အာရက္ခပြည်သူ့အစိုးရ ရဲ့ ပြန်လည်ထူထောင်ရေး နဲ့ အုပ်ချုပ်ရေးလည်ပတ်နေတဲ့ ရခိုင်ပြည်က မြို့နယ် ၁၀ ခုမှာ စစ်ကော်မရှင် ဘက်က ရွေးကောက်ပွဲကျင်းပနိုင်ခြင်း မရှိတော့ ကြောင်း ကြေညာလိုက်ပါတယ်။
စစ်ကော်မရှင် ဖွဲ့စည်းထားတဲ့ ရွေးကောက်ပွဲကော်မရှင် က စက်တင်ဘာ ၁၄ ရက်ညပိုင်းမှာ ရွေးကောက်ပွဲ မကျင်းပနိုင်တဲ့ မြို့နယ်တွေကို ကြေညာခဲ့ပြီး အဲ့ဒီအထဲမှာ ရခိုင်ပြည်က မြို့နယ် ၁၀ ခုလည်းပါဝင်ခဲ့တာပါ။
ရမ်းဗြဲ ၊ ပေါက်တော ၊ ပုဏ္ဏားကျွန်း ၊ ရသေ့တောင် ၊ ဘူးသီးတောင် ၊ မောင်တော ၊ ကျောက်တော် ၊ မင်းပြား ၊မြေပုံ နဲ့ မြောက်ဦး မြို့နယ်တို့မှာ စစ်ကောင်စီဘက်က ရွေးကောက်ပွဲ မပြုလုပ်နိုင်ကြောင်း ကြေညာလိုက်တာဖြစ်ပါတယ်။
ဒါအပြင် ULA/AA ထိမ်းချုပ်ထားတဲ့ ပလက်ဝ မြို့နယ် ကိုလည်း ရွေးကောက်ပွဲ မကျင်းပနိုင်တော့ ကြောင်း ကြေညာထားပါတယ်။
ဒါပေမယ့် ဂွ ၊ သံတွဲ ၊ တောင်ကုတ် နဲ့ အမ်းမြို့နယ်တွေကိုတော့ ရွေးကောက်ပွဲ မကျင်းပနိုင်တဲ့ မြို့နယ်တွေရဲ့ စာရင်းထဲမှာ ပါမလာတာကိုတွေ့ရပါတယ်။
အဲ့ဒီမြို့တွေဟာ ULA/AA က ထိမ်းချုပ်ထားပြီး အာရက္ခပြည်သူ့ အစိုးရ ရဲ့ အုပ်ချုပ်မှု အသက်ဝင်နေတာ မြို့တွေဖြစ်တဲ့အတွက် ရွေးကောက်ပွဲကျင်းပဖို့ ကြေညာထားတဲ့ မြို့တွေ ထဲမှာလည်း ပါမနေပါဘူး။
ရခိုင်ပြည်က ကျောက်ဖြူ ၊ စစ်တွေ ၊ မာန်အောင် မြို့သုံးမြို့မှာ ပဲ ရွေးကောက်ပွဲကျင်းပမယ် လို့ စစ်ကောင်စီက ကြေညာထားတာပါ ။
စာရင်းချုပ်ရ ရင်တော့ ရခိုင်ပြည်မှာ မြို့ ၁၇ မြို့နယ် ရှိပြီး ရွေးကောက်ပွဲကျင်းပဖို့ ကြေညာထားတာ ၃ မြို့ ၊ ရွေးကောက်ပွဲမကျင်းပနိုင်ကြောင်း ကြေညာထားတာ ၁၀ မြို့ ဖြစ်ပြီး ကျန် တဲ့ မြို့ ၄ မြို့ ကို စစ်ကော်မရှင် ဘက်က စာရင်းဖျောက်ထားပါတယ်။
ဒါပြင် ၁၀၂၇ တော်လှန်ရေးနောက်ပိုင်းမှာ လက်လွှတ်ထားရတဲ့ ကချင်ပြည်နယ်က ၄ မြို့နယ်၊ ကယားပြည်နယ်က ၃ မြို့နယ်၊ ချင်းပြည်နယ်က ၄ မြို့နယ်၊ စစ်ကိုင်းတိုင်းဒေသကြီးက ၁၀ မြို့နယ်၊ မကွေး တိုင်းဒေသကြီး ၅ မြို့နယ်၊ မန္တလေးတိုင်းဒေသကြီးက ၃ မြို့နယ်၊ မြို့နယ်နှင့် ရှမ်းပြည်နယ်က ၁၇ မြို့နယ် တို့ မှာ လည်း ရွေးကောက်ပွဲ မကျင်းပ နိုင်တော့ကြောင်း ကြေညာထားပါတယ်။
လေးဝတီ FM
