ရခိုင်ပြည် ကျောက်တော်မြို့ က ကျောင်းသား ၂၀ သေဆုံးမှုနဲ့ ပတ်သက်ပြီး အာဆီယံအနေနဲ့ မင်းအောင်လှိုင် ဦးဆောင်တဲ့ အာဏာသိမ်းစစ်တပ်ကို နိုင်ငံတကာ ရာဇဝတ်ရုံး ICC မှာ တရားစွဲဆိုဖို့ လိုအပ်ကြောင်း အာဆီယံလွှတ်တော်ကိုယ်စားလှယ်များ လူ့အခွင့်ရေးကာကွယ်ရေးအဖွဲ့ (ASEAN Parliamentarians for Human Rights – APHR) က စက်တင်ဘာ ၁၃ ရက်နေ့မှာ ထုတ်ပြန် လိုက်ပါတယ်။
အာဆီယံ လွှတ်တော်ကိုယ်စားလှယ်များ လူ့အခွင့်အရေးကာကွယ်ရေး အဖွဲ့ ဝင် အင်ဒိုနီးရှား ၊ မလေးရှား ၊ ထိုင်း နိုင်ငံ ကလွှတ်တော်ကိုယ်စားလှယ်တွေက ၊ “အာဆီယံ နိုင်ငံတွေ အနေနဲ့ ဒီ ကိစ္စ ကို ပေါ့ပေါ့တန်တန် မလုပ်ဖို့ “သတိပေးထားတာဖြစ်ပါတယ်။
တရားမျှတမှုအတွက် နိုင်ငံတကာ အရေးယူမှုများ (ဥပမာ – နိုင်ငံတကာရာဇဝတ်တရားရုံး ICC) ကို အသုံးပြုပြီး မင်းအောင်လှိုင် ဦးဆောင်တဲ့ စစ်တပ် ကို တရားစွဲရန် လိုအပ်ကြောင်း အထူးတင်ပြထားပါတယ်။
တဆက်တည်းမှာပဲ စစ်ကောင်စီ၏ လေကြောင်းတိုက်ခိုက်မှုများကို ရပ်တန့်စေရန် ကမ္ဘာလုံးဆိုင်ရာ လက်နက်ပိတ်ဆို့မှု နဲ့ လေယာဉ်လောင်စာဆီ ကို တင်းကြပ်သော ထိန်းချုပ်မှုများကို ချမှတ်ရန် လည်း တောင်းဆိုထားပါတယ်။
“အာဆီယံနိုင်ငံများသည် စိုးရိမ်ကြောင်းကြေညာချက်ထက် ကျော်လွန်ကာ သေချာတိကျသော လုပ်ဆောင်ချက်များဖြင့် ဤ အကြမ်းဖက်မှုများကို တားဆီးရန်၊ ဒီမိုကရေစီ အဖွဲ့များအား ပံ့ပိုးရန်နှင့် စစ်ကောင်စီကို တရားမဝင်မှုအတွက် တာဝန်ခံစေရန် လိုအပ်ပါသည်” လို့ APHR အဖွဲ့ဝင်၊ မလေးရှားလွှတ်တော်ကိုယ်စားလှယ် ဝေါင်းချန် (Wong Chen) က ပြောကြားထားပါတယ်။
ဒါအပြင် အဖွဲ့ရဲ့ ခေါင်းဆောင်ဖြစ်တဲ့ အင်ဒိုနီးရှား အမျိုးသားလွှတ်တော်ကိုယ်စားလှယ် မာဆီ ခရစ်စတီ ဘာရန့် (Mercy Chriesty Barends) က
“အာဆီယံနိုင်ငံများမှ လွှတ်တော်ကိုယ်စားလှယ်များအဖြစ် ကျွန်ုပ်တို့အစိုးရများသည် ပြည်သူများကို သတ်ဖြတ်ခြင်းကို အမှန်တကယ် တုံ့ပြန်ဖို့ မဖြစ်မနေ လိုအပ်ပါသည်။ မြန်မာပြည်သူများကို ကာကွယ်ရန် နိုင်ငံတကာအဆင့်တွင် အရေးပေါ် အရေးယူမှု လိုအပ်ပါသည်” လို့ ထုတ်ပြန်ချက်မှာ ပြောကြားထားပါတယ်။
လေးဝတီ FM
