာမျိုးပေါ့။ အဲလိုနေရာမျိုးမှာ
စာကပ်တယ်။ နောက်ပြီးလို့ရှိရင် မြို့ထဲဝင်တဲ့နေရာလောက်မှာ ကပ်တယ်ပေါ့။
သိမ်းတော့မယ်ဆိုတဲ့အကြောင်း ကပ်တယ်ပေါ့။
မေး – လတ်တလော စစ်ပွဲ တွေ ပြင်းထန်လာမယ့် အနေအထား ရှိတော့ ဒေသခံ
တစ်ယောက်အနေ နဲ့ ဘာများ ပြောချင်တာ ရှိသေးလဲဗျ။
ဖြေ – (အမျိုးသမီး) ဘာများ ပြောချင်တာရှိလဲဆိုတော့ ဒီလိုမျိုး ဖြစ်မလာစေချင်ပေါ့။
မဖြစ်စေချင်ပေါ့။ အကုန် ဒုက္ခရောက်ရတယ်။ ဒုက္ခရောက်ရတဲ့အပေါ်မှာ ကလေးတွေကအစ
အမျိုးသမီးတွေကအဆုံး ကိုယ်ဝန်ဆောင်သည်ကအစ ကျန်းမာရေးနဲ့ သွားဖို့ လာဖို့ကအစ
အကုန်လုံး အခက်အခဲဖြစ်တယ်။ သူတို့က လမ်းတွေပိတ်ထားတာကိုး။ ဆိုတဲ့အခါကျတော့
အဝေးရောက်နေတဲ့ သားသမီးတွေ ညီအကို မောင်နှမတွေ ရှိတယ်။ ဒီအပေါ်မှာ
ကျမ‌တို့ဘက်ကလည်း နေရ ထိုင်ရတာကလည်း တော်တော်လေးကို အဆင်မပြေဖြစ်ရတယ်။
မဖြစ်လာနိုင်ရင် ကောင်းတာပေါ့။ မဖြစ်လာနိုင်ဘူးလို့လဲ အတိအကျကြီး
ပြောလို့မရလာတဲ့အခါကျတော့ ကိုယ့်စိတ်ဓာတ်ပဲ ပြင်ဆင်ထားရတာပေါ့။
အခုလို အချိန်ပေးဖြေကြားပေးလို့ လေးဝတီ FM က ကျေးဇူးအများကြီး တင်ပါတယ်။