ရခိုင်ပြည်တောင်ကုတ်မြို့ ၊ စကခ (၅) ထဲမှာ အနီးကပ်တိုက်ပွဲပြင်းထန်နေပြီး လူသားဒိုင်းအဖြစ် အသုံးပြုခံနေရတဲ့ အကျဉ်းသားတချို့ဟာ တိုက်ပွဲထဲက ထွက်ပြေးခဲ့ပါတယ်။

စစ်ကောင်စီက အဲ့ဒီအချုပ်သားတွေကို နောက်ကနေ လိုက်လံ ပစ်ခတ်လို့ ဆယ်ဦး ထက်မနည်း သေဆုံးခဲ့တယ်လို့ သတင်းရရှိပါတယ်။

တောင်ကုတ်မြို့နယ် ကျေးရွာ အသီးသီးက အကြောင်းအမျိုးမျိုးပြပြီး မတရားဖမ်းစီးခံထားရတဲ့ အချုပ်သားတွေကို တောင်ကုတ်တပ်မ( စကခ ၅) က လူသားဒိုင်းကာ လုပ်ပြီး AA ရဲ့ထိုးစစ်ကိုခုခံကာကွယ်နေတာဖြစ်ပါတယ်။

“စစ်ကောင်စီက အချုပ်သားတွေကိုရှေးတန်းတင်ပြီး ကာဘာယူတိုက်ခိုက်နေတယ်။ နောက်ပြီးတချို့အချုပ်သားတွေကထွက်ပြေးတယ် တဲ့ အခါ သူတို့က နောက်က နေ လိုက်ပစ်တယ်။ ဆယ်ယောက်ကျော်လောက်သေသွားတယ်” လို့ စစ်ရေးသတင်းရင်းမြစ်က ပြောပါတယ်။

တောင်ကုတ်မြို့မှာ ဖမ်းဆီးခံရသူတွေဟာ အချုပ်သားများအဖြစ်သာ ရှိနေသေးတာ ဖြစ်ပါတယ်။ မြို့နယ် အဆင့်စီရင်ခွင့်တွေကိုသာ တောင်ကုတ် တရားရုံးမှာ စီရင်ပြီး ပြစ်မှုထင်ရှားလို့ အကျဉ်းချခံရသူတွေကို သံတွဲထောင် နဲ့ စစ်တွေ ထောင်တွေကို ပို့တာဖြစ်ပါတယ်။

စစ်ကောင်စီဟာ ဒေသခံတွေကို အာရက္ခတပ်တော်နဲ့ ပတ်သက်တယ်ဆိုတဲ့ စွက်စွဲချက်နဲ့ စစ်ပွဲမတိုင်ခင်ကာလတွေက ဖမ်းဆီးထားသူတွေလည်းရှိတယ်လို့ဆိုပါတယ်။

အဲ့ဒီ အချုပ်သားတွေကို စစ်ပွဲထဲမှာ လူသားဒိုင်းအဖြစ် အသုံးပြုနေပြီး လူ့အခွင့်ရေး ချိုးဖောက်နေတာဖြစ်တယ်လို့ ဒေသခံ သတင်းရင်းမြစ်က ပြောပါတယ်။

“မြို့တွင်း နဲ့ နယ်ကျေးရွာတွေက လူတွေကို သူတို့က စီမံချက်ရှိရှိနဲ့ကြိုဖမ်းထားတယ်။ နိုဝင်ဘာလ ပမထ အပတ်မှာမြို့မ ရဲစခန်းကနေ အချုပ်သားတွေ ကိုတပ်မ ကိုရွှေ့ ပြောင်းတယ်။ ပြီးတော့အခုတိုက်ပွဲအတွက်သူတို့ကို လူသားဒိုင်းကာနဲ့ အသေခံလုပ်ထားတယ်။ ဒါကစစ်ရာဇဝတ်မူဘဲလေ။ လူ့အခွင့်အရေးကိုကျုးလွန်နေတယ်။သူတို့စစ်ကိုစစ်နဲ့တူအောင်မတိုက်ရဲလုပ်နေတာ” လို့ စစ်ရေးသတင်းရင်းမြစ် က ပြောပါတယ်။

လတ်တလောမှာ လူသားဒိုင်းအဖြစ် ဖမ်းဆီးခံထားရတဲ့ အချုပ်သားတွေဟာ အကာအကွယ်မရှိဘဲ တိုက်ပွဲထဲမှာ ပိတ်မိနေကြတာဖြစ်ပါတယ်။

အာရက္ခတပ်တော်နဲ့ စစ်ကောင်စီတို့ဟာ မျက်နှာချင်းဆိုင် အနီးကပ်တိုက်ပွဲဖြစ်နေပြီး အကျဉ်းသား တွေ ဟာ လူသားဒိုင်းအဖြစ် အသုံးပြုခံနေရတာဖြစ်ပါတယ်။

အဉ္စနလီညှင်း (လေးဝတီFM)